Փաստ ինֆո

Արցախի խնդիրը տարանջատելով Հայաստան-Ադրբեջան հարաբերություններից և այն դիտարկելով բացառապես Բաքու-Ստեփանակերտ բանակցությունների թեմա՝ ՀՀ ներկա իշխանությունը հերթական անգամ մեզ տանում է պարտության ճանապարհով։ «Փաստինֆո»-ի հետ զրույցում նման կարծիք հնչեցրեց Արցախի «Արդարություն» կուսակցության համահիմնադիր Հակոբ Հակոբյանը։

Հայաստանի ու Արցախի բնակչության գործողությունները հնարավորիս պետք է սինխրոնացվեն։ Ստեղծված իրավիճակում անհրաժեշտություն է համահայկական ճակատի ձևավորումը։ Այդ ճանապարհին առաջ եկող բոլոր խոչընդոտները՝ լինի Հայաստանում իշխանությունների փոփոխման հարց, թե այլ խնդիր, պետք է մաիսնաբար հաղթահարենք։ Ի դեպ, Սփյուռքի աջակցության կարիքը ևս կա․ հիմա, առավել քան երբևէ, միասնաբար պետք է գործենք»,-ասաց Հակոբյանը։

Համահայկական ճակատ ձևավորելու նախադրյալները, Հակոբյանի համոզմամբ, կան․ դրանք տարբեր տեղերում գործող նախաձեռնող խմբերն են, որոնք ունեն մեկ ընդհանուր նպատակ և ինչ-որ պահի պետք է, որ կարողանան միավորվել։

Արցախում ձևավորված նշված խմբերից մեկի նախաձեռնությամբ մեկնարկած՝ «Ո՛չ Արցախի էթնիկ զտմանը» պահանջով ստորագրահավաքը, Հակոբյանի խոսքերով, ժողովրդի հավաքական կամքը ևս մեկ անգամ ցույց տալու ձև է և կարող է գործնականում օգնել ժողովրդի համախմբմանը․

«Ես չեմ կարծում, թե ստորագրահավաքը նախաձեռնած խումբը մտածում է, թե ստորագրությունների, ասենք, X քանակ հավաքվելու դեպքում Ադրբեջանի դրած անցակետը միանգամից ապամոնտաժվելու է, բայց նրանք համոզված են, որ ստորագրահավաքով հնարավոր է դնել ժողովրդին համախմբելու գործընթացի սկիզբը։ Դա գործընթաց է, որում ներգրավված են հասարակության լայն շերտերը, և այն, որ մի քանի օրվա մեջ արդեն մոտ 35 հազար հոգի են միացել են նախաձեռնությանը, կարևոր ցուցիչ է»։

Կապված իշխանությունների ներկայացուցիչների մասնակցությամբ այս օրերին ուժային տարբեր կենտրոններում ընթացող քաղաքական գործընթացների հետ՝ Հակոբյանը մտավախություններ ունի։

«Փաշինյանն ու իր թիմը 2018 թվականին իշխանության եկան Արցախը հանձնելու և Հայաստանի, ինչպես ինքն է ասում, 29,8 հազար քառ․ կմ պաշտպանելու համար, բայց համոզված եմ, որ անգամ իր հռչակած կարմիր գիծը՝ 29,8 հազար քառ․ կմ-ը, պահել չի հաջողվելու․․․»-ասում է Հակոբյանն ու հավելում, որ որևէ հարցում հաջողություն չենք ունենալու, քանի դեռ հայկական կողմը բանակցությունների առարկայից բանակցային կողմի չի վերադարձել։

Աղբյուր` Փաստինֆո