Փաստ ինֆո

Հաստատում եմ, որ կա ըմբռնում, որ մոլորվելու հետևանքով հակառակ կողմում հայտնված քաղաքացիները, ծառայողները պետք է հեշտացված կարգով հետ վերադառնան, բայց նաև հաստատում եմ, որ այս պահի դրությամբ Հայաստանում մոլորված լինելու հետևանքով ՀՀ հայտնված ադրբեջանցիներ չկան։ Այս մասին լրագրողների հետ զրույցում ասաց Նիկոլ Փաշինյանը՝ անդրադառնալով հարցին, թե արդյո՞ք Ադրբեջանը կարող է առաջ քաշել ապրիլին ՀՀ սահմանն ապօրինի հատած ադրբեջանցիների արտահանձման հարցը, որոնցից մեկը նաև սպանության մեջ է մեղադրվում։

«Այսինքն՝ բոլոր ադրբեջանցիները, որոնք այս պահին Հայաստանում են, նրանք իրենց որոշմամբ հատել են ՀՀ սահմանը՝ իմանալով, որ հատում են ՀՀ սահմանը։ Ես հաստատում եմ, որ մոլորված անձինք, ցանկացած ադրբեջանցի, որը մոլորված լինելու հետևանքով կհայտնվի ՀՀ-ում, հեշտացված կարգով հնարավորինս արագ կհայտնվի Ադրբեջանում, բայց այս պահին նման ադրբեջանցիներ չկան ՀՀ-ում»,- ասաց Փաշինյանը։

Պատասխանելով հարցին, թե հնարավո՞ր է ՀՀ սահմանը հատած ադրբեջանցի զինծառայողների արտահանձնում, Փաշինյանն ասաց. «Հարաբերությունների կարգավորումը շատ բարդ ու կարևոր որոշումների կայացում է, բայց դա միակողմանի չի կարող լինել։ Այո, մենք պատրաստ ենք քննարկել, իհարկե իրավական ընթացակարգերը անցնելուց հետո։ Չենք կարող անտեսել, որ ՀՀ քաղաքացի է սպանվել, չենք խախտում նաև որևէ մեկի անմեղության կանխավարկածը։ Նախաքննության փուլում է, եթե չեմ սխալվում, հարցը։ Դատարանը որոշում կկայացնի, որից հետո իրավական ընթացակարգերը հնարավոր են համարում տարբեր լուծումներ»։

Աղբյուր` Փաստինֆո