Փաստ ինֆո

ԱՄՆ Պետդեպի տարածած հայտարարությունը, որով ողջունվում է Ալիևի ֆաշիստական ելույթը, նշանակում է՝ կա՛մ չեն կարդացել այդ ելույթը հրապարակելուց առաջ, կա՛մ էլ գիտակցաբար մաս են կազմում այն վտանգավոր սցենարին, որ կարող է տեղի ունենալ արցախահայության նկատմամբ։ Այդ մասին «Փաստինֆո»-ի հետ զրույցում ասաց ադրբեջանագետ, պատմական գիտությունների թեկնածու Տաթևիկ Հայրապետյանը։

«Մի՞թե չեն զեկուցում այդ մարդկանց (նկատի ունի Պետդեպին,-խմբ․), թե ինչ է կատարվում։ Ինչի՞ համար պիտի համաներում արվի․ նրա համար, որ այդ մարդիկ պայքարել են իրենց ապրելու իրավունքի համա՞ր, թույլ չեն տվել, որ կոտորեն իրե՞նց․․․ Ղարաբաղյան հակամարտության ողջ էությունը խեղաթյուրվել է և դրանում իր մեղքի մեծ բաժինն ունի Հայաստանը։ 2020թ․ պատերազմից հետո պաշտոնական Երևանի թողտվությամբ Ալիևն ուժի կիրառմամբ դուրս մղեց ինքնրոշոման սկզբունքը, որը հակամարտության ողջ ընթացքում հիմնաքարային երեք սկզբունքներից մեկն է եղել։ Այսօր արտաքին դերակատարների միջնորդությամբ ագրեսորին տրվում է ամենը, ինչ ուզում է։ Այդ կերպ նրանք Ալիևին դարձնում են ավելի ագրեսիվ ու մղում Հայաստանի նկատմամբ նոր ագրեսիաների»,-ասում է Հայրապետյանը։

Ադրբեջանագետը շեշտում է՝ հստակ ծրագրով ընթանում է Արցախի հանձնման գործընթացը։ Դրա, ինչպես Հայաստանը Վրաստանին ու Իրանին կապող ռազմավարական ճանապարհները նաև հարցականի տակ դնելու համար պատասխան են տալու և՛ ՀՀ իշխանությունները, և՛ հավաքական Արևմուտքը, և՛ ՌԴ-ն։

«Երբ ասում էինք Արցախը հանձնողը Հայաստանն էլ է հանձնելու, հիմա մեր աչքով տեսնում ենք։ Ես երկու վարկած ունեմ՝ գործ ունենք կա՛մ միտումնավոր պետական դավաճանության հետ, կա՛մ՝ կատարյալ տգիտության, որը ևս հանգեցնում է դավաճանության։ Եթե մեկ-երկու քայլ առաջ չեն կարողանում մտածել, կանխատեսել, ի՞նչ իրավունք ունեն այս մարդիկ պետություն կառավարելու։ Զիջումներ է, որ անում են, ու էլ ոչ նախկիններին, ոչ էլ ապագա եկողներին կարող են մեղադրել։ Ալիևի ամեն մի ելույթը նախորդից ավելի ագրեսիվ է լինում։ Իրենց հանցավոր անգործության, սխալ հաշվարկների հետևանքով երկիրն արդեն ծայրահեղ ծանր վիճակի են հասցրել։ Մենք հիմա ավելի վատ վիճակում ենք, քան 2020թ․ նոյեմբերի 9-ի էինք»,-ահազանգում է ադրբեջանագետը։

Հայրապետյանը նշում է՝ Ալիևը ոչ մի, այսպես կոչված, խաղաղության պայմանագիր չի ստորագրելու։ Տարբեր կենտրոններում տեղի ունեցող հանդիպումներն էլ օգտագործում է՝ հասկանալու համար, թե ՀՀ ղեկավարը մինչև ուր կարող է զիջել, որքան թույլ է, որպեսզի պլանավորի հերթական զավթումը։

Մեր զրուցակցի համոզմամբ՝ ամեն մի հանդիպումից Ալիևը պոկում, ստանում է ինչ-որ բան՝ ի շահ իր երկրի, իսկ Փաշինյանը մինչև հիմա միայն հանձնել է և փոխարենը ոչինչ չի ստացել ու չի էլ ստանալու։

«Որևէ խաղաղություն չի լինելու։ Կոմունիկացիաների եհտ կապված ևս զուր հույսեր են փայփայում․ Ադրբեջանը հստակ հայտարարել է, որ կբացվի միայն այն կոմունիկացիան, որն իրեն պետք է, այսինքն՝ ՀՀ տարածքով Նախիջևանին կապող ճանապարհը։ Այլ կոմունիկացիաների մասին խոսք լինել չի կարող։ Այնպես որ, հաջորդիվ դա են անելու»,-եզրափակեց ադրբեջանագետը։

Աղբյուր` Փաստինֆո