Փաստ ինֆո

105 տարի առաջ Սարդարապատում վճռվեց մեր ճակատագիրը՝ այսօրվա իր ասուլիսն այս հիշեցումով սկսեց «Ժառանգություն» կուսակցության նախագահ, ՀՀ  առաջին արտգործնախարար Րաֆֆի Հովհաննիսյանը։

«5 տարի առաջ հայ ժողովուրդը ունեցավ արժանի վերելք, որը պատասխանն էր նախորդ շրջանների սխալների։ Ցավոք, այդ պայքարը, որ պատկանում էր ժողովրդին, սեփականաշնորհվեց ու կուսակցականացվեց ու դարձավ մի տեսակի ու մի հոգու սեփականությունը»,-մատնանշեց Րաֆֆի Հովհաննիսյանը, ով հավելեց, որ հիմա՝ 2018-ից 5 տարի անց ունենք աննախադեպ վայրէջք. «Մեր իսկ ձեռամբ պետականությունը կորցնելու իրական հնարավորություն ունենք։  Ինքը (Նիկոլ Փաշինյանը/ խմբ.) բաեցեիբաց խոստովանում է, որ գիտակցաբար հանձնում է ինքնիշխան տարածքներ»։

Րաֆֆի Հովհաննիսյանը նկատում է, որ պետական մարմիններում կան այս ամենի հետ անհամաձայնություններ, բայց դիմադրություն չեն ցուցաբվերում. «Պետական մարմինները քայլ չեն կատարում։ Կան նորմալ, հայրենասեր սպաներ, բայց ձայն կա՞ նրանցից»։

Հովհանիսյանի խոսքով՝ Սարդարապատի ազատամարտի ժամանակ 105 տարի առաջ բոլոր կուսակցությւնները վայր դրեցին կուսակցական գլխարկներն ու միասին պահեցին Հայաստանը. «Պատերազմ է գալու՝ խաղաղության պայմանագիր կոչես, թե ինչ։ Այս մարդը ամեն ինչ տալու է և բերելու է պատերազմ, իսկ մենք ի՞նչ ենք անում»։

Քաղաքական գործիչը հորդորում է չհավատալ իշխանությունների այն հայտարարություններին, թե իրենք առաջին անգամ բաց ու թափանցիկ ժողովրդի հետ խոսող ուժն են կամ միակ ռեալիստներն են. «Իրենք ինչ խոսում են, իրենց իշխանության, իրենց ինքնապաշտպանության համար են ասում։ Մեր նախկին իշխանավորները ունեցել են սխալներ, արատներ, ես էլ քննադատել եմ, բայց նրանցից որևէ մեկը Արցախը չի հանձնել այդպես, մեր պետական սահմանը չի խախտել այդպես»։

Հովհաննիսյանը կարծում է, որ ներկայիս իշխանավորները պատրաստ են վաճառել հայրենիքը, միայն թե իրենք մնան իշխանության. «Ոչ թե երկիրը ուզում են միացնել, որ դիմակայեն պատերազմին, այլ շարունակել պառակտելը՝ միայն թե իրենք մնան։ Ուզում են Հայաստանը դարձնել հաշմանդամ պետություն՝ այն հանձնելով թշնամուն»։ 

Աղբյուր` Փաստինֆո