Փաստ ինֆո

Շառլ Միշելի ուղերձն այն էր, որ երկու երկրները պետք է երկուստեք ճանաչեն տարածքային ամբողջականությունը, նշանակում է՝ այն սահմանները, որոնք գոյություն ունեին ԽՍՀՄ փլուզման պահին, ինչը համապատասխանում է Ալմա Աթայի հայտարարությանը և պարզապես վերահաստատում էր այդ սկզբունքը։ Այս մասին Եվրոպայի օրվան և Եվրոպական միություն-Հայաստան հարաբերություններին նվիրված մամուլի ասուլիսին հայտարարեց ԱԳ փոխնախարար Պարույր Հովհաննիսյանը։

Հիշեցնենք, որ երեկ Բրյուսելում կայացել է Փաշինյան-Ալիև-Շառլ Միշել եռակողմ հանդիպումը։ «Հայաստանը և Ադրբեջանը հաստատել են փոխադարձ տարածքային ամբողջականության ճանաչումը 1991թ. Ալմա-Աթայի հռչակագրի հիման վրա և հարգել Հայաստանի 29.8 հազար քառ. կմ և Ադրբեջանի 86.6 հազար քառ. կմ տարածքները»,- հանդիպման ավարտից հետո հայտարարել է Շառլ Միշելը։

Այսօր հրավիրված ասուլիսին լրագրողը, դիմելով ՀՀ ԱԳ փոխնախարարին, արձանագրեց, որ հստակ թվեր են նշվում տարածքների մասով, արդյոք սա նշանակում է, որ նախքան որևէ թուղթ ստորագրելը ադրբեջանական զորքերը դուրս են գալիս ՀՀ տարածքից, արդյոք անկլավների հարցը մտնում է այս ամենի մեջ, թե ոչ, արդյո՞ք վերջերս ՀՀ ներթափանցած ադրբեջանցիները փոխանակվելու են հայ գերիների հետ։

ԱԳ փոխնախարար Պարույր Հովհաննիսյանը նշեց, որ չի հիշում որևէ հիշատակում՝ փոխանակման առումով, պարզ ասվեց, որ հայ գերիների վերաբերյալ կար հստակ պայմանավորվածություններ, որոնք պետք է կատարվեն։ Ինչ վերաբերում է տարածքային հարցերին, ապա ԱԳ նախարարը նշեց, որ Շառլ Միշելի ուղերձն այն էր, որ երկու երկրները պետք է երկուստեք ճանաչեն տարածքային ամբողջականությունը, նշանակում է՝ այն սահմանները, որոնք գոյություն ունեին ԽՍՀՄ փլուզման պահին, ինչը համապատասխանում է Ալմա Աթայի հայտարարությանը և պարզապես վերահաստատում էր այդ սկզբունքը։ ԱԳ փոխնախարարը նշեց, թե տեղյակ չէ անկլավների մասին որևէ քննարկման, իսկ ինչ վերաբերում է ՀՀ տարածքից ադրբեջանցիների դուրսբերմանը, ապա այդ սահմանների ճանաչումը ենթադրում է դուրսբերում։

Աղբյուր` Փաստինֆո