Փաստ ինֆո

ՀՀ տարածքային ամբողջականությունն այսօր խախտված է, ՀՀ բարձրագույն իշխանությունը մեր երկրի ինքնիշխանության դեմ գործողություններ է իրականացնում, իսկ դատախազությունը՝ պարտակում։ Հերթական ապացույցը՝ ապրիլին արձանագրված իրադարձություններն են։

Այսպես՝ ադրբեջանցիներն ապրիլի 11-ից կրկին ներխուժել, ասել է թե՝ էլ ավելի են խորացել ՀՀ սուվերեն տարածքում, տեղակայվել Տեղ համայնքում, ինչի մասին անգամ բարձրաձայնել են թե զինվորականները, թե քաղաքական իշխանությունը, սակայն իրավապահներն, ինչպես պարզվեց, անգամ քրեական վարույթ չեն նախաձեռնել՝ ՀՀ սուվերեն տարածք ներխուժելու, ՀՀ տարածքային ամբողջականությունը խախտելու դեպքով։

ՀՀ վարչապետ Նիկոլ Փաշինյանն ապրիլի 20-ին հայտարարել էր, որ ադրբեջանցիները գտնվում են ՀՀ ինքնիշխան տարածքում. «Տեղ գյուղում ունենք 11 կմ, որից 5 կմ հատված մենք համարել ենք խնդրահարույց, որտեղ սահմանների ճշտմամբ, ըստ Փաշինյանի, զբաղվում են սահմանապահները, մինչդեռ նրանք դելիմիտացիա ու դեմարկացիա իրականացնելու գործառույթ չունեն։ «Փաստինֆո»-ն 2023թ. ապրիլի 25-ին գրավոր հարցում էր ուղարկել ՀՀ գլխավոր դատախազություն՝ խնդրելով տեղեկություն տրամադրել, թե արդյո՞ք քրեական վարույթ նախաձեռնվել է ադրբեջանցիների կողմից ՀՀ սուվերեն տարածք ներխուժելու, ՀՀ տարածքային ամբողջականությունը խախտելու դեպքի առթիվ, իրավական գնահատական տրվել է արդյոք ՀՀ տարածքային ամբողջականության դեմ ուղղված տարբեր պաշտոնատար անձանց, այդ թվում՝ գործող վարչապետ Նիկոլ Փաշինյանի հայտարարությանը։ Մեկ այլ հարցադրմամբ փորձել ենք պարզել, թե արդյո՞ք քրեական վարույթ նախաձեռնվել է՝ նկատի ունենալով, որ սահմանապահներն իրականացնում են աշխատանքներ, որոնց լիազորություններն օրենքով սահմանված կարգով չունեն։

ՀՀ դատախազությունը հարցմանը պատասխանել է միայն մայիսի 10-ին՝ օրենքով սահմանված ժամկետների խախտմամբ, սակայն դժվար է այն պատասխան որակել, քանի որ որևէ հարցին որևէ պատասխան չի տրվել։ Փաստացի, դատախազությունը պարզապես չի կողմնորոշվել ինչ պատասխանի ու այդպիսով խոստովանել, որ իրենց անգործությամբ հովանու տակ են վերցրել ՀՀ ինքնիշխանության դեմ երկրի քաղաքական իշխանությունների գործողությունները, ապօրինի տրվող հրամանները։

Դատախազությունը գրավոր պատասխանում միայն տեղեկատվություն է տրամադրել Սյունիքի մարզի Տեղ գյուղի մարտական դիրքերում հակառակորդի կրակոցներից մահացու հրազենային վիրավորում ստանալու հետևանքով ՀՀ ԶՈՒ 4 զինծառայողների և 6 զինծառայողների վիրավորվելու դեպքի առթիվ ՀՀ քննչական կոմիտեի զինվորական քննչական գլխավոր վարչության իններորդ կայազորային քննչական բաժնում նախաձեռնված քրեական վարույթների մասին, որոնք վերաբերում են միայն ազգային պատկանելիության հողի վրա կատարված սպանության, սպանության փորձերին։ Տարածքային ամբողջականության դեմ քայլերի, Ադրբեջանի ռազմաքաղաաքական իշխանության կողմից մեր ինքնիշխանության դեմ գործողությունների առթիջ որեւէ վարույթ չի նախաձեռնվել, որեւէ ադրբեջանցի զինվորական որպես մեղադրյալ չի ներգրավվել եւ սա այն դեպքում, երբ թշնամին անգամ հայ դիզայների նկատմամբ է հետախուզում հայտարարում։

Փաստ է՝ որ դատախազությունը՝ ի դեմս Փաշինյանի նախկին օգնական, ներկայումս գլխավոր դատախազ Աննա Վարդապետյանի, ՀՀ պետական շահը պաշտպանելու ուղղությամբ որեւէ քայլ չի իրականացնում։

Հեղինակ՝ Իզաբել Սահակյան

Աղբյուր` Փաստինֆո