Փաստ ինֆո

ՀՀ արդարադատության նախարար Գրիգոր Մինասյանը նորմալ է համարում, որ Նիկոլ Փաշինյանին ուղեկցող ավտոշարասյան կողմից հղի կնոջը վրաերթի ենթարկելու գործով որևէ մեկը կալանավորված չէ, իսկ Նիկոլ Փաշինյանի որդու՝ Աշոտ Փաշինյանի, ենթադրյալ առևանգման գործով կալանավորվել է զոհված զինծառայողի մայր։ Լրագրողների հետ զրույցում Գրիգոր Մինասյանը նշեց, որ իր կարծիքով արդար և ճիշտ է՝ դատարանների և կոնկրետ դատավորների որոշումները չքննարկելը և վստահելը դատավորին, քանի որ գործի հանգամանքներից ելնելով դատավորն իր ներքին համոզմունքով է այդ որոշմանը գալիս։

«Իմ պատկերացմամբ՝ երբ խոսվում է դատարանների նկատմամբ ճնշումների մասին, պետք է ընկալենք, որ երբ լրագրողական համայնքը, կամ ես այստեղ կանգնած, կամ դատարանների կողքը հավաքված տուժող կողմի ներկայացուցիչները հորդորում են, կոչեր են անում, նման քայլերով կոնկրետ գործով գուցե դատարանին կաշկանդվածության մեջ են դնում»,- ասաց Մինասյանը։

Դիտարկմանը, որ մի դեպքում հղի կին է մահացել, բայց կալանավորված մարդ չկա, մյուս դեպքում՝ Փաշինյանի որդուն ուղղակի մեքենայով տանում են, կալանավորված մարդ կա, այս երկու դեպքերով արդյո՞ք արդարություն տեսնում է, Մինասյանը պատասխանեց. «Նույնիսկ ժողովրդավար երկրներում կարող են լինել դժբախտ պատահարներ։ Ես չեմ ուզում գնահատական տալ կոնկետ գործի մասին, բայց որպես սոցիալական ցանցից դեպքին ծանոթացած մարդ՝ կարող եմ ասել, որ եղել է դժբախտ պատահար, իսկ արդար է, թե ոչ՝ պետք է սպասել, երբ կլինի վերջնական դատական ակտ»։

Աղբյուր` Փաստինֆո