Փաստ ինֆո

Հակակոռուպցիոն դատարանում՝ դատավոր Արամ Գրիգորյանի նախագահությամբ, «Բարգավաճ Հայաստան» կուսակցության նախագահ Գագիկ Ծառուկյանի և «Մուլտի Գրուպ» ընկերության գլխավոր տնօրեն Սեդրակ Առուստամյանի գործով առաջին դատական նիստը հետաձգվեց։

Հիշեցնենք, որ նշված քրեական վարույթը վերաբերում է Ազգային ժողովի՝ 2017 թվականի ապրիլի 2-ի ընտրություններին մասնակցած կուսակցությունների դաշինքի և դրա կողմից առաջադրված թեկնածուի օգտին քվեարկելու համար ընտրողներին ենթադրաբար կաշառք տալուն:

Նրանց մեղադրանք է ներկայացվել ՀՀ քրեական օրենսգրքի 219-րդ հոդվածի 1-ին մասով, այն է՝ ընտրակաշառք տալը։ Նրանք առաջադրված մեղադրանքը չեն ընդունում։

«Փաստինֆո»-ի թղթակցի հաղորդմամբ՝ դատարանում այսօր պետք է տեղի ունենային նախնական դատալսումները, ակայան դատարանը հասցրեց պարզել միայն մեղադրյալների ինքնությունը, ապա նիստը հետաձգվեց, քանի որ Գագիկ Ծառուկյանը մեղադրական եզրակացությունը ստացել էր միայն այսօր և չէր հասցրել ծանոթանալ դրան։ Նիստը հետաձգվեց՝ մինչև մայիսի 23-ը, ժամը՝ 11.00-ն։

Դատական նիստի ավարտից հետո Գագիկ Ծառուկյանը լրագրողների հետ զրույցում ասաց, որ առնչություն չունի խուզարկությամբ հայտնաբերված ցուցակներին. «Եսիմ որ գյուղում ով կա, ես ինչ կապ ունեմ ասենք դրա հետ»։

Դիտարկմանը, որ ըստ գործի՝ Վազգեն Պողոսյանին Ծառուկյանն է կանչել, ասել, որ ցուցակում լինի, Ծառուկյանը նշեց. «Ճանաչելով այդ մարդուն, որ հարգանք ունի, բոլորն իրեն ընդունում են, ասել եմ, որ մասնակցի, հաջողության դեպքում համապատասխան գործ կտանք»։ Գագիկ Ծառուկյանը զերծ մնաց մեղադրանքի վերաբերյալ հարցերին պատասխանելուց. «Ուզում եմ խորիմաստ հարց»։ Նախաքննության ընթացքում Գագիկ Ծառուկյանը ցուցմունք տվել է, մեղքը չի ընդունել։ Սեդրակ Առուստամյանը լրագրողների հետ զրույցում ևս նշեց, որ մեղադրանքը չի ընդունում, այլապես, գործը վաղեմության հիմքով արդեն կարճված կլիներ, թեև այժմ էլ Առուստամյանի նկատմամբ, միևնույն է, պատիժ չի նշանակվի։

Նախաքննության ընթացքում Առուստամյանն առերեսվել է Վազգեն Պողոսյանի հետ։

Հեղինակ՝ Իզաբել Սահակյան

Աղբյուր` Փաստինֆո