Փաստ ինֆո

Արցախյան երրորդ՝ 44-օրյա պատերազմում մարտադաշտն ինքնակամ լքելու մեջ մեղադրվող հրամանատար Իշխան Վահանյանը կշարունակի մնալ կալանավորված։ Երևանի ընդհանուր իրավասության դատարանը՝ դատավոր Ջոն Հայրապետյանի նախագահությամբ, մերժեց Իշխան Վահանյանի նկատմամբ ընտրված խափանման միջոց կալանավորումն անազատության հետ կապ չունեցող խափանման միջոցով փոխարինելու մասին Վահանյանի միջնորդությունը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Ջոն Հայրապետյանի նախագահությամբ, այսօր շարունակվել է Իշխան Վահանյանի գործով դատաքննությունը։ Դատական նիստում հարցաքննվել է տուժող Արսեն Այվազյանը։ Նրա ցուցմունքից հետո նախագահող դատավորը հայտնեց, որ Իշխան Վահանյանը գրությամբ դիմել է դատարանին՝ խնդրելով իր նկատմամբ ընտրված խափանման միջոց կալանավորումն անազատության հետ կապ չունեցող խափանման միջոցով փոխարինելու մասին։ Վահանյանը նշել է, որ արդեն երկու տարի է, ինչ կալանքի տակ է, դատաքննությունն արդեն տևական ժամանակ է, ինչ ընթանում է, այս ընթացքում հարցաքննվել են վկաների և տուժողների մեծ մասը, արդեն հետազոտվել է գործով ապացույցների մեծ մասն արդեն հետազոտվել է։ Վահանյանը վստահեցրել է, որ որևէ մտադրություն չունի խոչընդոտելու գործի քննությանը, պատրաստ է մանրամասն ցուցմունք տալ, 20 տարվա զինվորական է, ունի երեխաներ, հայրը հիվանդ է։ Վահանյանը խնդրել է իր նկատմամբ որպես խափանման միջոց ընտրված կալանավորումը վերացնել, ընտրել անազատության հետ կապ չունեցող որևէ այլ խափանման միջոց, պատրաստ է գրավ վճարել։ Դատախազ Գևորգ Ավետիսյանը դիրքորոշում հայտնեց՝ նշելով, որ նախաքննության ընթացքում մտավախություն կար, որ գործով անցնող վկաներն ու տուժողները հիմնականում եղել են Իշխան Վահանյանի ենթակաները։

«Ընդամենը հարցաքննվել են տուժողներից 3-4 զինծառայող, մյուս տուժողները չեն հարցաքննվել, ունենք դեռևս չհարցաքննված վկաներ և որևէ օբյեկտիվ պատճառաբանություն, որ նշված կլիներ դիմումում՝ Վահանյանի կողմից չեն բերվել, որով կարող ենք փաստել, որ, եթե խափանման միջոցը փոխվի այլ խափանման միջոցով, Վահանյանը չի կարող ազդեցություն ունենալ»,- նշեց դատախազը։
Վահանյանի պաշտպան Սիրանուշ Հարությունյանը միացավ իր պաշտպանյալի դիրքորոշմանը՝ նշելով, որ դեռևս հայտնի չէ, թե ինչքան կտևի քննությունը, գրավը կարող է հանդիսանալ այն երաշխիքը, որը կարող է լինել որպես պատշաճ վարագծի երաշխիք։

Դատարանը խորհրդակցական սենյակում որոշում կայացրեց՝ միջնորդությունը մերժելու մասին։
Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ:

Նշենք, որ այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո