Փաստ ինֆո

Սոթքի ոսկու հանքավայրի ղեկավարությունը քիչ առաջ հանդես է եկել պաշտոնական հայտարարությամբ՝ պաշտոնապես հաստատելով Սոթքի բացի հանքի շահագործման դադարեցումը։

«Պարբերական հրետակոծությունների պատճառով Սոթքի հանքավայրում բացահանքի աշխատանքը դադարեցվել է» վերտառությամբ «ԳՊՄ ԳՈԼԴ» ընկերության մամուլի ծառայության հայտարարությունը ներկայացնում ենք ստորև.

«Ապրիլի 14-ի երեկոյան ժամերից սկսած ադրբեջանական զինուժի կողմից պարբերաբար կրակահերթեր են իրականացվում Սոթքի հանքավայրի ուղղությամբ։

Հանքավայրի աշխատող անձնակազմը բազմիցս փորձել է անցնել աշխատանքային պարտականությունների կատարմանը, սակայն դրան խանգարել է իրականացվող տարբեր տրամաչափի հրաձգային զինատեսակներից կրակոցներ։ Տուժածներ չկան, աննշան վնաս է պատճառվել տեխնիկային։

Ձեռնարկության աշխատակիցների համար մշտական վտանգի իրավիճակը շարունակվում է արդեն մեկ ամսից ավելի։ Որպես հետևանք, Սոթքի բաց հանքում հետագա աշխատանքը անհնարին է դարձել ընկերության վերահսկողությունից անկախ հանգամանքների պատճառով։

Այդպիսով, ընկերությունը բախվել է անհաղթահարելի ուժի հանգամանքների ազդեցությանը (ֆորս մաժոր)։ Աշխատակիցների անվտանգությունը ապահովելու նպատակով, «ԳՊՄ ԳՈԼԴ»-ի ղեկավարությունը որոշում է կայացրել դադարեցնել բաց հանքի շահագործումը և անձնակազմին ուղարկել հարկադիր պարապուրդի»,- ասվում է հայտարարության մեջ։

Հիշեցնենք, որ «GeoProMining»-ի ներկայացուցիչ Ռուզաննա Գրիգորյանը «Փաստինֆո» լրատվականի հետ զրույցում ավելի վաղ ասել էր, որ Սոթքի հանքավայրը ապրիլի 15- ից մայիսի 15- ը փակ է լինելու։ Նրա փոխանցմամբ՝ հանքի մերձակայքում պարբերաբար կրակոցներ են լինում, անվտանգային նկատառումներից ելնելով, ղեկավարության կողմից որոշում է ընդունվել մեկ ամսով վճարովի արձակուրդ տրամադրել հանքի աշխատակիցներին, միաժամանակ հավելելով, որ հանքի աշխատանքների հետագա ճակատագիրը պարզ կդառնա հարկադիր պարապուրդից հետո, որի վերաբերյալ տնօրինությունը կիրազեկի հանրությանը։

«Փաստինֆո» լրատվականի հետ զրույցներում տեղացի բնակիչները մտահոգություն էին հայտնել, որ  Սոթքի ոսկու բաց հանքավայրը կարող է այդպես էլ, այլևս, չշահագործվել։

Աղբյուր` Փաստինֆո