Փաստ ինֆո

«Այն, որ Ազգային ժողովի նախագահի հայտարարության մեջ Արցախի նախագահի հրաժարականի պահանջ չկա, սա հստակ է։ Կա հստակ պահանջ՝ ստեղծելու Պաշտպանության Պետական Կոմիտե, ինչպես նաև հնչել են անուններ, որոնց նախագահ Հարությունյանը պետք է ներառի այդ կոմիտեի կազմի մեջ։ Ահա այս պահանջը չկատարելու պարագայում, Ազգային Ժողովի նախագահը պահանջելու է նախագահ Արայիկ Հարությունյանի հրաժարականը»,- «Փաստինֆո» լրատվականի հետ զրույցում ասում է Արցախի Ազգային Ժողովի ընդդիմադիր «Արդարություն» դաշինքի պատգամավոր Մետաքսե Հակոբյանը։

Հիշեցնենք, որ այսօր Արցախի ԱԺ նախագահ Արթուր Թովմասյանը ԱԺ հերթական նիստի ժամանակ հանդես էր եկել հայտարարությամբ, որով դիմել էր Արցախի նախագահ Արայիկ Հարությունյանին. «Պարո´ն նախագահ, ես երբեք չեմ խառնվել Ձեր գործերին, դուք էլ ՝Ազգային ժողովի: Ես մոդել եմ առաջարկել, որը հետևյալն է՝ ոչ թե ամորֆ մարմին եմ առաջարկել, այլ այն մարմինը, որը մեզ փրկել է 90-ականներին, այն է՝ պաշտպանության պետական կոմիտեն: Ես երկրի նախագահին առաջարկել եմ այդ կազմում երկու մարդու ընդգրկել ՝Ռուբեն Վարդանյանին և Սամվել Բաբայանին: Ես չգիտեմ նրանց կարծիքը, շատ հնարավոր է, որ հրաժարվեն: Ինչո՞ւ , հարցեր մի տվեք: Պարո´ն նախագահ, եթե այդ մոդելը չաշխատեց, հիմա կարող է առաջին անգամ որևէ անձի ցավ պատճառեմ:

Հրաժարականի դիմում ներկայացրեք, պարո´ն Նախագահ, կամ դրեք ձեր վստահության հանրաքվեն: Եթե ժողովուրդը չի վստահում, որ ընտրվել եք, ապա կհեռանաք»:

Ազգային Ժողովի նախագահի հայտարարությունն անակնկալի է բերել Արցախի ԱԺ-ի ընդդիմադիր դաշինքի պատգամավորներին, ասում է Մետաքսե Հակոբյանը և հավելում՝ երկար ժամանակ չունեցան քննարկելու հրաժարականի մասին հայտարարությունը, սակայն մի բան պարզ է՝ չի բացառվում, որ սա, նույնպես, Արայիկ Հարությունյանի հերթական նախաձեռնություններից մեկն է, որով վերջինս նպատակ է հետապնդում պառակտում մտցնել ներքաղաքական դաշտում. «Այն, որ Ազգային Ժողովի նախագահ Արթուր Թովմասյանն ու Արայիկ Հարությունյանը նույն թիմի ներկայացուցիչներ և համախոհներ են, սա ամեն տեսակի քննարկումներից և կասկածներից վեր է։ Հետևաբար, հանկարծ, հանդես գալ նախագահի հրաժարականի մասին հայտարարությամբ, ինչպես արդեն ասեցի, մեղմ ասած, անակնկալ էր։ Մենք, արդեն, երեք տարի է՝ պահանջում ենք Արայիկ Հարությունյանի հրաժարականը, ընդ որում՝ այդ պահանջի հիմքում շատ ավելի լուրջ և ծանրակշիռ հիմքեր կան, ինչպիսին օրինակ՝ Արայիկ Հարությունյանի անկարողությունն է՝ պահելու Արցախի տարածքային ամբողջականությունն ու բնակչության անվտանգությունը, նա չունեցավ բավարար կամք՝ հակառակվելու Հայաստանի արցախակործան և հայակործան ծրագրերի իրականացմանը։ Ստացվում է, որ այդպիսի պահանջներն, այդպես էլ, չբավարարվեցին և հիմա, հանկարծ, Արցախի ԱԺ նախագահը որոշել է, որ, եթե Արայիկ Հարությունյանը չստեղծի ՊՊԿ և այնտեղ չներառի ինչ – որ մարդկանց, ապա պահանջելու է նրա հրաժարականը»։

