Փաստ ինֆո

Նիկոլ Փաշինյանի ողջ գործունեությունը՝ սկսած հատկապես 2020թ․ նոյեմբերի 9-ից, ուղղված է հայ ժողովրդի դիմադրողականությունը կոտրելուն։ Արդեն գրեթե ամենօրյա ռեժիմով նա հարձակում է գործում Հայաստանի լեգիտիմության, հայկական ինքնության, մեր խորհրդանիշների վրա։ Ժողովուրդը պետք է հասկանա, որ խնդիրն Արցախը չէ․ Արցախի հանձնումը, որին հետևողականորեն տանում է ՀՀ ղեկավարությունը, Հայաստանը ոչնչացնելու մեծ ծրագրի մի փուլն է․ արտաքին ուժերը, որոնք մշակել ու հովանավորում են Փաշինյանի կողմից տարվող ՀՀ ոչնչացման ծրագիրը, շատ լավ գիտեն, որ Արցախը Հայաստանի աջ բազուկն է, անվտանգային համակարգի անքակտելի բաղադրիչը։ «Փաստինֆո»-ի հետ զրույցում նման համոզմունք հայտնեց ռազմական պատմաբան Արմեն Այվազյանը։

«Փաշինյանը երեկ հայտարարեց, թե, իբր, մենք տնվոր ենք այստեղ։ Նման բան ասում են մեկ էլ Ադրբեջանն ու Թուրքիան։ Այդ մարդը (նկատի ունի Փաշինյանին,-խմբ․) հանգիստ ասում է, որ այն պետությունները, որոնք մեզ ուզում են այստեղից վռնդել, դա անելու են, եթե Արցախը չտանք, անկլավները չտանք, մեր հերոսների արձանները տեղադրենք․․․ Հասկանո՞ւմ եք, ինքը կապ չունի հայ ժողովրդի հետ, օտար մարմին է․․․ Փաշինյանը կոլլաբորացիոնիստ է՝ մարդ, ով համագործակցում է թշնամու հետ, սպասարկում նրանց շահերը։ Բազմիցս եմ ասել այդ մասին ու նորից կրկնում եմ․․․ Մեծ տերությունների հովանավորությամբ՝ քայլ առ քայլ իրականացվում է Հայաստանի ոչնչացման ծրագիրը»,-ահազանգում է Այվազյանը։

Երկրի պետական, ազգային շահերի դեմ իրականացվող գործունեության համար ղեկավարին հեռացնելու տարբեր եղանակներ կան, ըստ մեր զրուցակցի, որոնց շարքում ժողովրդական ապստամբությունը երկրորդական, երրորդական տեղում է, իսկ ստեղծված իրավիճակում՝ շատ քիչ հավանական։

«Այս հարցը պետք է լուծվի պետական մակարդակով կամ քաղաքական ընդդիմության միջոցով։ Պետական ինստիտուտները չեն աշխատում, չինովնիկները համակերպվում են կատարվողի հետ, որովհետև իրենք էլ են վարակված դրանով․․․ Թույլ են տալիս, որ երկիրը վերջնականապես անդունդում հայտնվի, իսկ ընդդիմությունն ամենավճռորոշ պահերին հրաժարվում է գործել, անհետանում է․․․

Ամենամեծ խնդիրը դա է՝ հանդուժողականությունը։ Իսկ ո՞ւր են, ինչի՞ համար են իրավապահ մարմինները, եթե պետության ղեկավարն ոտնահարում է երկրի օրենսդրությունը՝ խախտում է Սահմանադրությունը, ԳԽ որոշումը, Անկախության հռչակագիրը։ Ամեն ինչ պետք չի բարդել ժողովրդի վրա, ի վերջո, ժողովրդի շնորհիվ է, որ Հայաստանի հանրապետություն դեռ գոյություն ունի․ ժողովուրդը 1988-ից պարբերաբար փողոցում է․․․Հիմա մարդիկ քայքայված, հուսախաբ վիճակում են»,-նշում է ռազմական պատմաբանը։

Այվազյանը լիովին համոզված է՝ եթե Փաշինյանին ու իր աջակիցներին հաջողվի հանձնել Արցախը, ապա սարսափելի դժվարանալու է ՀՀ-ի պաշտպանությունը։ Մի քիչ հույս, որ վերջնական կործանումից առաջ ինչ-որ ձևով կանխվելու է Արցախի ու, այսպես կոչված, անկլավների հանձնումը, Այվազյանը դեռ ունի, բայց շեշտում է՝ անասելի արագությամբ ենք գնում դեպի անդունդ․ անհապաղ գործել է պետք։

Աղբյուր` Փաստինֆո