Փաստ ինֆո

Ադրբեջանը չի բավարարվել Արցախի, անկլավների հանձնմամբ, նրա ախորժակը հետզհետե աճում է։Արցախի հանձնումը հայկական պետությունը վերացնելու ծրագրի մի փուլն է ընդամենը, իսկ խաղաղություն առհասարակ չի լինելու, քանի որ խաղաղության ցանկություն եթե լինում է, ապա փոխզիջումներ են լինում, իսկ Ադրբեջանի կողմից որևէ զիջում չի եղել, ավելին՝ ուժով փորձում է ստանալ հնարավոր ամեն ինչ։ Այդ մասին «Փաստինֆո»-ի հետ զրույցում ասաց Ստենֆորդի համալսարանի քաղաքագիտության դոկտոր, քաղաքագետ Արթուր Խաչիկյանը։

«Ալիևին չի բավարարվում Արցախով ․ նա մեծ պլաններ ունի ու կանգ չի առնելու ոչ Արցախը, ոչ էլ Զանգեզուրով միջանցք ստանալուց հետո։ Այսպես շարունակվելու դեպքում մենք կդառնանք անկլավ Ադրբեջանի կամ Թուրքիայի կազմում, իսկ հետո այնպես կանեն, որ ամբողջությամբ դուրս կգանք մեր երկրից ու էլ Հայաստան չի լինի»,-ահազանգում է Խաչիկյանը։

Քաղաքագետի դիտարկմամբ՝ Վաշինգտոնում ու Մոսկվայում տեղի ունեցած հանդիումներում անհամաձայնությունը եղել է, այսպես կոչված, Զանգեզուրի միջանցքի շուրջ, գուցե նաև՝ ադրբեջանցիների «վերադարձի»։

Այն, որ ամեն գնով Ադրբեջանը քայլ առ քայլ իրագործելու է Հայաստան-Արցախը ոչնչացնելու իր ծրագիրը, Խաչիկյանը չի կասկածում։ Նկատում է՝ մենք՝ հայերս, իրական ու վստահելի դաշնակից չունենք ներկա պահին․ Ռուսաստանն ու Արևմուտքը պատերազմի մեջ են և ամեն մեկն իր հերթին ձգտում է ինքը դառնալ, այսպես կոչված, խաղաղության պայմանագրի «քավորը»։

«Ռուսաստանը որոշ դեպքերում աջակցում է մեզ, որոշ դեպքերում՝ ոչ։ Նրա նպատակը տարածաշրջանում մնալն է՝ Հայաստանի ու Ադրբեջանի վրա ազդեցություն պահպանելով։ Արևմուտքը ցանկանում է, որ Հայաստանը զիջումներ անի, հայերը հանձնվեն, ՌԴ-ն դուրս գա այս տարածաշրջանից, բայց զավեշտալին այն է, որ ոչ մեկը չի խոսում Արցախում էթնիկ զտման մասին»,-ասում է քաղաքագետը։
Խաչիկյանը նշում է՝ Ադրբեջանը շարունակելու է ռուս խաղաղապահների ներկայությամբ Արցախում էթնիկ զտում անել․ գյուղ առ գյուղ վերցնելու է ու հայերին ստիպի դուրս գալ իրենց հայյրենի հողից։

«Ռուսներն ուժ չեն կիրառելու, քանի որ չեն ցանկանում առճակատում Թուրքիայի ու Ադրբեջանի հետ, ըստ այդմ՝ էթնիկ զտումը խաղաղապահների ներկայությամբ շարունակվելու է»,-նկատում է քաղաքագետը։

Ստեղծված իրավիճակում հայկական պետությունը փրկելու միակ ելքը, ըստ մեր զրուցակցի, ՀՀ-ում իշխանափոխությունն է։

«Արդեն քաղաքականության հարց չէ, այլ պետությունը փրկելու։ Ներկա իշխանությունը ցույց տվեց, որ չի կարող ապահովել մեր անվտանգությունը, երկիրը հասցրեցին ռազմական ու դիվանագիտական պարտության։ Արդեն հինգ տարի է՝ բան չի փոխվում։ Նոր մարդիկ պետք է գան, որպեսզի փորձեն հանել երկիրն այս վիճակից ու վերականգնել դիվանագիտությունը։ Նախկինում բոլոր թերություններով հանդերձ՝ հաջողվում էր արդյունավետ դիվանագիտություն վարել և լծակներ ունենալ թե՛ Արևմուտքում, թե Ռուսաստանում, իսկ հիմա բացարձակ տապալված ենք, որևէ լծակ չունենք»,-ընդգծում է Արթուր Խաչիկյանը և ավելացնում՝ կան դիվանագետներ, որոնց հնարավարություն պետք է տալ գալ ու փորձել շտկել ներկա անմեղսունակ, անկարող իշխանավորների թույլ տված սխալները։

Աղբյուր` Փաստինֆո