Փաստ ինֆո

ՊԵԿ նախկին նախագահ Գագիկ Խաչատրյանը մայիսի 1-ին շտապ կարգով տեղափոխվել է հիվանդանոց և վիրահատվել, այժմ գտնվում է հիվանդանոցում։ Նրա վիճակն այժմ բավարար է գնահատվում։ Տեղեկությունը «Փաստինֆո»-ի հետ զրույցում հայտնեց փաստաբան Երեմ Սարգսյանը։

Այսօր Երևանի ընդհանուր իրավասության դատարանում նշանակված էր Գագիկ Խաչատրյանի գործով դատական նիստը, որը չի կայացել հենց այդ պատճառով։

Նշենք, որ Գագիկ Խաչատրյանի առողջական վիճակի մասին պաշտպանության կողմը բարձրաձայնել է ի սկզբանե՝ դեռևս 2019թ., երբ գործը նախաքննության փուլում էր, սակայն իրավապահները տևական ժամանակ շարունակում էին կ նրան ալանքի տակ պահել, իսկ պաշտպանների միջնորդությունները՝ Խաչատրյանին արտերկրում բուժում ստանալու թույլտվության վերաբերյալ, մերժվում էին։ Նրա խափանման միջոցը փոխվել է միայն ՄԻԵԴ որոշումից հետո, որով արձանագրվել էր խոշտանգման փաստը։

Գործի քննության ընթացքում Երևանի ընդհանուր իրավասության դատարանը ՊԵԿ նախկին նախագահ Գագիկ Խաչատրյանին թույլատրել էր մեկնել Հայաստանից բուժման նպատակով։ Վերջինս 2023 թվականի հունվարի 20-ից մինչև փետրվարի 10-ը բացակայել էր երկրից։

Հիշեցնենք, որ ըստ մեղադրանքի՝ ՊԵԿ նախկին նախագահ Գագիկ Խաչատրյանը, իր ազգականներին նյութական օգուտ տալու անձնական շահագրգռվածությունից ելնելով, պաշտոնեական դիրքը ծառայության շահերին հակառակ օգտագործելով, իրենից ծառայողական կախվածության մեջ գտնվող տեղակալի՝ Տիգրան Տարիելի Բարսեղյանի, ինչպես նաև պաշտոնատար և այլ անձանց մասնակցությամբ, ՀՀ օրենսդրության և ՀՀ կառավարությանն առընթեր ՊԵԿ կողմից կնքված պայմանագրի դրույթների խախտմամբ, ապահովել է ՀՀ պետական բյուջեի հանդեպ 79.372.897.900 ՀՀ դրամ պարտավորությունների դիմաց «Հայգազարդ ՓԲ ընկերության կողմից ՀՀ պետական եկամուտների կոմիտեում 2011թ. ապրիլի 18-ի պայմանագրով գրավադրված Հիդրոապարատ ԲԲ ընկերության 132.615 հատ բաժնետոմսերի շուկայականից էապես ցածր գնով՝ 34.328.964 ՀՀ դրամով իրացումը քրոջ և եղբոր որդիների՝ Ռուբիկ Գասպարյանի և Արամ Խաչատրյանի մասնակցությամբ հիմնադրված «Մոնդո Դի Մոբիլի» ՍՊ ընկերությանը, իսկ ներդրում կատարելու վերաբերյալ մրցույթի անցկացման պարտադիր պայմանը նշված ընկերության հետ կնքված 2012թ. հուլիսի 2-ի բաժնետոմսերի առուվաճառքի պայմանագրում չներառելու հետևանքով ապահովել է «Մոնդո Դի Մոբիլի» ՍՊ ընկերության ազատումը 5.000.000 եվրոյին համարժեք 2.624.000.000 ՀՀ դրամ ներդրում կատարելու պարտավորությունից: Նշված գործողությունների հետևանքով խախտվել է պետական մարմինների բնականոն գործունեությունը, խաթարվել է պետական բյուջեի նկատմամբ առկա պարտավորությունների դիմաց գրավադրված գույքի իրացման գործընթացը, անհավասար պայմաններ են ստեղծվել իրացման գործընթացի հնարավոր այլ մասնակիցների համար, որի արդյունքում պետությանը պատճառվել է 34.328.964 ՀՀ դրամի, իսկ կազմակերպությանը՝ 2.624.000.000 ՀՀ դրամի նյութական վնաս, որն առաջացրել է ծանր հետևանքներ: Նույն գործով մեղադրյալի կարգավիճակում է նաև նրա եղբորորդին՝ Կարեն Խաչատրյանը։ Գագիկ և Կարեն Խաչատրյանները մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո