Փաստ ինֆո

Երրորդ գիշերն է՝ անց ենք կացնում Կառավարության շենքի մոտ՝ բացօթյա։ Գիշերը շատ ցուրտ է լինում, երեկ երկու-երեք անգամ հորդառատ անձրևի տակ էինք՝ առանց վրանի, թույլ չեն տալիս վրանից օգտվելու։ Ինչ էլ, որ լինի՝ գտնվելու ենք այստեղ, որ հասարակության ուշադրությունը բևեռենք, որ համալրեն մեր շարքերը, որ մեր ձայնն ավելի լսելի լինի կառավարությանը։ Այս մասին լրագրողների հետ զրույցում ասաց Արցախյան երրորդ՝ 44-օրյա պատերազմում զոհված զինծառայող Ժորա Սահակյանի հայրը՝ Վահիդ Սահակյանը։

«Մայիսի 20-ին՝ դատարանի կողմից անսպասելի Գայանեի կալանավորման որոշումն ընթերցելուց հետո հայտարարեցինք, որ անժամկետ նստացույց ենք անելու՝ հենց կառավարության շենքի դիմաց, հենց Նիկոլի աչքի առաջ, որ ամեն անգամ շենք մտնելուց և շենքից դուրս գալուց իմանա, որ ծնողներս պահանջատեր ենք, պահանջում ենք, որ օր առաջ Գայանեն լինի ազատության մեջ»,- նշեց նա՝ հավելելով, որ Գայանեի մեղադրանքը, գործն ամբողջությամբ շինծու է, մեկ մարդու ցուցումով պահանջել են կալանավորել, այժմ Գայանեն գտնվում է «Աբովյան» ՔԿՀ-ում, արդեն երկրորդ օրն է։

Հարցին՝ արդյոք ՔՊ-ից որևէ մեկն այս երկու օրերին այցելել են իրենց, Սահակյանը նշեց, որ այդ կուսակցության անդամներին հայ չի համարում։

«Եթե դուք այստեղ լինեք մեզ հետ գիշերվա ժամը 2-ին կամ 3-ին, նույնիսկ աշխարհը կզարմանա այն վիճակին, այն պայմաններին, որում մենք ենք գտնվում։ Որևէ մեկն առ այս պահը չի ժամանել»,- նշեց նա՝ հավելելով, որ ՄԻՊ կառույց չունենք, ոչ ոք չի մոտեցել՝ բացառությամբ այն պատգամավորների, որոնք առաջին օրվանից, առաջին վայրկյանից այստեղ են եղել։

Աղբյուր` Փաստինֆո