Փաստ ինֆո

Ապրիլի 23-ից՝ Լաչինի միջանցքում ադրբեջանական անցակետի տեղադրումից հետո, կրկնակի շրջափակման մեջ հայտնված Շուշիի շրջանի Լիսագոր գյուղում երկար դադարից հետո արևը սկսել է ջերմացնել։ Գյուղապետ Գագիկ Նասիբյանը կատակում է՝ այսօր գյուղում ուրախ տրամադրություն է, եղանակը մեր կողմից է՝ արևը ջերմացնում է․․․

Սեփական օջախներում, թեկուզ պաշարված, լիսագորցիները չեն կոտրվում։ Հույսը, որ արդարությունն ու պայքարելու իրենց վճռականությունն ի վերջո հաղթանակելու են, չեն կորցնում։

«Մենք մեզ հույս տալով ապրում ենք։ Հոգեբանական ճնշումներ են կիրառում ադրբեջանցիները, բայց դե մենք, կարծում եմ, դիմանալու ենք, ինչպես հիմա։Կենդանին որ կենդանի է, չորս պատի մեջ որ գցում ես, երկար չի ձգում, բայց մենք այնքան ուժեղ ենք, որ այս ամեն ինչին դիմանում ենք։ Ճիշտ է, մեր առողջությունը քայքայվում է, բայց դե էս ա»-«Փաստինֆո»-ի հետ զրույցում ասում է Լիսագորի գյուղապետ Գագիկ Նասիբյանը։

Գրեթե մեկ ամսվա ընթացքում Լիսագոր ու կրկնակի շրջափակման մեջ գտնվող Շուշիի շրջանի մյուս երեք գյուղեր սնունդ ու դեղորայք ընդամենը մեկ անգամ է հաջողվել հասցնել՝ խաղաղապահների օգնությամբ։ Բնակիչները խիստ խնայողական ռեժիմի են անցել․ ինչից որքան հնարավոր է՝ տնտեսում են։ա

«Դեռ սնունդ էլ ունենք, առաջին անհրաժեշտության դեղամիջոցներ էլ։ Դե, գյուղում բուժկետ ու բուժքույր էլ կա։ Ծանր հիվանդության դեպքեր, բարեբախտաբար չենք ունեցել, ընդամենը մի հղի ունեինք, իրեն էլ նախօրոք տեղափոխել ենք Ստեփանակերտ, որ ապահով լինի։ Մնացածն իրենց առօրյայով փորձում են ապրել՝ դաշտ են մշակում, անասուն պահում․․․»,-ասում է Նասիբյանն ու հավելում՝ բազմաթիվ պրոցեդուրաներ թե բույսերի, թե անասունների նորմալ աճի համար, չեն արվում։

Եթե մինչև ադրբեջանական անցակետի տեղադրումը գոնե դեպի Գորիս գյուղացիները ելումուտ ունեին ու կարողանում էին իրենց անհրաժեշտ ապարանքները ձեռք բերել, հիմա ոչ ոք չի էլ մտածում ադրբեջանական անցակետով անցնելու մասին։

«Պիտի դիմանանք, մինչև ճանապարհը բացվի։ Անվտանգություն ամենակարևոր է․ առաջին հերթին դա պետք է պահենք, չանցնենք այդ անցակետով»,-ասում է գյուղապետը։

Գյուղում մեծ թե փոքր սովորել են խնայողաբար օգտագործել բոլոր ռեսուրսները։ Ինչ էլ չի լինում, փոխարինող են գտնում, խնդրին լուծում տալիս։

Մինչև վերջերս ամբողջ միայն Լիսագորում գազ կար․ հիմա այնտեղ էլ չկա։ Պատճառը դեռ հստակ չգիտի նաև գյուղապետը։ Գյուղում ջուր կա, բայց ներքին ցանցն էլ թշնամին թույլ չի տվել, որ փոխեն վերջացնեն։ Նասիբյանը հույս ունի, որ ճանապարհը բացվելուց կարճ ժամանակ անց գյուղացիներն իրենց տներում արդեն խմելու ջուր կունենան։

Իսկ թե կյանքի ճանապարհի բացմանը որքան են սպասում Արցախի մեր հայրենակիցները, բառերով նկարագրել հնարավոր չէ․․․

Հիշեցնենք, որ Ադրբեջանն ավելի քան հինգ ամիս է՝ պաշարված է պահում Արցախը, շուրջ մեկ ամիս առաջ էլ կրկնակի շրջափակման մեջ է վերցրել այդքան ժամանակ Արցախի մնացյալ հատվածից կտրված Շուշիի շրջանի չորս գյուղերը՝ Եղցահողը, Լիսագորը, Մեծ Շենն ու Հին Շենը։

Աղբյուր` Փաստինֆո