Փաստ ինֆո

Հայկական ավիաընկերությունների թռիչքների թույլտվությունը կասեցնելու Թուրքիայի որոշման հարցը պետք է լուծեն հայկական ավիաընկերությունները՝ եվրոպացի գործընկերների ու տարածաշրջանային պետությունների հետ քննարկումների միջոցով։

Այս մասին լրատվամիջոցների հետ զրույցում ասել է ՀՀ ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանը։

Նա միևնույն ժամանակ հայտարարել է, որ այժմ էլ շարունակում է կողմնակից լինել Թուրքիայի հետ սահմանի բացման գաղափարին, քանի որ, իր խոսքով, դա կարող է նպաստել Հայաստանի տնտեսական զարգացմանը։

«Ես կողմնակից եմ, քանի որ հասկանում եմ, որ դա ձեռնտու է իմ երկրին. թե հայկական արտադրանքը Թուրքիայի տարածքով արտահանվի Եվրոպա, տրանսպորտային ծախսերը կկրճատվեն, իսկ ապրանքներն ավելի մրցունակ կլինեն»,- ասել է իշխանական պատգամավորը։

Նա նաև համոզմունք է հայտնել, որ այսպիսով Հայաստանը կարող է վերածվել տնտեսական խաչմերուկի և օգտվել Վրաստանի, Իրանի, Թուրքիայի, ու Ադրբեջանի հետ բաց սահմաններ ունենալու տնտեսական օգուտներից։

Հիշեցնենք, որ Սուքիասյանների ընտանիքին պատկանող «FlyOne Armenia» ավիաընկերությունը չի կարողացել ապրիլի 29-ին իրականացնել դեպի Թուրքիա և այլ երկրներ նախատեսվող թռիչքները։ Թուրքիան դեպի երրորդ երկրներ թռիչքների համար իր օդային տարածքը փակել է նաև ՀՀ վարչապետ Նիկոլ Փաշինյանին սպասարկող Air Force One օդանավի համար։

Այդ երկրի իշխանություններն իրենց որոշումը բացատրել են Երևանի կենտրոնում բացված խորհրդանշանական «Նեմեսես» արձանի բացմամբ։ Իսկ այդ երկրի արտգործնախարարն ավելի վաղ ՀՀ իշխանություններին կոչ էր արել հեռացնել հուշարձանը՝ սպառնալով՝ իրենց պահանջը չկատարելու դեպքում դիմել պատասխան քայլերի։

Աղբյուր` Փաստինֆո