Փաստ ինֆո

Նախնական պայմանավորվածություն կա, որոնց համաձայն ԱԳ նախարարների հանդիպում պետք է լինի նաև Մոսկվայում։ Այս մասին լրագրողների հետ զրույցում ասաց ԱԺ «ՔՊ»-ական պատգամավոր Արման Եղոյանը։

«Բանակցությունները անդրադառնում են հայ-ադրբեջանական հարաբերությունների ամբողջ սպեկտրին, ինչքան հարց կա՝ չլուծված։ Բնականաբար այդ բոլոր հարցերով արվելու է ամեն ինչ՝ համաձայնության հասնելու համար՝ հայկական կողմն իր համար շահավետ լուծման, իրենք էլ՝ իրենց կողմից»,- նշեց Եղոյանը։

Անդրադառնալով լրագրողի դիտարկմանը, որ բանակցությունները միշտ ի օգուտ Հայաստանի չեն եղել, հնարավո՞ր է՝ գնանք նոր զիջումների, նշեց. «Համաձայն չեմ Ձեզ հետ, որ բանակցություններն ի օգուտ Հայաստանի չեն եղել, պատերազմն ի օգուտ Հայաստանի չի եղել»։

Հարցին՝ ինչ բանակցություններ են ընթանում, Արցախի հարցն էթնիկ փոքրամասնությունների մակարդակին չի՞ իջեցվել, Եղոյանը պատասխանեց. «Մենք հիմա անում ենք ամեն ինչ, որ կայանա Բաքու-Ստեփանակերտ երկխոսությունը, այսինքն, Ստեփանակերտը հանդես գա բանակցություններում՝ որպես սուբյեկտ»։ Ինչ վերաբերում է «Հարաբերությունների կարգավորման համաձայնություն» նախագծին, որը քննարկվում է, Եղոյանը նշեց, որ դա այն փաստաթուղթն է, որի մասին վերջին ամիսներին լսում ենք, որ մենք ենք խմբագրել, իրենք, իսկ թե արդյոք փաստաթղթի անունը՝ «Խաղաղության պայմանագրից» փոխվել է և որ պահից՝ Եղոյանը զերծ մնաց մանրամասնելուց՝ նշելով, թե բովանդակության մասին չի կարող ոչինչ ասել։

«Հիմա փաստաթուղթն այդպես է կոչվում։ Դուք ուզում եք ես ասեմ, թե առաջ ինչպես է կոչվում։ Մարդիկ այդպես էին ասում (Խաղաղության պայմանագիր խմբ.), գոյություն ունի խոսակցական լեզու, որտեղ մարդիկ մատնանշում են որոշակի երևույթներ, գոյություն ունի նաև իրավական լեզու»,- նշեց Եղոյանը։

Եղոյանը նաև վստահեցրեց, որ ՀՀ-ն երբեք չի քննարկել «Զանգեզուրի միջանցքը», համաձայնություն չի տվել և նման էքստրատերիտորիալ միջանցք ՀՀ-ից չի կարող տրվել այլ պետության։

Աղբյուր` Փաստինֆո