Փաստ ինֆո

Երևանի կենտրոնում տեղադրված Նեմեսիսի հուշարձանի ապամոնտաժման վերաբերյալ որևէ հարց չի քննարկվել ո՛չ մեր ֆրակցիայում, ո՛չ գործադիրի նիստում: Այս պահի դրությամբ օրակարգում այդպիսի հարց չկա: «Փաստինֆո»-ի հետ զրույցում այս մասին ասաց Երևանի ավագանում «Իմ քայլը» խմբակցության անդամ Աշոտ Սարգսյանը՝ անդրադառնալով Չավուշօղլուի հայտարարությանը, թե Նեմեսիսի հուշարձանը չապամոնտաժելու դեպքում Թուրքիան կդիմի լրացուցիչ քայլերի:

«Չավուշօղլուն հազար ու մի տեսակի հայտարարություն կարող է անել: Դա որևէ բան չի նշանակում: Մենք էլ 100 տարուց ավելի հայտարարություն ենք տարածում ու պահանջում ենք, որ Թուրքիան ճանացի ցեղասպանությունը: Սա, չասեմ միայն քաղաքական... սա մեր ներքին գործն է՝ որտեղ ինչ հուշակոթող պետք է տեղադրել: Դա իրենց չվերաբերող հարց է: Մենք իրենց ներքին գործերին չենք խառնվում»,- ասաց նա:

ՀՀ վարչապետ Նիկոլ Փաշինյանը օրեր առաջ հայտարարել էր, որ Նեմեսիսի հուշարձանի տեղադրման մասին որոշումը սխալ է եղել: Հիշեցնելով այս հայտարարության մասին` «Փաստինֆո»-ն հետաքրքրվեց` բացառո՞ւմ է հետագայում այդ հարցի՝ օրակարգում հայտնվելու հնարավորությունը՝ Սարգսյանն ասաց, որ ինքը կարող է հստակ հայտարարել, որ այդ հարցն այս պահին օրակարգում չկա, իսկ հետագա իրադարձությունների մասին որևէ բան ասել չի կարող:

«Ես չեմ կարող ասել, թե ապագայի համար ինչ քննարկումներ կարող են լինել: Ինչպե՞ս կարող եմ ասել: Այս պահի դրությամբ չունենք ո՛չ քննարկում, ո՛չ որոշում»,- ասաց նա:

Ավելի վաղ Թուրքիայի արտգործնախարար Մևլութ Չավուշօղլուն անդրադարձել էր Երևանում տեղադրված Նեմեսիսի հուշակոթողին: Նա հայտարարել էր, որ հուշարձանը պետք է անհապաղ ապամոնտաժել` սպառնալով հակառակ պարագայում չբավարարվել միայն Հայաստանի հետ օդային ճանապարհը փակելով, և ձեռնարկել լրացուցիչ միջոցներ:

Աղբյուր` Փաստինֆո