Փաստ ինֆո

Դատախազությունը պահանջում է կրկին կալանավորել Արցախյան երրորդ՝ 44-օրյա պատերազմում նահատակված Ժորա Մարտիրոսյանի մորը՝ Ազգուշ Մարտիրոսյանին՝ հայտարարելով, թե Վերաքննիչ քրեական դատարանի որոշումն օրինական ու արժանահավատ չէ։
«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Մանվել Շահվերդյանի նախագահությամբ, ընթանում են հերոսի մոր գործով նախնական դատալսումները, որին մասնակցում է նաև տուժող Աշոտ Փաշինյանը, որին, ըստ քրեական գործի, իբրև առևանգել է Մարտիրոսյանը։

Նշենք, որ այսօր առավոտյան Վերաքննիչ քրեական դատարանը՝ Գրիգոր Հովհաննիսյանի նախագահությամբ, բեկանել էր Ազգուշ Մարտիրոսյանի նկատմամբ կալանավորումը որպես խափանման միջոց ընտրելու մասին դատավոր Ժորա Չիչոյանի որոշումը՝ Ազգուշ Մարտիրոսյանի նկատմամբ որպես խափանման միջոց կիրառելով տնային կալանքը։ Դատարանի այս որոշումից հետո Մարտիրոսյանը «Աբովյան» ՔԿՀ-ից տեղափոխվել է բնակության վայր, որտեից կարճ ժամանակ անց տեղափոխվել դատարան՝ նիստի։

Նախնական դատալսումների ընթացքում քննարկման առարկա դարձվեց Մարտիրոսյանի խափանման միջոցն անփոփոխ թողնելու, վերացնելու, երկարացնելու կամ անազատության հետ չկապված այլ՝ ավելի մեղմ խափանման միջոցով փոխարինելու հարցը։ Հանրային մեղադրողը միջնորդեց Մարտիրոսյանի նկատմամբ որպես խափանման միջոց կիրառել կալանավորումը՝ իր անհամաձայնությունը հայտնելով վերաքննիչ դատարանի որոշման վերաբերյալ։ Դատախազը նախ նշեց, որ պատրաստվում են վճռաբեկ բողոք ներկայացնել, նշեց՝ դատարանի որոշումն արժանահավատ և օրինական չէ և միայն կալանավորումն է այն բացառիկ խափանման միջոցը, որն ի զորու է ապահովելու պատշաճ վարքագիծը, քանի որ առկա են կալնավորման հիմքերն ու պայմաննեերը։ Դատախազ Դանիելյանը նաև մտահոգություն հայտնեց, որ տնային կալանքի կիրառման պայմաններում անգամ չի կիրառվել Մարտիորսյանի նկատմամբ սահմանափակումներ՝ այ անձանց հետ հաղորդակցվելու համատեքստում։ Ավելին, դատախազի միջնորդությունից պարզ դարձավ, թե Մարտիրոսյանի՝ կալանավայրում գտնվելու ժամանակ զոհված զինծառայողներից մեկը՝ Վիգեն Ազատյանը, զանգահարել է տուժող Աշոտ Փաշինյանին և հորդորել ԶԼՄ-ներով հայտարարել ՝ «իրենց (Նիկոլ Փաշինյանի և ընտանիքի մյուս անդամների․հեղ) հետ կապ չունես, որ մեր խոսքը համապատասխանի»։ Բացի այդ, Աշոտ Փաշինյանին ասել են, որ եթե այս անգամ չի հաջողվել նրան տեղափոխել «Եռաբլուր», մյուս անգամ կտանեն։ Մեղադրող Դանիելյանը մտահոգություն հայտնեց առ այն, որ Ազգուշ Մարտիրոսյանի դրվագից զատ գործով նախաքննությունը շարունակվում է և կարող են խոչընդոտել գործի քննությանը։

Տուժող Աշոտ Փաշինյանը նախ զերծ մնաց Մարտիրոսյանի խափանման միջոցի հարցով դիրքորոշում հայտնելուց՝ նշելով, որ դա իրավաբանների գործն է, ապա, փաստաբան Գեորգի Մելիքյանի հարցադրմանը, թե որպես տուժող՝ իրատեսական համարու՞մ է՝ Ազգուշ Մարտիրոսյանի կողմից իրեն առևանգելու և ազդեցություն գործադրելու տեսանկյունից, Աշոտ Փաշինյանը հաստատեց դատախազի պնդումը՝ միջամտությունների վերաբերյալ։ Նա հայտնեց, որ իրեն զանգել են՝ բողոքը հետ վերցնելու հարցով։

Պաշտպանության կողմի դիտարկմամբ՝ դատախազի մտահոգությունների՝ հնարավոր ազդեցության վերաբերյալ փաստական տվյալները բացակայում են։ Բացի այդ, Հովսեփ Սարգսյանը գտնում է, որ առհասարակ բացակայում է առևանգման հանցակազմը։

Հիշեցնենք, որ մայիսի 17-ին Նիկոլ Փաշինյանի ընտանիքին պատկանող «Հայկական ժամանակ» օրաթերթը գրել էր՝ Աշոտ Փաշինյանին զոհված զինծառայողների ծնողների կողմից իբրև առևանգելու փորձի մասին՝ նշելով, թե իբրև Աշոտ Փաշինյանին նստեցրել են ավտոմեքենան, ապա ՀԺ-ի կողմից հրապարակվել է տեսանյութ, թե ինչպես է Աշոտ Փաշինյանն իրեն դուրս նետվում ավտոմեքենայից։
Հատկանշական է, որ ՀԺ հրապարակմամբ նշվում էր մի քանի ծնողի տվյալներ, նշվում կոնկրետ անուն՝ Գարիկ Գալեյան, սակայն հետագայում պարզվեց՝ ավտոմեքենայի ղեկին եղել է միայն Գայանե Հակոբյանը։ Իսկ «Որդիների կանչ» ՀԿ-ի կողմից տարածված տեսանյութից պարզ էր դառնում, որ Աշոտ Փաշինյանը սեփական կամքով է նստել մեքենան։

Ավելի ուշ արդեն պաշտոնապես հայտնի դարձավ, որ Աշոտ Փաշինյանը հանցագործության մասին հաղորդում է ներկայացրել, ինչի հիման վրա ՀՀ ՔԿ Երևան քաղաքի քննչական վարչության ծանր հանցագործությունների քննության բաժնում նախաձեռնվել է քրեական վարույթ՝ ՀՀ քրեական օրենսգրքի 191-րդ հոդվածի 2-րդ մասի 1-ին կետի հատկանիշներով։ Քրեական վարույթի շրջանակներում ձերբակալվել է Գայանե Մարտիրոսյանը։ Նրան մեղադրանք է ներկայացվել։ Ազգուշ Մարտիրոսյանի նկատմամբ դատավոր Ժորա Չիչոյանի որոշմամբ՝ որպես խափանման միջոց է ընտրվել կալանավորումը։

Նշենք, որ գործով նախաքննությունը բավականին կարճ է տևել։ Գործն այժմ գտնվում է Երևանի ընդհանուր իրավասության դատարանի դատավոր Մանվել Շահվերդյանի վարույթում։

Հեղինակ՝ Իզաբել Սահակյան

Աղբյուր` Փաստինֆո