Փաստ ինֆո

Ադրբեջանի ռազմական ոստիկանությունում հայ գերիներին դաժան ծեծի են ենթարկել։ Դրանք զուգակցվել են սննդից, քնից զրկելու միջոցով ու նաև ենթարկել են եղանակային պայմանների ազդեցությանը՝ պատճառելով հավելյալ տառապանք, օրինակ՝ հատկապես ցուրտ եղանակին արհեստականորեն այնպիսի պայմանների մեջ են դրել, որ սառելու հետևանքով հավելյալ տառապանք պատճառեն։ Այս մասին հրավիրված մամուլի ասուլիսին ասաց իրավապաշտպան Սիրանուշ Սահակյանը։

Նրա խոսքով՝ այս քաղաքականությունը շարունակվել է հատուկ ծառայությունների հսկողության ներքո ու ավելի անմարդկային վերաբերմունք ցուցաբերվել պահման վայրերում, որտեղ ազգային ինքնասիրությունը վիրավորելու ճանապարհով ընդգծել են ադրբեջանցիների գերակայությունը հայկական էթնիկ խմբի նկատմամբ։

Նա նշեց, որ գերիների նկատմամբ վատ վերաբերմունքին ներգրավվում են նաև քաղաքացիական անձինք, բուժաշխատողները։
«Ռազմական կամ քաղաքացիան բժիշկները, ովքեր առնչվում էին զինծառայողներին, բռնություն էին կիրառում։ Վերջին միջադեպերով ունեցել ենք բազմաթիվ վկայություններ, որ ռազմագերիներին հանձնել են քաղաքացիական անձանց։ Օրինակ՝ դեպի Բաքու տեղափոխվելիս կանգ են առել մի գյուղում, որտեղ արդեն հավաքված են եղել քաղաքացիական անձինք ու ռազմագերուն, մեքենայից գլորելով, ցած են նետել նրանց առջև, որոնք բռնություն ու ծեծ են կիրառել»,- մանրամասնեց Սիրանուշ Սահակյանը՝ արձանագրելով, որ բժիշկները ռազմագերիներին բուժօգնության տրամադրման կադրեր են բեմականացրել, որ ցույց տան միջազգային կառույցներին, թե մարդասիրական իրավունքը չի խախտվել։

Բացի այդ, ադրբեջանական հսկողության ներքո գտնվող գերիների նկատմամբ դաժան վերաբերմունքը համակցվում է նրանց ընտանիքի անդամների նկատմամբ նպատակաուղղված գործողություններով։ Սիրանուշ Սահակյանը պատմեց, որ, օրինակ, դեպք է եղել, որ կոկորդը կտրած զինծառայողի լուսանկարը տեղադրել են հենց իր սոցիալական ցանցում, բազմաթիվ դեպքեր են եղել, երբ հեռախոսները վերցնելու եղանակով՝ ընտանիքի անդամներին, հարազատներին, ընկերներին են ուղարկել տեսանյութեր, որոնցում երևում են ռազմական հանցագործությունը փաստող կադրեր։ Բացի այդ, անհայտ կորածների թիվը ևս հստակ չէ, Սահակյանն ընդգծում է, որ բազմաթիվ են դեպքերը, երբ ադրբեջանցիները հստակ գիտեն զոհված զինծառայողի մարմնի գտնվելու վայրը, ունեն հասանելիություն, սակայն դիտավորյալ չեն վերցնում և փոխանցում ընտանիքներին, հակառակը, ցուցադրաբար մոտենում են, լուսանկարվում, տարածում սոցիալական ցանցերում։

Արման Թաթոյանն էլ հայտնեց այլ դեպքի մասին, երբ սեպտեմբերին մեր զինծառայողին սպանել են, մարմինը լուսանկարել են, ուղարկել կնոջը, սթորի արել «Whatsapp» հավելվածում։

Աղբյուր` Փաստինֆո