Փաստ ինֆո

Վարչական դատարանում՝ դատավոր Մհեր Պետրոսյանի նախագահությամբ, կայացել է Մուրադ Փափազյանին անցանկալի անձանց ցուցակում ներառելու մասին ԱԱԾ որոշումը վիճարկելու հարցով գործի քննությունը։

Ինչպես արդեն տեղեկացրել ենք՝ Մուրադ Փափազյանը ընտանիքի հետ 2022թ հուլիսի 14-ին ժամանել է ՀՀ, սակայն «Զվարթնոց» օդանավակայանի սահմանային անցման կետում իրավասու աշխատակիցները նրանց թույլ չեն տվել մուտք գործել ՀՀ՝ միայն պատճառաբանելով, թե ինքն ընդգրկված է ՀՀ համար անցանկալի անձանց ցուցակում։

Մուրադ Փափազյանը ստիպված նույն օրն ընտանիքի հետ վերադարձել է Ֆրանսիա։ Ընդ որում, Մուրադ Փափազյանի մուտքը մինչ այդ արգելված էր միայն Թուրքիայում և Ադրբեջանում։ Իրավապահների և պատկան մարմինների կողմից որևէ հոդաբաշխ պարզաբանում այդպես էլ չի տրվել, թե որն է պատճառը Փափազյանի մուքտը ՀՀ արգելելու համար։ ԱԱԾ-ն անգամ հրաժարվել է պատասխանել Մուրադ Փափազյանին և պարզաբանում ներկայացնել, թե որն էր իրեն անցանկալի անձանց ցուցակում ներառելու հիմքը։ Թեև վարչապետի աշխատակազմը պարզաբանում էր ներկայացրել՝ «Արմենպրես» գործակալությանը, համաձայն որի՝ մուտքը Հայաստանի Հանրապետություն արգելվել է՝ հիմք ընդունելով «Օտարերկրացիների մասին» ՀՀ օրենքի 8-րդ հոդվածի «գ» և «զ» կետերը:

«Տվյալ անձը հանդիսանում է նախորդ տարվա հունիսի 1-ին Ֆրանսիայում ՀՀ դեսպանության մոտ վարչապետի գլխավորած կառավարական պատվիրակության՝ ՀՀ պետական դրոշակիր ավտոշարասյան դեմ հարձակում կազմակերպած անձանցից մեկը: Ավտոշարասյան ուղղությամբ նետվել են տարբեր իրեր, առարկաներ: Վարչապետի ՀՀ պետական դրոշակիր ավտոմեքենան ենթարկվել է հարձակման և ստեղծված իրավիճակը հաղթահարվել է միայն ֆրանսիական ոստիկանության և անվտանգության ուժերի ջանքերի արդյունքում: Այդ մասին վկայող տվյալներ հրապարակվել են տարբեր լրատվամիջոցների կողմից, իսկ տեսանյութերն առկա են նաև համացանցում: Ոչ միայն Ձեր կողմից նշված անձի, այլեւ հարձակման ակտիվ մասնակիցների մուտքը Հայաստանի Հանրապետություն արգելվել է: Ընդ որում, Հայաստանի Հանրապետությունը որեւէ վերապահում չունի խաղաղ ակցիաների որեւէ մասնակցի նկատմամբ: Իսկ հարձակումների կազմակերպիչների եւ մասնակիցների մուտքը Հայաստանի Հանրապետություն՝ օրենքով սահմանված կարգով արգելվել է»,- նշել են վարչապետի աշխատակազմից։

Մուրադ Փափազյանն այժմ դատական կարգով պահանջում է պարտավորեցնել ԱԱԾ-ին հանել ՀՀ տարածքում անցանկալի համարվող օտարերկրացիների տվյալների բանկից Փափազյանի տվյալները։

«Փաստինֆո»-ի թղթակցի հաղորդմամբ՝ մինչ հայցի բուն քննությանն անցնելը դատարանը նախ պարզեց ներկայացուցիչների ինքնությունը, որոշում կայացրեց այս վարույթով որպես Մուրադ Փափազյանի ներկայացուցիչ՝ Արծվիկ Մինասյանի լիազորությունները չճանաչել, ինչը պայմանավորված էր տեխնիկական խնդիրներով, այնուհետև, քննարկվեց գործի քննության հրապարակայնության հարցը։ Դատարանը դռնփակ ռեժիմով քննարկեց գործը դռնփակ քննելու հարցը, որը հայցի պատասխանում բարձրացրել էր ԱԱԾ-ն ՝նշելով, որ առկա է պետական գաղտնիք պարունակող տվյալներ, ապա դատարանը որոշեց գործը քննել դռնբաց ռեժիմով, ինչպես նաև ԶԼՄ-ների թույլատրեց հեռարձակում իրականացնել՝ վերապահումով, որ ԱԱԾ ներկայացուցիչները չեն տեսանկարահանվի։

Աղբյուր` Փաստինֆո