Փաստ ինֆո

Ադրբեջանն ասում է` եթե դուք մեր տարածքային ամբողջականությունը չեք ճանաչում, մենք էլ ձեր տարածքային ամբողջականությունը չենք ճանաչում։ Այսինքն՝ եթե դուք չեք ճանաչում, որ Ադրբեջանը 86,600 քառակուսի կիլոմետր է, ուրեմն՝ մենք էլ չենք ճանաչում, որ Հայաստանը 29,800 քառակուսի կմ է: Երբ որ Ադրբեջանը շարունակաբար հարձակվում է Հայաստանի վրա ու միջազգային հանրության հետ մենք երկխոսություն ենք ունենում, նրանք էլ ասում են` Հայաստանն էլ մեր տարածքային ամբողջականությունը չի ճանաչում, ինքն էլ մեր վրա է հարձակվել կամ հարձակվում։ Այս մասին ԱԺ-ում հարցուպատասխանի ընթացքում հայտարարեց Նիկոլ Փաշինյանը։

Նրա խոսքով՝ եթե չենք ճանաչում Ադրբեջանի տարածքային ամբողջականությունը, ու եթե նա հարձակվի մեր վրա, ՀԱՊԿ-ը կգա ու կկանգնի մեր կողքը, ՀԱՊԿ-ն էլ հարձակումների ժամանակ ասում է` այո, կգամ ձեր կողքը կկանգնեմ, բայց 30 հոգի շատ ուժեղ դիտորդ կուղարկեմ:

«Հիմա մենք պետք է որոշում կայացնենք: Շատ լավ, մենք կարող ենք ասել, որ չենք ճանաչում Ադրբեջանի տարածքային ամբողջականությունն ու, մեր կարծիքով, Ադրբեջանը ոչ թե 86,600 քառակուսի կիլոմետր է, այլ՝ 45,7 հազար քառակուսի կիլոմետր, իրենք էլ կասեն`շատ լավ, ուրեմն՝ Հայաստանը ոչ թե 29,800 քառակուսի կմ է, այլ` 8700 քառակուսի կիլոմետր: Ես, այո, հիմա այս ամբիոնից հայտարարում եմ, որ Հայաստանը վերահաստատում է Բրյուսելում արձանագրված պայմանավորվածությունը, որ ՀՀ-ն ճանաչում է Ադրբեջանի տարածքային ամբողջականությունը ու ակնկալում, որ Ադրբեջանն էլ կվերահաստատի, որ ճանաչում է ՀՀ տարածքային ամբողջականությունը»,- նշեց նա:

Նա ընդգծեց` հիմա նրանք, ովքեր ասում են, որ Ադրբեջանը 86,600 քառակուսի կիլոմետր չէ, այլ «-X» թիվ է, միևնույն ժամանակ ասում են, որ ՀՀ-ն 29,800 քառակուսի կմ չէ, այլ «-X» ինչ-որ թիվ է. «Ինչ թիվ է, դա էլ կորոշվի նրանից, թե ՀԱՊԿ-ում այդ օրն ինչ տրամադրություն է տիրում»,- հայտարարեց Փաշինյանը:

Նա նշեց, թե մեր դիրքորոշումն այն է, որ հիմք պետք է վերցնենք Խորհրդային Միության քարտեզները։
«Հիմք պետք է ընդունել Խորհրդային Միության գլխավոր շտաբի 1975 թվականի քարտեզները։ Երևանի այս դիրքորոշումն աստիճանաբար ընդունվում է միջազգային գործընկերների կողմից»,- հայտարարեց նա։

Աղբյուր` Փաստինֆո