Փաստ ինֆո

«Փաշինյանը գործում է այնպես, ինչպես գործում էր 2018 թ. մայիսից, նրա պլաններում ոչինչ չի փոխվել։ Ժողովրդի մեջքի հետևում նա, ամեն գնով, Ալիևի հետ սեպարատ պայմանավորվածություններ է ձեռք բերում, որոնք, բացառապես, հակահայկական բնույթի են»,- «Փաստինֆո» լրատվականի հետ զրույցում ասում է Շիրակի համալսարանի դասախոս Արթուր Համբարձումյանը և հավելում՝ ահա վրա է հասել հերթական խոտումն իրականացնելու պահը եւ վաշինգտոնյան, բրյուսելյան բանակցությունների մեջտեղում, Ալիևը ճնշում է բանեցնում Փաշինյանի վրա, որպեսզի նա, հանկարծ, չմոռանա, թե ինչ խոստումներ է տվել և թե՝ ինչ պետք է դեռ նվիրի Ալիևին։

Նրա արձանագրմամբ՝ արդեն անառարկելի ճշմարտություն է այն, որ Փաշինյանը՝ հանուն իր աթոռի՝ կգնա ցանկացած քայլի, այդ թվում նաև թշնամու հետ հակահայկական պայմանավորվածությունների, եւ Սոթքի այսօրվա ռազմական ագրեսիան դրա վառ ապացույցն է

Ինչպես արդեն տեղեկացրել ենք՝ այսօր վաղ առավոտից լարված վիճակ է Սոթքում՝ հակառակորդը ժամը 06-ից սկսած՝ մի քանի ժամ, կրակ է բացել հրետանային ու ականանետային միջոցներից, որի հետեւանքով ունենք 4 վիրավոր։ Ըստ Համբարձումյանի՝ սեփական աթոռի, փողի ու փորի և, վերջապես, կյանքի և գոյության համար հայրենիքը վաճառքի հանած Փաշինյանի կողմից ամեն անգամ սեփական պայմանավորվածությունից փախուստը կազուս բելլի է ստեղծում մեր երկրի՝ առանց այն էլ վտանգված սահմաններին։ «Այսինքն, հերթական անգամ թշնամական երկրի համար պատերազմի պատրվակ է ստեղծվել և թշնամին թիրախավորել է մեր Հայրենիքի առավել վտանգված հատվածներից մեկը՝ Սոթքը, ոսկու հանքով։ Սակայն, առավել սարսափելին այստեղ այն է, որ մենք, արդեն, երեք տարի է այս սարսափելի շրջապտույտի մեջ ենք և սա վերջ չունի՝ այնքան ժամանակ, քանի դեռ այս խեղկատակն իշխանության ղեկին է և բացարձակ որևէ նպատակ չունի հետ կանգնելու իր հանցավոր և վտանգավոր ուղղուց»։

Փաշինյանը մշտապես առաջնորդվում է ստեղծված վտանգավոր իրավիճակներում ասիմետրիկ պատասխաններ տալով։ Օրինակ այսօր վաղ առավոտից երկրի սահմաններին հրետակոծություն է, որի արդյունքում մենք ծանր վիրավորներ ունենք, ինքը Կառավարության նիստի ընթացքում ինչ – որ աշխատավարձերի հարց է քննարկում, ասում է բանախոսն ու հավելում. «Երկիրը տալաշ -տալաշ կտրելով նվիում է թշնամուն, մարդկային ճակատագրեր է խեղում, տղաներ են վիրավորում, զոհեր ենք ունենում, ինքը շարունակում է ասիմետրիկ պատասխաններ հնչեցնել՝ մեր կյանքի ու Հայրենիքի նկատմամբ գոյաբանական խնդիրներ առաջ քաշած թշնամուն։ Փաշինյանը հոգ է տանում, որ մենք, հանկարծ, ռազմատենչ հայտարարություններով հանդես չգանք, որ, հանկարծ, չզինվենք, որ բանակը չարդիականացվի, այլ ընդհակառակը՝ օպտիմալիզացման անվան տակ՝ լուծարվի։ Սրան զուգահետ նա գեներալներ ու գնդապետներ է ձերբակալվում, ինչպես օրինակ՝ Խաչատուրովին ու Միքայել Արզումանյանին։ Գրեթե վստահ եմ՝ սրանով, նույնպես, նա թշնամու հերթական հրահանգն է իրականացրել, որով հաճոյացել է թշնամուն, ինչպես ժամանակին էլ՝ նույն Ալիևի հրահանգով Ռոբերտ Քոչարյանին ու Մանվել Գրիգորյանին ձերբակելեց, ինչի մասին հետագայում բացահայտում կատարեց ինքը՝ Ալիևը։ Ահա, այս երկրի ղեկին նստածի պատասխանը՝ մեզ վերացնել փորձող թշնամուն։ Ուրեմն, այսօր Սոթքն է հրետանակոծության ենթարկվել, վաղը Վարդենիսի հերթն է լինելու, հետո՝ Գորիսը, Տավուշն ու այդպես շարունակ։ Մի՞թե այս ամենը պարզ չէ»։

Արթուր Համբարձումյանը նկատում է ՝ մեր երկրի սահմաններին իրականացված ռազմական ագրեսիայով թշնամին իր նոր ձեռքբերումն է գրանցել, իսկ Փաշինյանը՝ հերթական անգամ կոտրել է ազգի ոգին. «Եվ քանի - որ Փաշինյան - Ալիև սինքրոնիզացված գործողությունների փաստն, արդեն, հայտնի է, կողմերից ոչ ոք դա, նույնիսկ, չի էլ թաքցնում, ապա ստացվում է, որ ամեն անգամ մեր երկիրը հերթական արկածախնդրության տանելով, Նիկոլ - Ալիև զույգը փոխհամաձայնեցված կերպով հերթական փոխշահավետ համագործակցությունն է իրականացնում»,- ասում է բանախոսը։

Անդրադառնալով Փաշինյանի իշխանության արևմտյան ակտիվ այցերին ՝ Վաշինգտոն, Բրյուսել, հետո նաև՝ Քիշնև, Արթուր Համբարձումյանը նկատում է՝ մարդ պետք է ավարտված ապուշ լինի, որ աշխարհաքաղաքական ստեղծված վերադասավորումների ֆոնին, փորձի համատեղել արևմտյան և ռուսական դիրքորոշումն ու շահը, որն, իրականում, այլևս անհնար համատեղելի մի բան է. «Վաշինգտոնը, Բրյուսելն ու Մոսկվան պետք է անեն ամեն ինչ, որպեսզի որքան հնարավոր է երկար ձգեն իրենց միջև եղած հակասությունները, այդ նպատակի համար ծառայեցնելով նաև Արցախի համակարտության բանակցային թեման։ Իսկ, եթե Փաշինյանը սա չի հասկանում և չհասկանալով փորձում է մանևրել՝ գերտերությունների այս խաղում, ուրեմն, ինչպես արդեն ասեցի, նա ուղղակի հիմար է։ Թեև, անձամբ ես չեմ բացառում, նա հիանալի կերպով հասկանում է ստեղծված իրավիճակը և հատուկ է գնում այս քայլին, անորոշության մեջ պահելով արցախյան խնդիրը՝ երկարաձգելու համար իր տխրահռչակ իշխանությունը, որի վերջը, բոլորս այդ թվում նաև ինքը՝ հիանալի կերպավ պատկերացնում է»։

Աղբյուր` Փաստինֆո