Փաստ ինֆո

Աշխարհում կան շատ երկրներ, որոնք ճանաչում են միմյանց տարածքային ամբողջականությունը, սակայն, սահմանները ճշգրտված չեն։ Իրենց մոտ, սակայն, այդ հարցն այն սրությամբ դրված չէ, ինչպես մեզ մոտ։ «Փաստինֆո»-ի հետ զրույցում նման կարծիք հայտնեց ՔՊ-ական պատգամավոր Հովիկ Աղազարյանը՝ անդրադառնալով Նիկոլ Փաշինյանի հայտարարությանը, թե Հայաստանի Հայաստանը Կադաստրի վկայական չունի։ Իր խոսքով՝ քանի դեռ մեր երկրի սահմանները ճշգրտված չեն ու սահմանազատումն իրականացված չէ՝ այդ խնդիրը շարունակելու է մնալ չլուծված։

«Այս իմաստով, այո՛, մենք գիտենք, որ այսինչ թփի մոտով է անցնում սահմանը։ Բայց թե տվյալ թփից քանի մետր այս կամ այն կողմով է անցնում՝ չգիտենք»,- ասաց նա։

Ըստ պատգամավորի՝ խոսքն այս դեպքում վերաբերում է այդ սահմաններն ամրագրելուն։ Հետևաբար, ըստ Աղազարյանի, երբ իրենք հայտարարում են, որ ՀԱՊԿ-ն անհրաժեշտ ձևով չի արձագանքում՝ հասկանում են, որ այդ կառույցը դա անում է՝ հստակ իմանալով սահմանի հստակ կետերը։ Անդրադառնալով հարցին՝ թե ինչ սկզբունքով ՀԱՊԿ-ը կարող է իմանալ մեր սահմանները, երբ մեր իշխանությունները հայտարարում են կադաստրի վկայական չունենալու մասին՝ Աղազարյանը հայտարարեց, որ մենք գիտենք մեր սահմանները և սահմանազատումն անհրաժեշտ է՝ հարևան երկրի ղեկավարության հետ հակասություններ չունենալու և «խաղաղության դարաշրջանի» մեկնարկի համար։

«Չնայած խաղաղության պայմանագիրն էլ չպետք է ֆետիշացնել, որովետև այսօր կարող ես կնքել այդ պայմանագիրը, իսկ հաջորդ օրը հարձակվել քո հարևանի վրա։ Ալիևն էլ է ուզում խաղաղություն։ Բայց ինքն ուզում է խաղաղություն հաստատել՝ հայերին կոտորելով ու զրկելով իրենց տարածաշրջանից»,- ասաց նա։

Այս դեպքում Աղազարյանը կարևորեց երկու հանգամանք՝ պաշտպանունակության բարձրացում և համաշխարհային հանրության առջև ներկայանալ խաղաղ գոյակցության պատրաստակամությամբ։ Անդրադառնալով այսպես կոչված անկլավների հարցին՝ Աղազարյանն ասաց, որ եթե կողմերն ուզում են իրական խաղաղություն, ապա Տիգրանաշենը չպետք է հանձնվի Ադրբեջանին։ Իր խոսքով՝ ինքը կանի իրենից կախված ամեն ինչ, որ դա տեղի չունենա։

Աղբյուր` Փաստինֆո