Փաստ ինֆո

Գրիգորի Խաչատուրովի վերաբերյալ որևէ դրվագ չկա, որը պետք է, որ գաղտնիության շղարշով պատված լիներ։ Այս մասին լրագրողների հետ զրույցում ասաց փաստաբան Միհրան Պողոսյանը՝ Գեներալ-մայոր Գրիգորի Խաչատուրովի գործով նախնական դատական լսումների ավարտին՝ արձանագրելով, որ հանրային հետաքրքրություն ներկայացնող գործը դռնփակ ռեժիմով քննելու առիթ ու պատճառ չկար։

Այս առնչությամբ պաշտպանական խումբն իրավական հիմնավորումներ է ներկայացրել, նախնական դատական լսումները դռնբաց ռեժիմով անցկացնելու վերաբերյալ միջնորդություն է ներկայացրել, սակայն դատարանը այն մերժել է՝ հիմք ընդունելով միայն այն հանգամանքը, որ դատախազությունը ընդհանուր քրեական գործին է գաղտնիության շղարշ տվել։

«Բայց դատական նիստի ժամանակ մեղադրողը ևս ընդունեց, որ Գրիգորի Խաչատուրովի վերաբերյալ դրվագներում գաղտնի փաստական տվյալներ, գաղտնի ապացույցներ չկան։ Ուղղակի տեխնիկական բնույթից ելնելով, քանի որ մի քանի գործեր են միացված, որոնք ընդհանրապես վերաբերելի չեն Գրիգորի Խաչատուրովին, և դրանց մի մասը գաղտնի է, այդ իսկ հիմքով ընդհանուր գործը քննվում է գաղտնի»,- նշեց Պողոսյանը։

Ըստ պաշտպանական կողմի՝ գնահատում է որպես Գրիգորի Խաչատուրովի իրավունքների խախտում է։

«Մենք սա գնահատում ենք Գրիգորի Խաչատուրովի հրապարակային  դատաքննության իրավունքի խախտում։ Դրա հետ կապված՝ հաջորդ դատական նիստին, մեր գործողությունները լրամշակելով, գործողություններ կանենք այդ ուղղությամբ, սակայն  այս պահին կարող եմ ասել, որ ընդհանրապես գաղտնի որևէ բան չի ներկայացվել»,- մանրամասնեց փաստաբանը։

Նրա խոսքով՝ Քրեական դատավարության օրենսգրքի առանձնահատկություններից ելնելով՝ դատարանը առաջարկել է նաև, որ պաշտպանական կողմը պետական գաղտնիքի չբացահայտման վերաբերյալ ստորագրություն տա։

«Մենք պնդեցինք, որ մեզ ներկայացնեն՝ որն է հանդիսանում պետական գաղտնիքը, դատարանն ինքը ևս մեզ չկարողացավ տեղեկացնել, թե որն է հանդիսանում պետական գաղտնիք, և պաշտպաններից ու մասնակիցները շատերը հրաժարվեցին ստորագրել այդ տեղեկատվական թերթիկը»,- ասաց Միհրան Պողոսյանը՝ հավելելով, որ դատարանի համար էլ է անհասկանալի, որ եթե գործով ընդամենը մի դրվագ է գաղտնի հանդիսանում, որը վերաբերելի չէ մեղադրյալների մեծամասնությանը, ինչո՞ւ է ընդհանուր գործը քննվում դռնփակ

Փաստաբանի դիտարկմամբ՝ Գրիգորի Խաչատուրովի տրամադրությունը, ինչպես միշտ, մարտական էր։

Աղբյուր` Փաստինֆո