Փաստ ինֆո

Գեղարքունիքի մարզի Ազատ գյուղի տարածքում տեղակայված զորամասի ինժեներասակրավորային վաշտի կացարանում ողբերգական հրդեհի հետևանքով զոհված 15 զինծառայողների դիակների դատաբժշկական փորձաքննության եզրակացությունները նոր հարցեր են առաջացնում, զինծառայողների ծնողները հակված չեն դրանց վստահելու և լրացուցիչ փորձաքննություն են պահանջում։ Տուժողների իրավահաջորդների ներկայացուցիչ, փաստաբան Նորայր Նորիկյանը «Փաստինֆո»-ի հետ զրույցում ասաց, որ միջնորդություն է ներկայացրել՝ դատաբժշկական լրացուցիչ փորձաքննություն իրականացնելու վերաբերյալ։

Ըստ նրա՝ լրացուցիչ փորձաքննության, ինչպես նաև՝ հրդեհատեխնիկական-պայթյունատեխնիկական, նյութագիտական և ապրանքագիտական համալիր փորձաքննությունների եզրակացությունները ստանալուց հետո տուժող կողմը կհամադրի փաստաթղթերը, գործի փաստական հանգամանքները և կքննարկի դատաբժշկական կրկնակի փորձաքննություն անցկացնելու վերաբերյալ միջնորդություն ներկայացնելու հնարավորության հարցը։ Այս դեպքում, քանի որ Քրեական դատավարության օրենսգիրքը հստակ ընդգծում է, որ քննիչը կարող է լրացուցիչ փորձաքննություն նշանակել, եթե եզրակացությունը թերի, անորոշ է և, նկատի ունենալով, որ եզրակացությամբ զինծառայողների մահվան հանգամանքները նշվում են երկուսը՝ շմոլ գազի թունավորումը և այրվածքային շոկը, տուժող կողմը միջնորդություն է ներկայացրել՝ ուշադրություն հրավիրելով այդ հանգամանքի վրա՝ ակնկալելով տարրանջատել, թե դրանցից յուրաքանչյուրի կոնկրետ ժամը, արդյո՞ք դրանք միաժամանակ են վրա հասել, շմոլ գազի տարածումից հետո մահվանը հասցնելու ժամանակահատվածը։ Նշենք, որ մեղադրյալ Եղիշե Հակոբյանի և ողջ մնացած մյուս զինծառայողների մոտ շմոլ գազի թունավորում չի արձանագրվել, այդ հարցին տուժող կողմը ևս անդրադարձել է՝ միջնորդության շրջանակներում։

Ի դեպ, Նորայր Նորիկյանն ավելի վաղ ահազանգել էր, որ դեպքի վայրի խախտում է եղել։ Մասնավորապես, զինծառայողների մարմինները տեղափոխվել էին դիահերձարան՝ մինչև քննիչների՝ դեպքի վայր ժամանելը և դեպքի վայրում քննչական գործողություններ իրականացնելը, ավելին, առկա չեն լուսանկարներ՝ դիակների նախնական տեղակայման, տեղափոխման վերաբերյալ։ Նորիկյանը նշեց, որ ՀՀ ՊՆ և ՆԳՆ նախարարներին ուղղված փաստաբանական հարցման արդյունքում է ստացել պատասխանը, որ դեպքի վայրը, ըստ էության, խախտվել է, չի պահպանվել, զինծառայողների դիերը տեղափոխվել են ՆԳՆ և ՊՆ հրդեհաշիջման աշխատանքներ իրականացնող համապատասխան ստորաբաժանումների կողմից։ Դեռևս հայտնի չէ՝ վարույթն իրականացնող մարմինը դեպքի վայրի խախտման ուղղությամբ քննություն իրականացնում է, թե՝ ոչ, ըստ Նորիկյանի, գործի քննության արդյունքներով պարզ կերևա՝ այդ ուղղությամբ վարույթն իրականացնող մարմինն ինչ գործողություններ է իրականացրել և ինչ արդյունքներ է արձանագրել, առկա՞ է արդյոք անփութություն, ի վերջո, որն է տրամաբանությունը, որ առանց վարույթն իրականացնող մարմնի, դեպքի վայրի զննության, առանց դեպքը՝ վարույթն իրականացնող մարմնին հանձնելը զինծառայողների դիերը հանձնվել են։ Առավել խնդրահարույց է այն, որ պնդում են, թե տեսանկարահանում չի իրականացվել, ինչին Նորիկյանը չի հավատում, նշում է՝ անհավանական է, որ նման ծավալի ողբերգության պայմաններում այդ աշխատանքներն իրականացնելիս տեսալուսանկարահանում, տեսաձայնագրում իրականացված չլիներ, որն է այդ անփութության պատճառը։ Իսկ թե արդյո՞ք դիտավորություն են տեսնում, Նորիկյանը պատասխանեց. «Ես չեմ կարող այս պահին այդ հարցի պատասխանը տալ, բայց դա պարտադիր պետք է արվեր։ Նախ՝ դեպքի վայրը չպետք է խախտվեր, որևէ մեկն իրավասու չէր և երկրորդը՝ նույնիսկ այդ պայմաններում իրենք պարտավոր էին հնարավորինս տեսաձայնագրել, տեսալուսանկարահանել, որ հասկանայինք, թե ինչ դիրքով, ինչ պայմաններում, ինչ իրավիճակ է եղել՝ մինչև զինծառայողների մարմիններն այդտեղից տեղափոխելը»։

Նորիկյանը նշեց, որ գործի քննությունն այս պահին ակտիվ քննչական փուլում է գտնվում, նշանակված է հրդեհատեխնիկական համալիր փորձաքննություն, որին տուժողներից վեցը ծնող ներգրավված են որպես փորձաքննությանը մասնակից՝ տուժող կողմի միջնորդության հիման վրա քննիչի որոշմամբ։ Ծնողների մեծ մասն արդեն ցուցմունք են տվել, վերջերս իրականացվել է քննչական փորձարարություն՝ դեպքի վայրում։ Տուժող կողմը վստահեցնում է՝ հետևողական են լինու, որևէ տվյալ չի սպրդելու։ Նորիկյանը նշեց, որ մեղադրյալների թիվը չի սահմանափակվելու այս հինգով, վստահեցրեց՝ ամեն ինչ արվելու է, որ մեղադրյալների շրջանակը մեծանա, ընդ որում, ավելի բարձրաստիճան պաշտոնյաների մակարդակով։

Անդրադառնալով ծնողների և Նիկոլ Փաշինյանի հանդիպմանը՝ Նորիկյանը նշեց, որ ինքը կառավարության պահանջով չի մասնակցել փակ հանդիպմանը, թեև ծնողներն իրեն տեղեկացրել են հանդիպման բովանդակության մասին, ինքը կոռեկտ չի համարում փակ հանդիպման վերաբերյալ հրապարակային տեղեկություններ հրապարակելը։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից կալանքի տակ են եղել ի սկզբանե երկուսը։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու գտնվում է հիվանդանոցում, 2.5 ամիս ազատության մեջ մնալուց հետո նա կալանավորվել է։ Տուժող կողմը հայտարարել է, որ չի վստահում պաշտոնական վարկածին ու սկսել են սեփական հետաքննությունն իրականացնել։

Հեղինակ՝ Իզաբել Սահակյան

Աղբյուր` Փաստինֆո