Փաստ ինֆո

1975 թվականի քարտեզներում, այսպես կոչված, անկլավներն արդեն գոյություն ունեին, դրա համար էլ Ադրբեջանը պնդում է, որ սահմանազատումն իրականացվի այդ թվականի քարտեզով։ Այդ մասին «Փաստինֆո»-ի հետ զրույցում ասաց ԳԱԱ Պատմության ինստիտուտի տնօրեն Աշոտ Մելքոնյանը։

«Ուշագրավն այն է, որ Արծվաշենի մասին Ադրբեջանը երբեք չի խոսում, որն իր հսկողության տակ է։ Անընդհատ առաջ է քաշում մեր տարածքում առկա անկլավների հարցը՝ այն պարագայում, երբ Արծվաշենի ու շրջակա գյուղերի տարածքը հավասար է մեր անկլավների տարածքին»,-նկատեց պատմաբանը։

Մելքոնյանը շեշտում է՝ 1975 թվականի քարտեզով սահմանազատում անելու դեպքում Հայաստանը շատ անբարենպաստ վիճակում կհայտնվի, մինչդեռ եթե արվի 1920-30 թվականների դրությամբ գծված քարտեզներով, ապա անկլավների հարց չի լինի։

«1920թ. դեկտեմբերի 2-ի Երևանյան համաձայնագրով Հայաստանի տարածքը պիտի լիներ 42 հազար քառ. կմ։ 1920-30-ականների քարտեզներով Կապանի շրջանի մի շարք գյուղեր, Վարդենիսի Մեծ լճերը, Նոյեմբերյանի շրջանից որոշ տարածքներ ՀՀ մաս էին կազմում. հետագայում՝ խորհրդային ղեկավարության որոշմամբ մաս-մաս պոկվել, տրվել են Ադրբեջանին, ու ԽՍՀՄ փլուզման դրությամբ Հայաստանի տարածքը 29.8 հազար քառ. կմ էր մնացել»,-ասաց Մելքոնյանը։

Պատմաբանը նաև նշեց, որ եթե հանկարծ Ադրբեջանին հաջողվի հասնել նրան, որ սահմանազատում իրականացվի 1975թ. քարտեզով, ապա հաջորդիվ պահանջ է դրվելու ՀՀ տարածքով ապահովելու, այսպես կոչված, անկլավների հետ Ադրբեջանի կապը։

Աղբյուր` Փաստինֆո