Փաստ ինֆո

Թուրքիայի թշնամական քաղաքականությունը Հայաստանի հանդեպ, ըստ էության, երբեք չի դադարել։ Այդ թշնամական ռեժիմը շարունակականության մեջ է, պարզապես որոշ մարդկանց ինքնախաբեության դոզան երբ ավելանում է՝ նրանց թվում է, թե Թուրքիայի մոտեցումներում կան դրական փոփոխություններ։ «ՓաստԻնֆոյի» եթերում ասել է թյուրքագետ, ԵՊՀ արևելագիտության ֆակուլտետի դեկան, պ․գ․դ․, պրոֆ․ Ռուբեն Մելքոնյանը։

Բանախոսի կարծիքով, թուրքական կողմը փորձում է պատրվակներ գտնել՝ իր թշնամական քաղաքականությունը շարունակելու համար, և այդ պատրվակներից մեկը «Նեմեսիս» գործողությանը նվիրված հուշարձանն է։ Եթե այս պահանջը տեսականորեն բավարարվի, ապա թուրքական այլ պահանջներ նույնպես կան, օրինակ Հայոց ցեղասպանության հուշարձանի ապամոնտաժում, Ցեղասպանության թանգարանի փակում, ՀՀ անկախության հռչակագրի չեղարկում և այլն։

«Այս ամբողջ համայնապատկերում հօդս ցնդեց այն լավատեսությունը, որ քարոզում էին, այսպես կոչված, երկրաշարժային դիվանագիտության ջատագովները, որ հումանիտար օգնության տրամադրումը կփոխի Թուրքիայի մոտեցումը»,- նշեց Ռ․ Մելքոնյանը։

Թյուրքագետի կարծիքով, արդեն տևական ժամանակ է ինչ Թուրքիայի գործելաոճն է՝ միջամտել այլ երկրների ներքին գործերին։ Մանավանդ հիմա, երբ աշխարհում փլուզվում է, կամ փլուզվել է աշխարհակարգը, չկան զսպող մեխանիզմներ՝ Թուրքիան առավել ազատ ձեռքերով է շարունակում իր ագրեսիվ քաղաքականությունը։

Անդրադառնալով Թուրքիայում սպասվող նախագահական ընտրություններին, բանախոսը նշեց, որ 20 տարիների ընթացքում Էրդողանը կերտել է իրոք՝ էրդողանական Թուրքիա։ Սա Էրդողան քաղաքական գործչի ամփոփիչ, և իր քաղաքական կարիերան ամրագրող վերջին, կարևոր ստուգատեսն է։ Նա ամեն ինչ անելու է՝ հաղթանակը ամրագրելու համար։

Ռուս-թուրքական հարաբերությունների և Ոկրաինայում թուրքական չեզոքության վերաբերյալ պրոֆեսորը հստակեցրեց, որ ՆԱՏՕ-ի անդամ, ԱՄՆ-ի դաշնակից Թուրքիան չի կիսում ՆԱՏՕ-ի և ԱՄՆ-ի քաղաքականությունը ամբողջությամբ, և այդ թիրախ պետության՝ Ռուսաստանի հանդեպ չի իրականացնում այն քայլերը, ինչ որ անում են ՆԱՏՕ-ի մնացած անդամ պետությունները։ Սա բացահայտ ցուցիչ է, որ Արևմուտքի հետ հարաբերությունները լավ չեն և, ընդհակառակը, հարաբերություններում կան դրական շեշտադրումներ Ռուսաստանի հետ։

Այն, որ Ռուսաստանի և Թուրքիայի միջև պայմանավորվածություններ կան՝ ակնհայտ է, այն, որ կան անձնական պայմանավորվածություններ Էրդողանի և Պուտինի միջև՝ դա էլ է ակնհայտ, այն, որ նրանք պահպանում են այդ պայմանավորվածությունները նաև ջենթլմենական օրենքների շրջանակներում՝ դա էլ է ակնհայտ։ Երկուսն էլ, կարծես թե գոհ են։

«Ռուսաստանը կարող է լինել գերտերություն, կամ հավակնել գերտերության, երբ ներկայացված լինի Մերձավոր Արևելքում, ուկրաինական, պայմանական ասած, այդ տարածքներում և Հարավային Կովկասում։ Հիմա, եթե Մերձավոր Արևելքում կա, Ուկրաինայի համար պատերազմում է, Հարավային Կովկասը զիջի՝ այդ բալանսը կորելու է»,- եզրափակեց Ռ․ Մելքոնյանը։
Մանրամասները՝ տեսանյութում։

Աղբյուր` Փաստինֆո