Փաստ ինֆո

«Այս էլ որերորդ անգամ սահմանում լարվածություն է, օգտագործվում է ծանր հրետանի, բայց եվրոպացի դիտորդները տեղում չեն։ Եղեգնաձորից Սոթք հասնելու համար, անգամ մեծ երևակայության պայմաններում, երեք ժամը բավարարար է , որ նրանք հասնեն Սոթք, սակայն Սոթք նրանք հասել են միայն երեկ երեկոյան»։ Այս մասին «Փաստինֆո»-ի եթերում ասել է միջազգայնագետ Գրիգոր Բալասանյանը։

Ինչպես արդեն տեղեկացրել ենք՝ ադրբեջանական զինուժը մայիսի 11-12-ին հերթական ռազմական ագրեսիան է իրականացրել ՀՀ ինքնիշխան տարածքի նկատմամբ՝ կիրառելով ականանետեր, հրետանի, ԱԹՍ, որի հետեւանքով հայկական կողմն ունի մեկ զոհ, 8 վիրավոր։

Եվրոպացի դիտորդների ներկայությունը չի խանգարում թշնամուն՝ ընդդեմ Հայաստանի ռազմական գործողություններ իրականացնել, հայ հասարակությանը ոչինչ հայտնի չէ նաեւ դիտարկումների արդյունքների մասին։

«Եվրոպացի դիտորդները մեզ ոչինչ չեն փոխանցում և դա իրենց ներվում է։ Ներվում է և պարզվում, որ դիտորդները կարող են Հայաստանում դիտարկումներ անել ու Հայաստանի իշխանություններին ոչինչ չտեղեկացնել, փոխարենը՝ ամեն քայլի մասին հայտնեն ադրբեջանական կողմին»,- ասել է միջազգայնագետը։

«Սա ինչ- որ տարօրինակ դիտորդական առաքելություն է։ Այնպիսի տպավորություն է ստեղծվում, որ սա ոչ թե եվրոպական դիտորդական առաքելություն է, այլ Ադրբեջանի կողմից վարձված եվրոպացի դիտորդների առաքելություն՝ մեր երկրում, որն ըստ էության ոչ միայն չի բխում մեր շահերից, այլև վտանգում է մեր անվտանգությունը» ,- նշում է Գրիգոր Բալասանյանը և հավելում. «Հայաստանի իշխանությունները պետք է քայլեր ձեռնարկեն արդեն, որովհետև եվրոպական դիտորդները, այսքան ժամանակ գտնվելով Հայաստանում, ոչ միայն չեն նպաստել սահմանային լարվածության թուլացմանը, այլև ակնհայտ զբաղվում են լրտեսական գործունեությամբ՝ ՀՀ սուվերեն տարածքում»։

Անդրադառնալով Արցախի համար կարևոր նշանակություն ունեցող Սարսանգի ջրամբարին՝ միջազգայնագետը նշում է, որ այն վտանգված է, որովհետև Ադրբեջանը հերթով սկսել է փոխել գետերի հունը, և ջրերը չեն լցվում Սարսանգի ջրամբար, այլ գնում դեպի Գանձակ։

«Եթե Ադրբեջանը չի հասկանում սովորական լեզուն, նրա հետ պետք է խոսել իր լեզվով։ Ադրբեջանին պետք է երեք օր ժամանակ տրվի, եթե այդ ընթացքում Սարսանգի ջրամբարի ջրամատակարարումը չվերականգնվի, ապա Հայաստանն իրեն իրավունք պետք է վերապահի քայլեր ձեռնարկել՝ Հայաստանին սահմանակից ադրբեջանական հատվածները ջրազրկելու համար։ Հայաստանն ունի սրա բարոյական եւ իրավական իրավունքները։ Որևիցէ երկիր ու միջազգային կազմակերպություն չի կարող Հյաստանին մեղադրել՝ ինչ որ կոնվենցյաներ խախտելու մեջ։ Իսկ եթե մեղադրեն, ապա կարող են ուղղակի ցույց տալ Սարսանգի ջրամբարի կադրերը, ուղարկել, որ իրենք Սարսանգը նկարեն և սեփական աչքերով տեսնեն, թե ինչպիսի աղետալի վիճակում է գտնվում Արցախը սնող և Արցախի համար մեծ նշանակություն ունեցող այդ ջրամբարը»,- նշել է Գրիգոր Բալասանյանն ու հավելել,որ ջրային խնդիրը Հայաստանը պետք է սկսի օգտագործի իր երկրի շահերի սպասարկման համար։

Աղբյուր` Փաստինֆո