Փաստ ինֆո

Մայիսի 1-ին և 2-ին Արցախում տեղացած կարկուտ զգալի վնաս է հասցրել ցանքատարածություններին, պղտատու ծառերին, տնամերձ հողատարածքներին։ Առավելապես տուժել են Մարտակերտի ու Ասկերանի շրջանները։ Վնասի չափը ճշգրտել առայժմ չեն հասցրել ո՛չ Մարտակերտում, ո՛չ Ասկերանում, քանի որ կարկուտին հետևել են անձրևները, բայց միայն Մարտակերտի շրջանում 13 գյուղ այն աստիճան է կարկտահարվել, որ ամբողջական ցանքատարածություններ են ոչնչացվել։

«13 գյուղ ահավոր տուժել է կարկուտից․ այդ համայնքներից են՝ Մեծ Շենը, Մոխրաթաղը, Կիչանը, Չլդրանը, Ներքին Հոռաթաղը, Մաղավուզը, Մարտակերտը և այլն։ Շրջափակումից հետո մարդիկ 20 սմ անմշակ հող չէին թողել տնամերձներում, բայց կարկուտը սաղ քշել, տարել է։ Սածիլները պոկել, ցանքսերը, կարտոֆիլի դաշտերը հեղեղը տարել է ․․․ Պտղատու ծառերն էլ, գարնանացան մշակաբույսերն էլ ահագին վնասվել են։ Հաջորդ օրն աառվոտյան ժամը 7-ի կողմերն էլ Մարտակերտ քաղաքային համայնքում է տեղացել կարկուտ․ այնտեղ էլ տնամերձ հողատարածքներում ինչ ցանել էին բնակիչները, քշել տարել է»,-«Փաստինֆո»-ի հետ զրույցում ասում է Մարտակերտի շրջանի գյուղբաժնի ղեկավար Կարեն Հովհաննիսյանը։

Վնասի ստույգ չափը պարզելու համար, ինչպես նշեց մեր զրուցակիցը, առնվազն մի քանի օր կպահանջվի՝ այն էլ այն դեպքում, եթե եղանակը բացվի։ վերջին օրերին անդադար անձևներ են Արցախում, ինչը խանգարում է դաշտային աշխատանքներին։

Կարկուտից տուժել են նաև Ասկերանի գյուղերը։ Այստեղ ևս վնասի վերջնական չափը ճշգրտել չեն հասցրել՝ դարձյալ եղանակային անբարենպաստ պայմանների պատճառով։ Ինչպես «Փաստինֆո»-ին հայտնեց շրջանի վարչակազմի ղեկավարի տեղակալ Կարեն Աղաջանյանը, առնվազն 7-8 գյուղական համայնք, տուժել է կարկուտից։

«Մոտավորապես 280-290 հա գյուղատնատեսկան հողատարածքներ են կարկտահարվել՝ այդ թվում գարնանացան մշակաբույսերի ցանքատարածություններ, այգիներ, մեծ թվով տնամերձ հողատարածքներ․․․Միայն 40-50 հա տնամերձ հողատաարածք է վնասվել, 4 հա՝ կարտոֆիլի դաշտեր։ Տնամերձներում ահագին պտղատու ծառեր կային, որ ծաղկման փուլում էին, կամ ծաղկումն ավարտվել էր»,-ասում է Աղաջանյանը։

Մայիսի 1-ին տեղացած կարկուտից Ասկերանի շրջանի ամենաշատ տուժած բնակավայրերից են՝ Պատարան, Ծաղկաշատը, Խաչենը, Աստղաշենը, Խնձրիստանը և այլն։

Մեծապես տուժել են նաև ջերմոցային տնտեսությունները։ Կարեն Հովհաննիսյանի խոսքով՝ Մարտակերտի շրջանում մոտ 90 ջերմոցներ տարբեր աստիճանի վնասներ են կրել։

Այստեղ են ասել՝ կարկուտը ծեծած տեղն է ծեծում․․․ Հերիք չի՝ Արցախը գրեթե 5 ամիս շրջափակված է թշնամու կողմից, ու մեր հայրենակցիներն ամեն օր ապրում, պայքարում են ստեղծված անելանելի պայմաններում, հիմա էլ բնությունն է ձեռնոց նետել․․․

Աղբյուր` Փաստինֆո