Փաստ ինֆո

Երեկ երեկոյան Մարտունու շրջանի Կարմիր Շուկա, Թաղավարդ ու Հերհեր համայնքներում առնվազն 10 րոպե ինտենսիվ կարկուտ է տեղացել։ Պնդուկի մեծությամբ կարկուտը քշել, տարել է սածիլները, ջարդել կարտոֆիլի տնկիներն ու մերկացրել բողբոջած ծառերը։

«Ամեն ինչից ցանել էի՝ վարունգ, լոլիկ, կաղամբ, կարտոֆիլ․․․ Լրիվ ջարդել է կարկուտը, մի հատ սածիլ չի մնացել․․․Ջերմոց ունեմ, էնտեղ էի աճեցրել սածիլները, բոլորին բաժանել, հիմա իմը լրիվ փչացրեց կարկուտը, բայց դե, ինչ արած, նորից կաճեցնեմ, հարևաններս էլ կտան, էլի կդնեմ։ Հարևանների այգիներն էլ սպիտակել էր կարկուտից»,- «Փաստինֆո»-ի հետ զրույցում ասում է Կարմիր Շուկայի բնակիչ Նունե Շահրամանյանը։

Տիկին Նունեն ասում է՝ ամեն տարի էլ հող են մշակել, ուղղակի այս տարի սովորականից ավել էին ցանել․ շրջափակումն է ստիպել ոչ մի կտոր հող անմշակ չթողնել։

«Թութը համարյա հասել էր, էն էլ լրիվ փչացրեց կարկուտը․․․ Որ էդքան խոշոր չլիներ, այսքան վնաս չէր տա»,-ասում է տիկին Նունեն ու ավելացնում՝ ոչինչ չի խանգարում, որ նորից ցանենք․ էլի կհասցնենք, բերք կստանանք։

Թշնամին մի կողմից, բնությունը՝ մյուս, թեև փորձում են կոտրել մեր հայրենակիցներին, չի ստացվում։ Կարմիր շուկայի բնակիչը վստահեցնում է՝ ինչպես ապրում էին՝ հող մշակելով, անասուն պահելով, նույն կերպ էլ շարունակում են, թեկուզ ադրբեջանցիները մի քանի հարյուր մետր հեռավորության վրա դիրքավորված են արդեն ավելի քան 2,5 տարի։

Աղբյուր` Փաստինֆո