Փաստ ինֆո

Նորանկախ Հայաստանի պատմության մեջ առաջին անգամ Հայաստանի անունը միջազգային հարթակներում շոշափվում է աննախադեպ մեծ չափերի՝ որպես շուրջ 3 տոննա կոկաին տեսակի թմրամիջոցի ներկրման երկիր, ինչը, մեղմ ասած, մտահոգությունների նոր տեղիք է տալիս։ Խնդիրն այն է, որ, եթե նախկինում Հայաստանը համարվում էր տարանցիկ երկիր` թմրամիջոցների համար, ապա հիմա սպառման երկիր: Համենայն դեպս`Իտալիայի ւրավապահների հայտարարության համաձայն, Սիցիլիայում հայտնաբերված շուրջ երեք տոննա թմրամիջոցը նախատեսված է եղել հենց Հայաստանի համար` ուղեւորվելով էկվադորից:

Անգամ 3 մլն-ին չհասնող բնակչություն ունեցող պետությունում մոտավոր 3 տոննա թմրանյութի ներկրման դեպքում գործ ունենք ոչ այլ ինչի, քան՝ երկրի անվտանգությանը սպառնացող վտանգի և վերջին տարիներին փաստացի զարգացած թմրաբիզնեսի հետ։

Հիշեցնենք, որ Իտալական ANSA լրատվական գործակալությունը հայտնել է, որ Իտալիայի ֆինանսական ոստիկանությունը և մաքսավորներն ավելի քան 2,7 տոննա բարձր մաքրության կոկաին են առգրավել Ջոյա Տաուրո նավահանգստում։ Նշվում է, որ թմրանյութը թաքցվել է 78 տոննա բանան տեղափոխող սառնարանային երկու կոնտեյներում: Ըստ ANSA գործակալության՝ բեռը հայտնաբերվել է Էկվադորից ժամանած նավի վրա և ենթադրաբար վրացական Բաթումի նավահանգստով պետք է տեղափոխվեր Հայաստան։

Ի դեպ, նորանկախ ՀՀ պատմության մեջ առաջին անգամ է նման խմբաքանակի թմրանյութ հայտնաբերվում ոչ ավել, ոչ պակաս Հայաստանի համար: Ճիշտ է տարիներ առաջ` 2014թ. հունվարի 17-ին, Հայաստանում հայտնաբերվել էր շուրջ 1 տոննա հերոին,որը փորձ էր արվել Վրաստանից Իրան տեղափոխել` Հայաստանի տարածքով։ Բեռնատարի վարորդը՝ Վրաստանի քաղաքացի Ավթանդիլ Մարտիաշվիլին դատապարտվել է 17, իսկ բեռնափոխադրող ընկերության տնօրեն, Թուրքիայի քաղաքացի Օսման Ուղուրլուն ՝ 19 տարվա ազատազրկման։

Եթե վերոգրյալ դեպքով ՀՀ-ն հանդիսանում էր որպես տարանցիկ երկիր, ապա այս դեպքում՝ Իտալիայի իրավապահների տվյալներով՝ Էկվադորից ժամանած՝ բանանների սառնարաններում հայտնաբերված 2.7 տոննա կոկաինը պետք է տեղափոխվեր ՀՀ, ինչը վկայում է թմրաբիզնեսի հստակ ցանցի մասին, որի մեջ թաթախված է Հայաստանը: «Փաստինֆո»-ն փորձել է ՀՀ դատախազությունից ճշտել, թե արդյոք Իտալիայի իրավապահներից պարզել են, թե ով է եղել խորհրդավոր ուղեբեռի հասցեատերը, սակայն դատախազությունից խուսափեցին կոնկրետ պատասխանից` նշելով, թե հրապարակումներն ուսումնասիրվում են: «Փաղստինֆո»-ն կապ հաստատեց նաև ՀՀ ՊԵԿ-ի հետ`տեղեկանալու, ի վերջո, ՊԵԿ-ը պարզել է, թե որ ընկերություններն են բեռնափոխադրում իրականացրել, որ ընկերությունից պետք է ներկրվեր «բանանը», ի վերջո, ՀՀ-ն էր արդյոք բեռնափոխադրման «վերջնակետը», ով է եղել պատվիրատուն, թե բեռները ՀՀ տարածքով պետք է տեղափոխվեր այլ պետություն, այսինքն՝ տարանցիկ պետության կարգավճակ ուներ այս պարագայում: Սակայն այս կառույցից առաջարկեցին գրավոր հարցմամբ դիմել, ինչի պատասխանը ստանալուց հետո այն կհրապարակենք։

Նշենք, որ ՊԵԿ Մաքսանենգության դեմ պայքարի վարչության պետը ՔՊ-ական նախկին պատգամավոր Երջանիկ Հակոբյանն է։

Հեղինակ՝ Իզաբել Սահակյան

Աղբյուր` Փաստինֆո