Փաստ ինֆո

«Երբ Իտալիայում արձանագրվեց և առգրավվեց, ավելի քան 800 մլն. եվրո արժողությամբ թմրանյութի ահռելի խմբաքանակը, կարծում եմ, սա ցնցեց Փաշինյանին։ Բնականաբար, նա ոչ մի կերպ չէր ցանկանա, որպեսզի հայ հասարակությունն այս մասին տեղեկացված լինի։ Այնուհետև, ԱԱԾ-ի միջոցով բացահայտվեց նաև, որ Հայաստան է մտել, մոտ 250 մլն. եվրոյի թմրանյութ, այսինքն, մոտ 1 մլրդ. դոլարից ավել գումար կազմող թմրանյութի խմբաքանակ է Հայաստան ուղևորվել։ Ընդ որում՝ Հայաստանը ոչ թե տրանզիտ, այլ, հենց, սպառող երկիր էր հանդիսանալու այդ ապրանքատեսակի համար։ Ստացվում է, որ Հայաստանում, մոտ, 1 մլրդ. դոլարից ավել ստվերային գումար է պտտվում, իսկ այս ամենը՝ թե՛ թմրամիջոցների այդպիսի խմբաքանակը, թե՛ միլիարդի հասնող գումարը, չէր կարող առանց իշխանության գիտության տեղի ունենալ»,- «Փաստինֆո» լրատվականի հետ զրույցում ասում է քաղաքագետ Երվանդ Բոզոյանը։

Նրա կարծիքով՝ Փաշինյանին խիստ անհրաժեշտ էր, որպեսզի ինչ – որ կերպ այս ամենը ստվերեր և ահա, տեղի ունեցավ Աշոտ Փաշինյանի մասնակցությամբ մի միջադեպ, որը մեծ աղմուկ հանեց և ստվերում թողեց թմրամիջոցների թեման։ Միաժամանակ նկատում է՝ այս թեմայով կարող է միայն ենթադրություններ անել ու ավելացնում՝ որպես քաղաքագետ և քաղաքացի, ճիշտ չի համարում երեխաների թիրախավորումը կամ երեխայի նկատմամբ ատելության գեներացումը, անգամ, եթե այդ երեխան Նիկոլ Փաշինյանի որդին է։

Քաղաքագետը վստահ չէ՝ արդյո՞ք տղայի՝ այդ պահին այդ վայրում հայտնվելը պատահականությա՞ն, թե կանխամտածված քայլերի արդյունք է, սակայն, այն, որ կոկայինի բացահայտումն իր հետ մի քանի տեսակի լուրջ խնդիրներ էր առաջ բերելու, սա կասկածներից վեր է.«Նախ, պարզվելու էր, որ այս իշխանություններն այնքան էլ մաքուր չեն, որքան ջանում են երևալ, հետո, եթե, արդեն իսկ, բացահայտված է 1 մլրդ. դոլարի ստվերային գումարի շրջանառության դեպք, ապա որքա՞ն է կազմում դեռևս թաքուն պահվող ստվերային շրջանառության թիվը։ Սրանով էլ կարող էր բացահայտվել, որ նախկիններին կոռուպցիոն գործարքների մեջ մեղադրող և այդ լոզունգներով իշխանության եկած փաշինյանական պետական համակարգը շատ ավելի կոռումպացված է, քան երբևէ Հայաստանում եղած որևէ իշխանություն։ Ընդ որում, այսօրինակ խայտառակ թվերը բացահայտվում են ոչ թե այստեղ, այլ դրսում՝ Իտալիայում, հետևաբար, Փաշինյանը ոչ մի կերպ չի կարող մեղքը բարդել նախկինների վրա»։

Երվանդ Բոզոյանն այս բացահայտման մեջ նաև ազգային անվտանգային լուրջ խնդիր և մարտահրավեր է տեսնում. «Այս մասշտաբների թմրամիջոցի, այն էլ՝ կոկային տեսակի թմրանյութի ուղղորդումը մեր երկիր, իրենից լուրջ դիվերսիա է ներկայացնում՝ ուղղված հայ ժողովրդի և, մասնավորապես, հայ երիտասարդների դեմ։ Սրանով պատրաստվում են հայ երիտասարդությանը թունավորել կոկայինով և, գրեթե, համոզված եմ, որ այստեղ մեծ դերակատում ունեն նաև արտաքին ուժերը։ Միայն գլոբալ իշխանափոխությունից հետո մենք կիմանաք, թե, իրականում, ի՞նչ մասշտաբների ներգրավվածություն կա այս գործում արտաքին ուժերի կողմից և ի՞նչ մասշտաբների գումարներ են աշխատում այն իշխանավորները, ովքեր ներգրավված են Հայաստանում թմրամիջոցների ներկրման և առևտրաշրջանառության մեջ»։

Անդրադառնալով հարցին՝ ինչո՞ւ, այնուամենայնիվ, երեկ աննկատ անցավ Փաշինյանի բաց և արդեն, անկաշկանդ, սակայն, իրականում, սարսափելի բովանդակությամբ հայտարարությունն այն մասին, որ իրենք, մեկ քայլ առաջ կատարելով՝ ճանաչել են Արցախն Ադրբեջանի կազմում, քաղաքագետ Երվանդ Բոզոյանը պատասխանում է՝ Փաշինյանը վաղուց է հասարակությանը պատրաստել այդ հայտարարությանը, դեռևս 2022 թ. հոկտեմբերի 6-ին՝ Բրյուսելում. «Փաշինյանն, ըստ էության, վախեր չունի՝ բարձրաձայնելու այն մասին, որ Արցախն, այլևս, Ադրբեջանի կազմում է, նա վաղուց դրան պատրաստ է և պատրաստում է նաև հայ հասարակությանը։ Նրա վախերը կարթնանան այլ փուլում, երբ կգա համապատասխան փաստաթուղթը ստորագրման պահը։ Իսկ թե ինչո՞ւ մեզանում այդ սարսափելի լուրն ընդունվեց, ըստ էության, առանց որևէ դիմադրության, սրա պատճառներն այլ տեղում են՝ Հայաստանում քաղաքական դաշտի արմատական փոփոխություն պետք է իրականացնել»։

Աղբյուր` Փաստինֆո