Փաստ ինֆո

«Թուրքիայի և Ադրբեջանի տեսլականի ներքո «խաղաղության» դարաշրջանը Հայաստանի և Արցախի տոտալ կազմաքանդումն է»,- «Փաստինֆո»-ի հետ զրույցում ասել է ԲՀԿ քաղխորհրդի անդամ Արման Աբովյանը՝ նշելով, որ ՀՀ «թավշյա», «ոչ բռնի» իշխանությունները, պատրանքների մեջ են առ այն, որ կարելի է բանակցությունների միջոցով դրական արդյունքների հասնել։

Նրա դիտարկմամբ՝ այս պայմաններում ադրբեջանական ագրեսիան շատ տրամաբանական է և Ադրբեջանը շատ պարզ ցույց է տալիս, որ ինչպես խախտել է, այնպես էլ շարունակելու է խախտել բոլոր հնարավոր և անհնարին պայմանավորվածությունները։ Գործչի խոսքերով՝ Թուրքիան չի կարելի առանձնացնել Ադրբեջանից. «Ալիևն անում է ամեն ինչ, որ բանակցությունների արդյունքում հասնի թուրք-ադրբեջանական տանդեմի համար ցանկալի արդյունքների»։

Արեւմուտքը վերջին շրջանում ակտիվացրել է իր դերակատարումը՝ Հայաստանի ու Ադրբեջանի միջեւ, այսպես կոչված, «խաղաղության պայմանագրի» շուրջ բանակցությունները, ԱՄՆ-ում՝ մայիսի 1-4-ը տեւած բանակցություններն ըստ էության շարունակվելու են մայիսի 14-ին՝ արդեն երկու երկրների մակարդակով՝ Բրյուսելում, Շառլ Միշելի միջնորդությամբ, սակայն այսօր Ադրբեջանը վաղ առավոտից հերթական ռազմական ագրեսիան է իրականացրել ՀՀ ինքնիշխան տարածքի նկատմամբ՝ կրակ բացելով հրետանային ու ականանետային միջոցներից։ «Փաստինֆոյի» հարցին, թե արդյո՞ք սա Ադրբեջանի կողմից ձեռնոց չէ արևմուտքին, քանի որ ի վերջո այսօր նրանց հովանու ներքո են տեղի ունենում բանակցությունները՝ Աբովյանը նշեց. «Իհարկե արևմուտքին հաճելի չէ, սակայն վերջնակետը արևմուտքը տեսնում է ամեն միջոցով հասնել Իրանի և Ռուսաստանի դուրսմղմանը տարածաշրջանից»։

«Եթե արևմուտքը լինի, մեղմ ասած, ոչ գոհացած, ապա Ադրբեջանի հանդեպ պատժամիջոցներ կձեռնարկի, քանի որ ակնհայտորեն որոշակի պայմանավորվածություններ են խախտվել, բայց մենք տեսնում ենք, որ ո՛չ Եվրոպան, ո՛չ Միացյալ Նահանգները բնավ նպատակ չունեն որևէ ճնշում գործադրել Ադրբեջանի վրա»,- նշեց բանախոսը

Անդրադառնալով կոնկրետ Սոթքի ուղղությամբ լարվածությանը՝ Արման Աբովյանը նկատեց. «Այստեղ խնդիրը տարածքը չէ,միգուցե Ադրբեջանը սրանով ռուսական կողմին է ինչ-որ մեսիջներ փորձում ուղարկել, որ ինքը, այնուամենայնիվ իր նպատակներից հետ չի կանգնի, և լարվածության մեկ այլ պատճառ է նաև Թուրքիայում նախանշվող ընտրությունները։ Այսինքն՝ որքան նախահարձակ է Ադրբեջանը,այնքան քաղաքական որոշակի գործիքակազմ կտան Էրդողանին»։

Աղբյուր` Փաստինֆո