Փաստ ինֆո

Ես երդվյալ ատենակալների ձեւաչափով կարող եմ ապացուցել, որ երբեք որեւէ մեկին Հայաստանի Հանրապետության տարածքով միջանցք չեմ խոստացել, ոչ էլ թույլ եմ տվել, որ նման տպավորություն ստեղծվի։ Ես կարող եմ ապացուցել, եւ դրան որեւէ առարկություն չի կարող լինի։ Այլ հարց, որ ես չպետք է ապագաղտնիացնեմ իմ որոշումները, սակայն եթե ընդդիմադիրները քննիչ հանձնաժողովում ասեն՝ չէ, դու խոստացել ես, ես մի քիչ կդիմադրեմ, բայց երբ շարունակեն, իմ ձեռքով կապագաղտնիացնեմ եւ կապացուցեմ։ Այս մասին կառավարության հետ հարցուպատասխանի ընթացքում ԱԺ-ում հայտարարեց Նիկոլ Փաշինյանը։

Փաշինյանն արձանագրեց, թե Ադրբեջանի արևմտյան շրջանների և Նախիջևանի միջև կոմունիկացիայի առանձին օրակարգ պարզապես գոյություն չունի։

Ըստ նրա՝ դա հարց է, որը տեղավորվում է տարածաշրջանային կոմունիկացիների բացման շրջանակում, որտեղ արձանագրվում է, որ այդ հաղորդակցությունը Հայաստանի Հանրապետությունը պատրաստ է ապահովել, ինչը շատ կարևոր արձանագրում է։
«Մենք փոխադարձաբար պայմանավորվել ենք բացել տարածաշրջանային կոմունիկացիաները։ Նաև կա նոր ենթակառուցվածքների կառուցման գաղափար։ Հայաստանը նման ենթակառուցվածքներ կառուցելու պարտավորություն չունի։ Հայաստանը կարող է դիտարկել այդ տարբերակը ևս։ Եթե համաձայնի Հայաստանը, այդ տարբերակը կկիրառվի, իսկ Հայաստանը կհամաձայնի այն դեպքում, երբ տեսնի, որ տարածաշրջանի ինտեգրման, փոխշահավետության ֆոն է ստեղծում։ Այդ ճանապարհները պետք է գործեն սուվերենության եւ իրավազորության ներքո»,- նշեց Փաշինյանը։

Բացի այդ, Փաշինյանի գնահատմամբ, կա նաև Հայաստանի հյուսիսային և հարավային հատվածներն իրար կապող երկաթուղին գործարկելու խնդիր կա․ միակ երկաթուղին անցում է Նախիջևանի տարածքով։

«Մեղրին և Այրումն իրար կապող բոլոր հնարավոր երկաթուղիներն անցնում են Ադրբեջանի տարածքով։ Նույն սկզբունքով, որով Երասխը կկապվի Մեղրիին, նույն սկզբունքով Հորադիզը կկապվի Օրդուբադի հետ։ Մենք պատրաստ ենք վերակառուցել երկաթուղին, Բրյուսելում մենք եկել էինք դրա պայմանավորվածությանը, սակայն երբ եկավ իրավական մասը, Ադրբեջանը հրաժարվեց ստորագրությունից։ Ես ասացի՝ ստորագրում եմ, Ադրբեջանը չստորագրեց»,- ընգդծեց Փաշինյանը։

Աղբյուր` Փաստինֆո