Փաստ ինֆո

ՀՀ վարչապետ Նիկոլ Փաշինյանը գոհ չի մնացել մոսկովյան բանակցություններից։ Այդ մասին նա ասել է այսօր ԱԺ-ում։

«Ընդամենը նախորդ շաբաթ Մոսկվայում տեղի ունեցավ Հայաստան-Ադրբեջան-Ռուսաստան եռակողմ ձևաչափով բանակցային հերթական փուլը: Ես ձեզ պիտի տեղեկացնեմ, որ քննարկման թեմաներից մեկը վերաբերում էր Լեռնային Ղարաբաղում հաստատված հումանիտար իրավիճակին և Լաչինի միջանցքի ապօրինի փակմանը: Այս թեման մենք քննարկել ենք և Ռուսաստանի Դաշնության մեր գործընկերների հետ, և ես չեմ կարող ասել, որ այդ քննարկման արդյունքները գոհացնում են»,- ասել է Նիկոլ Փաշինյանը՝ նշելով, որ դա ցավալի իրավիճակ է:

Նա ընդգծել է, որ Լաչինի միջանցքի փակումը տեղի է ունեցել, ըստ էության, ռուս խաղաղապահների աչքի առաջ և ներկայությամբ, ինչը, իհարկե, բավական մտահոգիչ է:

Մոսկովյան քննարկումների թեմաներից մեկը, ըստ Փաշինյանի, վերաբերել է տարածաշրջանային կոմունիկացիաների բացմանը։ «Մենք պատրաստ ենք շատ արագ այդ կոմունիկացիաների վերաբացմանը՝ երկրների սուվերենության և իրավազորության ներքո: Մենք այս ընդգծումն արել ենք: Մենք հիմա փորձում ենք աշխատել երկաթուղային ենթակառուցվածքների բացման վրա: Բայց նաև ուզում եմ ասել, որ մենք տրամադրված ենք և շահագրգիռ ենք իրականում, որ տարածաշրջանային կոմունիկացիաները բացվեն: Ընդ որում, այստեղ էլ իմ ասած սկզբունքի շրջանակում մենք բավական մեծ ճկունություն ենք ցուցաբերում: Իմ ասած սկզբունքը տարածաշրջանի երկրների սուվերենության և իրավազորության ներքո կոմունիկացիաների բացման մասին է: Ես կարծում եմ, որ մենք այդտեղ բավական ճկուն և կառուցողական դիրքորոշում ունենք և պատրաստ ենք իսկապես գնալ այդ կոմունիկացիաների բացմանը: Եվ համոզված եմ, որ երբ դա տեղի ունենա, ևս մեկ լրացուցիչ խթան կլինի Հայաստանի տնտեսական զարգացման համար: Էլի եմ ասում, ցավոք, այդ հարցի լուծումը միայն մեզնից չէ կախված, այսինքն՝ եթե միայն մեզնից կախված լիներ, վաղուց լուծված կլիներ»,- ասել է Փաշինյանը:

Աղբյուր` Փաստինֆո