Փաստ ինֆո

«Արցախի կորուստը ուղղակի նշանակելու է դուռ բացել` հաջորդ կորուստների համար, և մենք ոչ մի երաշխիք երբևէ չենք ունենա»։ «Ազատություն» ռադիոկայանի ֆեյսբուքյան ասուլիսի ընթացքում ասել է Արցախի հանրապետության պետնախարարի խորհրդական Արտակ Բեգլարյանը:

Նա հայտարարել է, որ Արցախը պատրաստ է դիմագրավել Ադրբեջանի ագրեսիաներին, եւ ակնկալում են, որ Հայաստանի որեւէ պաշտոնյա որևէ ձևով հրապարակային չկրկնի Ադրբեջանի թեզերը և չվնասի մեր երկարաժամկետ պայքարին:

«Հայաստանից ակնկալում ենք բոլոր հնարավոր ձևերով աջակցություն Արցախին։ Արցախը հնարավորինս անելու է ամեն ինչ դիմագրավելու համար, բայց երկարաժամկետ դիմագրավել հանարավոր չէ այս պայմաններում, երբ Արցախը շրջափակման պայմաններում արտաքին աշխարհից և բոլոր նյութատեխնիկական հնարավորություններից կտրված է , այն էլ այսպիսի սպառազինության եւ քանակական լայն տարբերության պայմաններում բնականաբար հնարավոր չէ երկարաժամկետ պատերազմ մղել։ Ամեն դեպքում մենք կամքի տեսանկյունից պատրաստ են լրացուցիչ ագրեսիաների դիմակայել, հույս ունենք, որ ըստ կարիքի միջազգային հանրությունը, խաղաղապահներն ու ամբողջ հայ ժողովուրդը, Հայաստանի Հանրապետությունը, բոլոր ձեւերով մեր կողքին կանգնելու են` նախ կանխելու պատերազմը, իսկ պատերազմական գործողությունների ժամանակ` աջակցելու պատշաճ քաղաքական, ռազմական, դիվանագիտական եւ այլ գործիքակազմերով», - ասել է Արտակ Բեգլարյանը` պատասխանելով օգտատերերից մեկի այն հարցին, թե ինչ ակնկալիքներ ունեն Նիկոլ Փաշինյանից, ՀՀ իշխանություններից:

Արցախի պետնախարարի խորհրդականը հայտարարել է, որ ամբողջ Արցախի ժողովրդի մոտ հստակ մի ակնկալիք կա` որ Հայաստանի Հանրապետության որևէ պաշտոնյա որևէ ձևով հրապարակային չկրկնի Ադրբեջանի թեզերը և չվնասի մեր երկարաժամկետ պայքարին` ինքնորոշման իրավուքի մասով և որևէ մեկը չասի որ Արցախը Ադրբեջանի մաս է կազմում կամ Արցախը Ադրբեջանի տարածքային ամբողջականության մեջ է մտնում: «Սա եւ իրավական և դիվանագիտական տեսանկյունից բավականին մեծ ռիսկեր ու վտանգներ է պարունակում երկարաժամկետ ինքնորոշման իրավունքի պաշտպանության և ճանաչման պայքարում», - ասել է Արտակ Բեգլարյանը

Նա արձանագրել է, որ բավականին վտանգներ են կախված Արցախի գլխին։ «Այս տեսանկյունից Արցախն ու Հայաստանը պետք է դիտարկել մեկ ամբողջություն, որովհետև ամբողջական համահայկական հայրենիքի մաս ենք մենք կազմում` իր ամբողջ համակարգով: Այս համակարգը չպետք է ջլատել, որովհետև Արցախն ինքնին բավականին լուրջ նշանակություն ունի և իրական դաշտում, և ինքնության հոգեբանական առումով` ամբողջ հայ ժողովրդի եւ ՀՀ-ի համար։ Կորցնել Արցախը նշանակում է, որ Հայաստանի Հանրապետությունը շատ շատ մեծ կորուստ է ունենում`բոլոր համակարգերում եւ շատ ավելի խոցելի է դառնում», - ընդգծել է Ա. Բեգլարյանը։

Աղբյուր` Փաստինֆո