Փաստ ինֆո

Շուշիի անկումը բոլորի պարտությունն է։ Այս մասին լրագրողների հետ զրույցում ասաց ՔԿ նախագահ Արգիշտի Քյարամյանը։

«Դա ո՛չ իշխանությունների, ո՛չ կոնկրետ ինչ-որ անհատի պարտությունն է, դա հայ ժողովրդի պարտությունն է, մեր ազգի պարտությունն է, կխնդրեի, որ այդ տեսանկյունից դիտարկեինք»,- նշեց Քյարամյանը։

Նրա փոխանցմամբ՝ այս գործով ամբողջությամբ ավարտվել է նախաքննությունը, հիմա գործը գտնվում է դատաքննության փուլում:
Քյարամյանի խոսքով՝ 44-օրյա պատերազմի ժամանակ Շուշի է գնացել որպես կամավոր ու շատ ուրախ կլիներ, որ շատերը, որպես կամավոր, լինեին այնտեղ, ըստ նրա, միգուցե, այդ պարագայում մենք Շուշին չկորցնեինք:

ՔԿ նախագահը վստահեցրեց՝ Նիկոլ Փաշինյանը երբեք չի խանգարել իրավապահ համակարգի գործունեությանը:

Անդրադառնալով 11,000 դասալիքների մասին հարցադրմանը՝ Քյարամյանը նշեց․ «Հայաստանում կան բազմաթիվ հարուցված քրեական գործեր դասալքության, տարբեր թեմաներով, ուղղակի չէի ուզենա խոսել»:

Թե որտեղից Նիկոլ Փաշինյանի կնոջը այդ տվյալները, որ 44-օրյա պատերազմի ժամանակ 11 հազար դասալիք է եղել՝ ՔԿ նախագահն ասաց, թե չի տիրապետում: Ինչ վերաբերում է 5-րդ շարասյանը, ապա Քյարամյանը նշեց, որ 5-րդ շարասյան վերաբերյալ բազմաթիվ գործեր են քննվում, գործերի մի մասի ընթացքն արդեն իսկ լուծվել է, մի մասը հանրայնացվել է, մի մասը, նախաքննական շահից ելնելով, դեռևս չի հանրայնացվել։

«Բայց կգա ժամանակը, երբ մեր հասարակությունը կստանա իրեն հուզող բոլոր հարցերի պատասխանը, հստակ կիմանա՝ ովքեր են 5-րդ շարասյան ներկայացուցիչները, ում պատճառով ու ինչի պատճառով պարտվեցինք ու պարտության հանգամանքները ոնց սկսվեցին և ոնց ավարտվեցին, ես դա ձեզ խոստանում եմ», - նշեց նա։

Աղբյուր` Փաստինֆո