Մետաքսե Հակոբյանը նկատում է՝ ժամանակ է պետք հասկանալու, թե ի՞նչ հերթական խաղ են մտածել Արցախի իշխանութունները, որովհետև խայտառակ պատերազմից հետո Արցախի քաղաքական վերնախավն արել և անում է հնարավոր ու անհնար ամեն քայլ, ամեն գնով պահելու իշխանությունը։ Եվ հիմա, հանկարծ, Արայիկ Հարությունյանի համախոհ հանդիսացող Ազգային Ժողովի նախագահ Արթուր Թովմասյանը խոսում է նրա հրաժարականի պահանջների մասի՞ն …սա, մեղմ ասած, տրամաբանական չէ՞, ասում է պատգամավորը։

Հարցին՝ արդյո՞ք սա, նույնպես, Սամվել Բաբայանի տապալված վերջին արշավը փրկելու փորձ չէ, որով Բաբայանն Արցախի փողոց հանելով ընդամենը 1000 մարդ, պահանջում էր իշխանութուններից պետնախարարի պաշտոնում նշանակել իրեն, փորձելով ներկայացնել սեփական ցանկությունն, իբրև, հանրային պահանջ, Մետաքսե Հակոբյանը նկատում է՝ սևեռվելով միայն Սամվել Բաբայան պրոյեկտի վրա, բաց են թողնվում ոչ պակաս կարևոր պրոյեկտներ, որ Արցախում ունի Նիկոլ Փաշինյանը և որոնք այնտեղ բազմաթիվ են։ Դրանց ներդրմամբ, ըստ Հակոբյանի, Փաշինյանը փորձում է ապակայունացնել, թուլացնել կամ, առհասարակ, վերացնել Արցախի դիմադրության օջախները, որոնց գործունեության արդյունքն, արդեն, ակնհայտ երևում է Արցախում։ Այդպիսի պրոյեկտներ Փաշինյանն ունի և՛ Արցախի նախագահականում, և՛ կառավարությունում, դրանք կան, առկան են նաև ինչ- ինչ հասարակական խորհուրդների տեսքով։

Պատգամավորի մեծագույն մտավախությունը, սակայն, այն ենթադրությունն է, որ Ազգային Ժողովի նախագահի կողմից՝ Արայիկ Հարությունյանի հրաժարականի պահանջը կարող է նաև նպատակ հետապնդել՝ պառակտելու Արցախում բուռն ազգային - հասարակական գործունեություն ծավալող նախկին պետնախարար Ռուբեն Վարդանյանի շուրջ ստեղծված մեծ կոնսեսուսը, որի առաջարկած գաղափարների շուրջ, ըստ Մետաքսե Հակոբյանի, այս պահի դրությամբ, համախմբվել են Արցախի փրկության համար պայքարող ամենատարբեր խմբեր, մարդիկ ու կազմակերպություններ, մի կողմ թողնելով իրար մեջ ունեցած այս կամ այն հակասություններն ու անհամաձայնությունները։ Նպատակը մեկն է՝ հաղթահարել Արցախում ստեղծված անհաղթահարելի թվացող գոյաբանական ճգնաժամը, որ կարծես թե, իրականանալի է թվում Վարդանյանի առաջարկած և նրա շուրջ համախմբված մարդկանց միասնականության շնորհիվ։ Սրանով է պատգամավոր Մետաքսե Հակոբյանը մեկնաբանում Ազգային Ժողովի նախագահ Արթուր Թովմասյանի կասկածելի առաջարկը՝ ՊՊԿ-ի ստեղծումն ու դրա կազմում իր իսկ կողմից առաջարկած անձանց, մասնավորապես, Ռուբեն Վարդանյանի և Սամվել Բաբայանի ընդգրկումը։

Աղբյուր` Փաստինֆո