Փաստ ինֆո

Եթե 2018-ից առաջ մեզ բարկացնում էր, երբ Հայաստան-Ադրբեջան համատեքստում միջազգային կառույցների՝ հավասարության նշանով որևէ հայտարարության տեքստ էր տարածվում, ապա 2018-ից հետո Հայաստանը հավասարության նշանի հավակնորդ չէ անգամ։ Այսօր այսպես կոչված՝ «քաղաքակիրթ Եվրոպան» ամբողջությամբ և կատարելապես ազարբայջան կոչվող սարքովի պետության պաշտպանի դերն է ստանձնել։

«Խիստ հիասթափեցնող է, որ Եվրոպական Միությունը՝ ի դեմս Եվրոպական խորհրդի նախագահ Շառլ Միշելի, Արցախի (Լեռնային Ղարաբաղի) ժողովրդին դիմում է «նախկին ԼՂԻՄ-ում բնակվող հայեր» եզրույթով՝ անտեսելով ինքնորոշման հիմնարար և անօտարելի իրավունքի իրացման վրա հիմնված Արցախի պետականության տասնամյակների գոյության փաստը»։ Այս տողերն այսօր ֆեյսբուքում գրել է Արցախի ՄԻՊ Գեղամ Ստեփանյանը։ Ըստ նրա՝ «Նման ձևակերպումները, որոնք դիտավորյալ են արվում աշխարհում մարդու իրավունքների արժեքները պաշտպանող Միության կողմից, ոչ միայն վիրավորում են արցախցիների զգացմունքները, այլև կործանարար ազդեցություն են ունենում ԼՂ հակամարտության խաղաղ կարգավորման գործընթացի վրա՝ անտեսելով դրա հիմնական շահառուի՝ Արցախի ժողովրդի իրավունքները»։

Ինչ խոսք, վիրավորական է, մանավանդ, երբ մյուս կողմում մշտապես նախահարձակ ագրեսոր ազարբայջանն է։ Ընդ որում, այս դեպքում սխալ է անգամ «ուժեղի մոտ միշտ էլ թույլն է մեղավոր» հայտնի ասացվածքը, քանզի ազարբայջանը 90-ականներին, կրկին հարձակվողն էր, նախահարձակ էր, երբ խայտառակ պարտություն կրեց Արցախյան առաջին պատերազմում։ Եվ պարտվելուց հետո էլ, տարբեր պետությունների ջանքերով հրադադար մուրալուց հետո անգամ հարձակողական դիրք էր բռնում։ Պետություն, որի յուրաքանչյուր օրը սադրանքով ու ստով է հագեցած։ Այսպես էլ պետություն են կառուցել-կառուցում՝ հարևան պետությունների հաշվին։ Տարբեր ճակատներով կռիվ տալով՝ պատմություն հորինելով սարքեցին բարբարոս մի՝ ազարբայջան․․․

Այն նույն ազարբայջանը, որն այսօր խաղաղության մասին ճամարտակում է բարձր ամբիոններից, խաղաղությունն իբրև հաթաթա օգտագործելով, պարբերաբար էլ՝ ՀՀ պարտվողական իշխանությանն ասելով՝ «տես, հա՜, դու շատ լավ գիտես, թե իմ ասած խաղաղությունը որն է։ Բնականաբար, «ալիևյան խաղաղության» ողջ իմաստը շատ լավ հասկանում են նաև զանազան եվրոմիշելներ, սակայն որտեղ իրենց շահն է, այնտեղ էլ իրենք են, իսկ հայության համար՝ Արցախում և Հայաստանում մի խառնախորտիկ ունեն՝ ժողովրդավարություն, մարդու իրավունքներ, հիմա նաև՝ խաղաղություն․․․ Այս են հրամցնում հայությանը։

Ընդ որում, արդեն շատ հստակ ասելով՝ այսքանն է, ավելին չսպասեք․․․

Ի դեպ, վաղուց ժամանակն է հասկանալ, որ եվրոպական՝ ժողովրդավարության և հումանիզմի ջատագովությունը օդի փչոց է, փաստը՝ 120 000 արցախցի մեր հայրենակիցների ներկա վիճակն է․․․

Բարձր մշակույթը գնահատող Եվրոպան, խոստովանենք, որ այսօր ամբողջովին է կուլ գնացել թուրքադրբեջանական տանդեմին, քանզի նույն առասպելական հանգստությամբ, ինչպես Ջուղայի աշխարհահռչակ խաչքարերի կոտորածը հանդուրժեց, այսօր էլ հանդուրժում է ազարբայջան բարբարոս պետության կողմից իրականացվող մշակութային եղեռնը՝ մեր հոգևոր-մշակութային հզոր ժառանգության նկատմամբ՝ Շուշիում, Հադրութում, Քարվաճառում․․․

Ա․Ե․

Աղբյուր` Փաստինֆո