Փաստ ինֆո

«Ալիևն այսօր շատ պարզ հայտարարություն է արել՝ 2020 թվականի նոյեմբերի 9-ի փաստաթուղթն, ինքն այլևս չի ճանաչում։ Պետք է նոր փաստաթուղթ, որի շուրջ հենց այս պահին՝ ԱՄՆ միջնորդությամբ, Վաշինգտոնում Միրզոյան – Բայրամով բանակցություններն են ընթանում»,- «Փաստինֆո» -ի հետ զրույցում ասել է քաղաքագետ Ստեփան Դանիելյանը՝ մեկնաբանելով այսօր Ադրբեջանի նախագահ Իլհամ Ալիևի կողմից հնչեցված հայտարարությունը։

Տեղեկացնենք, որ այսօր Շուշիում ընթացող «Մեծ Եվրասիայի աշխարհաքաղաքականության ձևավորում. անցյալից ներկա և ապագա» միջազգային գիտաժողովի բացման ժամանակ Ալիևը հայտարարել է. « 2020 թվականի նոյեմբերի 9-ի եռակողմ հայտարարությունը ո՛չ զինադադար է, ո՛չ խաղաղության պայմանագիր»։

Քաղաքագետը նկատում է՝ եթե, ըստ Ալիևի հայտարարության, նոյեմբերի 9-ի փաստաթուղթն, այլևս, առ ոչինչ է, ուրեմն ռուսական խաղաղապահների ներկայությունն Արցախում, այլևս օրինական չէ. «Եվ եթե, հանկարծ, հայաստանյան կողմն էլ, Ալիևի այս թեզը պաշտպանող որևէ փաստաթուղթ ստորագրի, սա նշանակում է վերջ՝ խաղաղապահ առաքելություն իրականացնող ռուսական զորամիավորումը պետք է դուրս գա Արցախից։ Ի դեպ, սա բոլորովին պատահական հայտարութուն չէ Ալիևի կողմից, եթե հաշվի առնենք, որ հենց այս օրերին՝ Վաշինգտոնում, տեղի են ունենում Հայաստանիև Ադրբեջանի արտգործնախարարների բանակցային հանդիպումները, որով թե՛ ամերիկյան, թե՛ ադրբեջանական կողմը ցանկանում է հասնել հայկական կողմի համաձայնությանը, այն է՝ ստանալ մի վավերական փաստաթուղթ, որով Հայաստանն Արցախը ճանաչում է որպես Ադրբեջանի տարածքային ամբողջականության մաս»։

Քաղաքագետը հավելում է՝ իհարկե հայաստանյան իշխանությունների, մասնավորապես՝ Փաշինյանի և Արտաքին գործերի նախարար Միրզոյանի բերանից այս մասին մեկ անգամ չէ, որ հայտարարվել է, սակայն, այս պահի դրությամբ, փաստացի փաստաթուղթ այդ հարցի առնչությամբ, դեռևս չկա։

Բանախոսը չի բացառում, որ Արարատ Միրզոյանը Վաշինգտոնից կվերադառնա հենց այդպիսի փաստաթուղթ ստորագրած, որով ռուսական կողմին կպարտավորվի հեռացնել խաղաղապահ զորամիրավորումն Արցախի տարածքից, իսկ սրան անխուսափելիորեն հետևելու է ռուսական 102-րդ ռազմաբազայի հեռացումը՝ Հայաստանի տարածքից, որով, ըստ քաղաքագետի, ոչ միայն Արցախի հարցը կլուծվի, այլև աստիճանաբար՝ փուլ առ փուլ վրա կհասնի նաև Սյունիքի հարցը, այսպիսով՝ ոչ միայն Արցախն ու Սյունիքն, այլևս ողջ Հայաստանը թողնելով թուրք - ադրբեջանական վերահսկողության ներքո։

Աղբյուր` Փաստինֆո