Փաստ ինֆո

Կառավարության այսօրվա նիստում հաստատվել են սպայական, ենթասպայական և շարքային կազմերի պայմանագրային զինծառայողների ատեստավորման արդյունքների գնահատման նոր ձևաչափն ու ստացած գնահատականների հիման վրա՝ հավելավճարների նոր չափերը։ Ըստ այդմ՝ ատեստավորման գնահատականներից կախված` զինվորականների հավելավճարները կտատանվեն 205 000-470 000-ի սահմանում։

Գերազանց գնահատականի դեպքում սպայական կազմի հավելավճարի չափը կկազմի 470 հազար դրամ, լավ գնահատականի դեպքում՝ 420 հազար, բավարարի դեպքում՝ 230 հազար դրամ։Մոյւս կազմերի դեպքում հավելավճարները կկազմեն՝ համապատասխանաբար 395 հազար դրամ, 345 հազար դրամ և 205 հազար դրամ։

«Զինծառայողը մասնագիտական գիտելիքների և ծառայողական պարտականությունների թեստային առաջադրանքների առնվազն 21 հարցի սխալ պատասխանելու դեպքում ստանում է անբավարար։ 30-34 հարցերին պատասխանելու դեպքում՝ բավարար, 35-44՝ լավ, իսկ 45-ից ավել հարցերին պատասխանելու դեպքում գերազանց գնահատական»,-ասաց պաշտպանության նախարար Սուրեն Պապիկյանը։ Փաշինյանն էլ նկատեց, որ այս ճկունությունն ատեստավորման դեպքում ճիշտ մոտեցում է։

Զինծառայողների ատեստավորման գործընթացի կազմակերպման շրջանակներում առաջին ատեստավորումը նախատեսվում է անցկացնել 2023թ. հունիս ամսվա ընթացքում։ «Միաժամանակ իրականացվում են համապատասխան զինծառայողների ֆիզիկական, կրակային և շարային պատրաստության աստիճանի բարձրացման ինտենսիվ աշխատանքներ»,-նշված է նախագծին հիմնավորման մեջ։

Աղբյուր` Փաստինֆո