Փաստ ինֆո

Մենուա Սողոմոնյանը պնդում է՝ իր նկատմամբ իրականացվող հետապնդումը քաղաքական է, սա գործող իշխանությունների կողմից քաղաքական օպոնենտների նկատմամբ հետապնդումներ իրականացնելու հերթական դրսևորումն է։

Նշենք, որ Մենուա Սողոմոնյանին մեղադրում են պաշտոնեական դիրք չարաշահելու, կոռուցպիոն սխեմայի մեջ լինելու, հովանավորչությամբ զբաղվելու հատկանիշներով, ինչի առնչությամբ Մայր բուհին՝ ԵՊՀ-ն, պատճառվել է 5.7 մլն դրամի վնաս։ Քրեական գործի համաձայն՝ 2016թ մայիսին ԵՊՀ նորակառույց հյուրերի տան համար հայտարարվել է գնման մրցույթ՝ «Գնումների մասին» օրենքի ընթացակարգերի համաձայն, որի արդյունքում ձեռք է բերվել կենցաղային տեխնիկա, էլեկտրական սարքեր, տեխնիկա և այլն։

«Հյուրատունը պետք էր կահավորել և գործի գցել հրատապ կարգով, որովհետև այն ժամանակ ունեինք շատ այցելուներ, գործընկերներ, որոնք պետք է գային՝ համալսարանի տարբեր ծրագրերի շրջանակներում թեմաներով և այլն։ Այդ ամենը ձեռք է բերվել։ Օրենքի համաձայն՝ կազմվել է գնման գնահատման մրցութային հանձնաժողով, հայտարարել է բաց հրապարակային մրցույթ, այն մրցակիցը, որը առաջարկել է ավելի ցածր գումար, հաղթել է և իրականացրել մատակարարումը»,- մանրամասնեց Սողոմոնյանը՝ հավելելով, որ 2018թ հեղափոխությունից հետո ՊՎԾ-ն մեծ անձնակազմով մտավ ԵՊՀ և 5 ամիս շարունակ ուսումնասիրություններ իրականացրեց չարաշահումներ հայտնաբերելու կապակցությամբ, ամպագորգոռ թվեր հայտարարվեցին. «Այս ուսումնասիրությունների մեջ, ինչպես բանից պարզվում է, հայտնվել է հետևյալ գործը, իբրև թե այն կազմակերպությունը, որը մատակարարվել է էժան գնով, ձեռք է բերել և մեջը աշխատել է գումար՝ 5.7 մլն-ի չափով, դրա մեջ գնման հանձնաժողովի անդամները, այդ թվում՝ ես ունենք որոշակի մասնակցություն»։

Մենուա Սողոմոնյանը, զերծ մնալով մանրամասնել գործի իրավական, դատավարական դետալների մեջ, նշեց, որ գործը դատարանում է և ինքը լիահույս է, որ դատարանում ամեն ինչ վեր է հանվելու և ինքն արդարացվելու է։

«Իրականացվողն իմ նկատմամբ քաղաքական հետապնդում է։ Վերջին մեկ տարվա ընթացքում սա հարուցված երկրորդ քրեական գործն է իմ նկատմամբ»,- նշեց նա՝ հավելելով, որ նախորդ քրեական գործը հարուցվել էր «ուսապարկերի» ակցիայից հետո՝ վիրավորանքի հատկանիշներով, ինչը կարճվեց հանցակազմի բացակայությամբ, այդ ժամանակ իրեն առաջարկել են, որ գործը կարճվի համաներման հիմքով, ինչն ինքը մերժել էր, պնդել, որ գործը մտնի դատարան և ինքն արդարացվի։

«Նախորդ տարի, երբ սկսվեց իմ գործունեության ավելի ռադիկալ փուլը, երբ դուրս եկանք փողոց և սկսեցինք պայքարել գործող իշխանությունների հանձնվողական քաղաքականության դեմ, ինձ հրավիրեցին ՔԿ և հայտնեցին այս գործի մասին։ Բնականաբար, ես ասացի, որ սա աբսուրդ է, մոտ մեկ ամիս առաջ էլ ինձ ասացին, որ մեղադրանք են ներկայացնում»,- ասաց Մենուա Սողոմոնյանը։ Նրա խոսքով՝ իր նկատմամբ իրականացվող քաղաքակամ հետապնդման նպատակն իրեն ահաբեկելն է, վախեցնելը, լռեցնելը և հետ պահելն է հանձնվողական օրակարգի դեմ պայքարի գործից, ինչը միայն իր նկատմամբ չի տեղի ունենում։

«Այս կարևորագույն փուլում, երբ գործող իշխանություններն արդեն բացահայտ կերպով հայտարարում են Ադրբեջանի տարածքային ամբողջականությունը՝ Խորհրդային Ադրբեջանի սահմաններում ճանաչելու, ինչը ենթադրում է Արցախը մաս կազմել Ադրբեջանի, իրենց համար շատ կարևոր է դիմադրության բոլոր օջախները կոտրել այսպիսի ահաբեկչության, վախի մթնոլորտ ստեղծելու միջոցներով»,- նշեց նա՝ հավելելով, որ սա ուղղված է նաև Համալսարանի մյուս գործընկերներին, առողջ ուժերին, որ լռեն։

Աղբյուր` Փաստինֆո