Փաստ ինֆո

«Վարչապետի իշխանությունը թույլ է տալիս «Նեմեսիս» հուշարձանի տեղադրումը և ինքն էլ՝ վարչապետը անթույլատրելի՞ է համարում դրա գոյությունը…Սա նշանակում է՝ ընդունում է, որ իրենք սխալ են։ Այստեղ Նիկոլը ճիշտ է՝ ազգային հարցերում իրենց ընկալմամբ, իհարկե «Նեմեսիս» հուշարձանի տեղադրումը պետք է որ սխալմունք լիներ։ Սրանց ողջ ապազգային քաղաքականությունը՝ թրքասեր, թրքահաճո, թրքամոլ, թրքահպատակ, դեմ պետք է լինի «Նեմեսիս»-ի ամեն տեսակի հիշատակմանը,- «Փաստինֆո» լրատվականի հետ զրույցում ասում է հայագետ, Արևմտահայոց հարցերի ուսումնասիրության կենտրոնի ղեկավար Հայկազուն Ալվրցյանը։

Այս ողորմելի իշխանությունը թող Թուրքիայից պահանջի ապամոնտաժել Թալեաթի արձանը։ «Նեմեսիս»-ի հուշարձանին ձեռք տվողը թուրք է կամ թուրքական պատվեր կատարող, ասում է հայագետը. «Երբ Թուրքիայի Արտաքին գործերի նախարար Չավուշօղլուն հայտարարեց, թե «Նեմեսիս»-ի հուշարձանի տեղադրումը վիրավորում է իրենց պատմական հիշողությունը, ինչ – որ մեկն այստեղից իրեն հակադարձե՞ց, ասելով՝ իսկ մեր վիրավորված պատմական հիշողության համար ո՞վ է պատասխանատու։ Չավուշօղլուի պատմական հիշողությունների հետ մենք գործ չունենք։ Իսկ երբ Փաշինյանն ասում է, թե հուշարձանի տեղադրումը սխալմունք է եղել, սրանով իսկ, նա պատասխանում է Չավուշօղլու «վիրավորանքին»՝ հերթական անգամ նվաստացնելով մեր ազգային արժանապատվությունը։ Վարչապետի տեսակետները, նրա հույզեն ու տագնապները, մեծ իմաստով, հետաքրքիր չեն ո՛չ մեզ, ո՛չ մեր պետական կամ ազգային շահի տեսակետից»,- ասում է հայագետը։

Անդրադառնալով Չավուշօղլու՝ հաջորդիվ արված մեկ այլ հայտարարության, թե արձանի չապամոնտաժման պարագայում հայկական կողմը պատասխան կստանա, հայագետ Հայկազուն Ալվրցյանն այն որակում է որպես՝ հնչեցված սպառնալիք.«Եթե Չավուշօղլուն, բացի վիրավորվելուց, մի քիչ էլ պատմությունը վերհիշեր, ապա կտեսներ, որ այս հուշարձանը կանգնեցվել է՝ ի պատիվ այն վրիժառուների, ովքեր ի կատար են ածել Օսմանյան կայսրության ռազմական դատական ատյանի՝ 1919 թ. կայացված որոշումը, որով իրենց երկրի հանցագործներ՝ Էնվերը, Թալեաթը, Ջեմալն ու մյուսները դատապարտվել էին մահվան։ Եթե իրենք չկարողացան իրենց երկրի ռազմական դատական ատյանի վճիռն իրականություն դարձնեն, դա արեցին արժանապատիվ հայորդիները։ Ընդ որում, այդ մարդիկ կատարել են ոչ միայն Օսմանյան կայսրության դատարանի օրինական վճիռը, այլև՝ ի կատար են ածել հայ ժողովրդի կամքը, իսկ նրանց առաքելությունը որակվել է որպես պատմական»։

Թուրքերը պատմական կեղծարարներ են, նրանց պատմությունը լի է անընդունելի և մերժելի կեղծիքներով, ասում է Հայկազուն Ալվրցյանը.«Ինչո՞ւ, ի պատասխան թուրք բարձրաստիճան պաշտոնյայի հնչեցված սպառնալիքների, այս իշխանությոնը կոչ չի անում ապամոնտաժել այնտեղ՝ Ստամբուլում և Անկարայում վեր խոյացող Ցեղասպանության ոճիրն իրականացրած հանցագործներ Թալեաթի, Էնվերի կամ Ջեմալի վեր խոյացող արձաններն ու հուշարձանները։ Ինչո՞ւ չի պահանջում ապամոնտաժել և մաքրել սուլթան Համիդից սկսած՝ հայերին ցեղասպանած թուրքերի վերաբերյալ բոլոր հիշողությունները՝ կլինեն դրանք գրքերի, ֆիլմերի թե արձանների տեսքով։ Չէ՞ որ Նեմեսիսի մարտիկներն աշխարհում առաջին Ցեղասպանությունն իրականացրածների՝Հիտլերի ուսուցիչների պատժողներն են եղել։ Եվ դեռ այս իշխանությունները չեն հայտարարում, որ իրենց պատմական հիշողությունը վիրավորված է, փոխարենն՝ այդ մասին աղաղակում և սպառնալիքներ են հնչեցնում չավուշօղլուները»,- ասում է հայագետը։

Սուրբ մեռելները նույնպես զինվորներ են, նշում է Հայկազուն Ալվրցյանը և հավելում. «Մենք ծանր օրեր ենք ապրում, դիմագրավում ենք թշնամու հարձակումներին, այն պարագայում, երբ այս իշխանությունները ձեռքները ծալած նստել են։ Եվ գուցե, խիստ խորհրդանշական էր հենց այս օրերին այս հուշարձանի տեղադրումը։ Գուցե նրանք՝ գրանիտե սալիկնրի տեսքով անմահացած այս նահատակները, այսպես են մեզ ուժ տալիս՝ դառնալով մեր նորօրյա պայքարի առաջամարտիկներ։ Շնորհակալ եմ այն մարդկանց, ովքեր նախաձեռնեցին այս հուշարձանի կերտումն ու տեղադրումը՝ հենց հիմա, մեր հայրենիքի համար հենց այս օրհասական օրերին՝ հակաթուրքական գաղափարի պայքարը վառ պահելու համար»։

Մանրամասները՝ տեսանյութում։

Աղբյուր` Փաստինֆո