Փաստ ինֆո

ՀՀ զինված ուժերի գլխավոր շտաբի պետի նախկին առաջին տեղակալ, գեներալ-լեյտենանտ Տիրան Խաչատրյանին 2020 թ. հոկտեմբերի 22-ին՝ 44- օրյա պատերազմի ամենաթեժ օրերին, վարչապետ Փաշինյանի առաջարկությամբ և ՀՀ նախկին նախագահ Արմեն Սարգսյանի հրամանագրով շնորհված ՀՀ Ազգային հերոսի կոչումն այդպես էլ ռազմական գործչին չի հանձնվել։

Կոչումը շնորհելու մասնա ֆեյսբուքյան իր օգտահաշվում դեռևս հոկտեմբերի 20-ին գրառմամբ էր հանդես եկել նաև արյունալի և նվաստացուցիչ պատերազմի Գլխավոր Գերագույն հրամանատար Փաշինյանը, ով իրեն հատուկ պաթոսով տեղեկացրել էր. «ՀՀ Զինված ուժերի գլխավոր շտաբի պետի առաջին տեղակալ, գեներալ-լեյտենանտ Տիրան Խաչատրյանը և 5-րդ բանակային կորպուսի հրամանատար գեներալ-մայոր Անդրանիկ Փիլոյանը, հատկապես, վերջին ժամերի ընթացքում, մարտի դաշտում, փառքով պսակեցին իրենց անունը և կարժանանան Ազգային հերոսի կոչման:

Նրանք շարունակում են իրենց հերոսական կռիվը՝ հանուն հայրենիքի: Փա՛ռք հայոց բանակին»,- գրել էր ապագա կապիտուլյանը վարչապետը, ում վաղուց, արդեն, հայտնի էին ռազմական գործողությունների ընթացքում՝ մեր բանակի գրանցած նահանջներն ու ուրվագծվող նվաստացուցիչ պարտության հեռանկարը։

Ավելի ուշ՝ Ազգային հերոսի կոչումը շնորհելուց, ընդամենը, 4 ամիս անց, այն շնորհող նույն Փաշինյանի առաջարկությամբ ՀՀ նախկին նախագահ Արմեն Սարգսյանը Տիրան Խաչատրյանին ազատեց ՀՀ զինված ուժերի գլխավոր շտաբի պետի առաջին տեղակալի պաշտոնից: Հարցի շուրջ «Փաստինֆո»-ն զրուցել է ռազմական գործչի հետ։

-Պարոն Խաչատրյան, դեռևս 2020 թ. հոկտեմբերին դուք Ազգային հերոսի, թերևս, ամենաբարձր պատվո կոչումին արժանացաք, սակայն, դրա վերաբերյալ մեկնաբանություններն իրարամերժ էին թվում։ Ինչո՞ւ պատերազմից հետո դուք հետ չվերադարձրիք Փաշինյանի կողմից՝ Ձեզ շնորհված Ազգային հերոսի կոչումը։

-Բայց ես վերցրե՞լ եմ իրենց տված կոչումը, որ մի հատ էլ՝ հետ տայի, կամ ի՞նչ – որ մեկը դա ինձ տվե՞լ է, որ ես իմանայի, թե ո՞ւմ պետք է դա հետ տամ։

-Իսկ ինչո՞ւ դա Ձեզ չեն տվել կամ անձամբ հանձնել, պարոն Խաչատրյան։

- Այ դա տվողներին հարցրեք…

-Այդ դեպքում՝ ո՞ւմ են տվել կամ որտե՞ղ է գտնվում Ձեզ շնորհված Ազգային հերոսի կոչումը։

-Դա տվել են ոչ թե ինձ, այլ հանձնել են Պաշտպանության նախարարությանը։

- Եվ Դուք դա այնտեղից չե՞ք վերցրել, կամ որևէ մեկը այն Ձեզ չի՞ փոխանցել։

-Ես չեմ վերցրել, ինձ չեն փոխանցել։

Թե ինչո՞վ է պայմանավորված եղել ՀՀ զինված ուժերի գլխավոր շտաբի պետի նախկին առաջին տեղակալ, գեներալ-լեյտենանտ Տիրան Խաչատրյանի՝ այսօրինակ նախընտրության իրական պատճառները, ըստ էության, չվերցնել իրեն շնորհված բարձր կոչումը, թերևս, մեզ հաջողվի պարզել ավելի ուշ, երբ լիովին բացահայտված կլինեն 44 օրյա պատերազմի հրահրման, դրա արյունալի ընթացքի և ուղղորդված խայտառակ պարտության իրական պատճառներն ու մեղավորները։ Գուցե, մի օր պարոն Խաչատրյանը կբացի Երրորդ հանրապետության ողջ պատմության ընթացքում ամենախայտառակ պարտության մեզ համար՝ անհայտ էջերը և տա այս կարճ զրույցի տողատակերում անպատասխան մնացած կախման կետերի բանալիները։ Եվ, գուցե, մենք կստանանք նաև այն հարցի պատասխանը, թե ինչո՞ւ ընդամենը չորս ամիս առաջ, մարտի դաշտում անունը փառքով պսակած գեներալ - լեյտենենատ Տիրան Խաչատրյանին, նույն խոսքերի հեղինակ, կապիտուլյանտ մականունով հայտնի վարչապետն առաջարկեց ազատել զբաղեցրած պաշտոնից։

Աղբյուր` Փաստինֆո