Փաստ ինֆո

ՀՀ արտգործնախարարի տեղակալ Պարույր Հովհաննիսյանի համար անհասկանալի է եղել Հայաստանում ԵՄ պատվիրակության ղեկավարի հայտարարությունը, որ հայկական զորքերն էլ Ադրբեջանական սահմանի 1-2 հատվածում են։

«Հուսով ենք՝ «երկու կողմերն էլ իրենց զորքերը կհանեն», կանցնեն սահմանազատման և սահմանագծման աշխատանքներին»։ Երեւանում այսօր տեղի ունեցած մամուլի ասուլիսում հայտարարել է Հայաստանում Եվրոպական միության պատվիրակության ղեկավար, դեսպան Անդրեա Վիկտորինը, իսկ երբ լրագրողները հետաքրքրվել են, թե Հայաստանի մասով ինչը նկատի ունի, քանի որ Հայաստանի զորքերը, ըստ էության, գտնվում են Հայաստանի տարածքում՝ Անդրեա Վիկտորինը հայտարարել է, թե՝ «Դա շատ հստակ նշվել է, 1-2 կետ կա, որտեղ հայկական զորքերն են, ասենք, սահմանային տարածքներում»։

Ասուլիսին ներկա է եղել նաեւ արտաքին գործերի փոխնախարար Պարույր Հովհաննիսյանը, որից լրագրողները փորձել են պարզաբանում ստանալ, թե ինչ 1-2 կետի մասին է խոսքը։

«Ինձ համար էլ պարզ չէ, թե ինչի մասին է խոսքը, հավանաբար, այն վերաբերում է Լեռնային Ղարաբաղի առաջին պատերազմին, սակայն ակնհայտ է, որ այս շրջանում խոսքը գնում է Հայաստանի տարածքից ադրբեջանական զորքերի դուրսբերմանը և դրան անդրադարձել են թե՛ Եվրամիությունը ,թե՛ Միացյալ նահանգները և թե այլ գործընկերներ»,-ասել է փոխնախարարը։

Անդրառնալով այն հարցին ,որ Շառլ Միշելը իր խոսքում չի հստակեցրել՝ արդյոք Ալիևը հրաժարվել է «Զանգեզուրի միջանցք» գաղափարից՝ Պ.Հովհաննիսյանը նշել է, որ գործընկերները այլևս չեն օգտագործում «Զանգեզուրի միջանցք» եզրույթը և դա ցույց է տալիս,թե ինչ դիրքորոշում ունեն միջնորդները ։

Լրագրողները հետաքրքրվեցին նաև «Խաղաղության» պայմանագրով, դրա կնքման պայմաններով ու արդյոք սկզբունքային է այն,որ ՀՀ տարածքից ադրբեջանական զորքերի դուրսբերման դեպքում միայն կստորագրվի «Խաղաղության» պայմանագիրը, թե հայկական կողմը այն կստորագրի նույնիսկ այդ դեպքում։

«Պայմանագիրը արդեն իսկ ներառում է դրույթներ թե՛ դելիմիտացիայի, թե՛ ճանապարհների վերաբերյալ,պայմանագիրը ներառում է այն բոլոր սկզբունքները, որի հիման վրա պետք է, ի վերջո, հաստատել խաղաղությունը և այս հարցը կտրված չէ ընդհանուր հարցից և բաժանել մեկը մյուսից անհնար է »,- ասել է Պարույր Հովհաննիսյանը ու ավելացրել. «Բոլոր ջանքերը գնում են զուգահեռ, բոլոր բանակցությունների նպատակն է հնարավորինս ապահովել խաղաղության գործընթացը մեր տարածաշրջանում »։

Աղբյուր` Փաստինֆո