Փաստ ինֆո

«Երբ Հայաստանի ղեկավարությունը պարզ կերպով հայտարարում է, որ Արցախն Ադրբեջան է, երբ Հայաստանի Հանրապետության Ազգային Ժողովի պատգամավորն ասում է, թե պատրաստ է Թուրքիայի հետ բարիդրացիական հարաբերություններ կառուցել, երբ կան գեներալներ, ովքեր այստեղ՝ Հայաստանում Պուտինին են կալանավորում, ադրբեջանցիները շատ հստակ հարց են տալիս այստեղ խաղաղապահ գործառույթ իրականացնող ռուսին՝ ախպեր, դուք մեզանից ի՞նչ եք ուզում։ Հայերը տալիս են, մենք էլ վերցնում ենք, ձեր ուզածն ի՞նչ է…»,- «Փաստինֆո» լրատվականի հետ զրույցում ասում է «Ազգային անվտանգություն» կուսակցության ղեկավար Գառնիկ Իսագուլյանը։

Ինչպես արդեն հայտնել ենք՝ վերջին օրերին Ադրբեջանը նոր սադրիչ քայլերի է դիմել՝ փակելով նաեւ Հակարիի կամուրջը։ Ավելին՝ նաեւ սահմանային անցակետ է տեղադրել, թեեւ 2020 թ. նոյեմբերի 9-ի եռակողմ փաստաթղթով նման անցակետ նախատեսված չէ, իսկ Լաչինի միջանցքն էլ համարվում է ԼՂ-ում տեղակայված ռուս խաղաղապահների պատասխանատվության գոտի։

Գառնիկ Իսագուլյանը նկատում է՝ ադրբեջանցին ռուս խաղաղապահին ասում է՝ եթե Փաշինյանը հայտարարում է, թե Արցախն Ադրբեջան է, ապա ինչո՞ւ դուք չեք ցանկանում ընդունել, որ մենք մեր տարածքում ինչ կուզենք կանենք՝ ընդհուպ մինչև անցակետի տեղադրումը. «Կամ լսե՞լ եք Հանրային հեռուստաընկերության եթերում ԱԽ քարտուղար Արմեն Գրիգորյանի հստակ հայտարարությունը, թե 1915 թվականի Հայոց Ցեղասպանությունը ոչ թե թուրքն է իրականացրել, այլ դրա կազմակերպիչներն ու մեղավորները ռուսներն են։ Եվ որևէ մեկն, ի դեմս, ասենք, հարցազրույցը վարողի, չի հակադարձում ԱԽՔ քարտուղարի արած այս անհեթեթ հայտարությանը, իսկ Հանրային հեռուստաընկերությունը, պարզ է, որ միայն մենք չենք նայում, նայում են նաև ռուսները»։

Այսօրինակ հայտարարությունները բոլորովին պատահական բաներ չեն, ասում է բանախոսը և հավելում՝ երբ ՀՀ ԱԽՔ քարտուղարը նման հայտարարություն է կատարում, ԱԺ իշխանական պատգամավորն ասում է, թե թուրքերի հետ Ցեղասպանության թեմայով քննարկելու բան չունի, Պուտինին էլ այստեղ ձերբակալում են, սրանք բոլորն իրար հետ փոխկապակցված գործողություններ են, որի գերնապատակը, ըստ գործչի, առանց խոսքերի էլ պարզ է։

Այնուհետև, Գառնիկ Իսագուլյանն անդրադառնում է ՀՀ ԶՈՒ ԳՇ պետի վերջերս արած աղմկահարույց հայտարարությանը. «Երբ ՀՀ ԶՈՒ Գլխավոր շտաբի պետն ասում է, թե հայ – ադրբեջանական սահմանին ԵՄ դիտորդների ներկայությունն է, որ երաշխավորում և պահպանում է սահմանների հարաբերական անդորրը, և հավելում, թե նրանց թիվն այստեղ պետք է մեծացնել, և սա այն պարագայում, երբ, իրենք՝ դիտորդները, հայտարարում են, թե, ընդամենը, գրիչներով և հեռադիտակներով զինված, իրենք էական ոչինչ անել չեն կարող մեր սահմանների անվտանգության ապահովման ուղղությամբ, այստեղ արդեն ոչինչ ասել չես կարող… Եվ այս ամենը տեղի է ունենում, անմիջապես, ռուսական խաղաղապահ առաքելություն իրականացնող զորամիավորման աչքի առաջ։ Ուրեմն, ի՞նչ պետք է այսուհետ սպասենք Ռուսաաստանի Դաշնությունից, ի՞նչ ակնկալենք նրանցից՝ այսքանից հետո։ Դիմեք գրիչով զինված դիտորդներ ուղարկող Մակրոնին, թող զենք ու զրահ տա ձեզ, որ պաշտպանեք մեր երկրի սահմանները... Մեկին, ով իր երկրի ներսում, անգամ, չի կարողանում կարգ ու կանոն հաստատել, թող իր Թուր Կեծակին հանի, տա ձեզ»,- դիմելով ՊՆ բարձրաստիճան ղեկավարությանն, ասում է պարոն Իսագուլյանը։

Վերջինս վստահ է՝ Արցախի և ՀՀ սահմաններին տեղի ունեցող գործընթացները պայմանավորված են Փաշինյան – Ալիև անմիջական կապով, որի վերաբերյալ փաստացի տեղեկություններն Ադրբեջանի ղեկավարն, անպայման, փոխանցում է նաև Ռուսաստանի Դաշնության ղեկավարին. «Անհեթեթ այս իրավիճակի ստեղծողը, կազմակերպողն ու մեղավորը, բացառապես և միայն, ՀՀ օրվա իշխանութունն է։ Ռուս խաղաղապահներն այս ամենի հետ որևէ կապ կամ առնչություն չունեն։ Ավելին՝ իրենց ամեն օրվա նոր հայտարարություններով, սրանք ավելի ու ավելի խորն անդունդն են գլորում, առանց այն էլ, կործանման եզրին հայտնված մեր երկիրն ու անվտանգային համակարգը։ Թե՛ ռուսական, թե՛ իրականական կողմը շատ պարզ է խոսում մեզ հետ՝ ասելով՝ ժողովուրդ, ի՞նչ եք դուք մեզանից ուզում, երբ ձեր իշխանություններն են հանձնում ձեր երկիրը՝ դնելով մեզ անհարմար վիճակի մեջ»։

Անդրադառնալով երեկ տեղի ունեցած Պուտին – Փաշինյան հեռախոսազրույցին՝ Գառնիկ Իսագուլյանը նկատում է՝ ավելի քան վստահ է՝ խոսակցությունը հարթ չի ընթացել, ավելին՝ այն բացասաբար է անդրադարձել հայկական կողմի վրա. «Փաշինյանին թվում է, որ եթե իրեն հաջողվում է խաբել հայ ժողովրդին, կարող է նաև նույն կերպ վարվել Ռուսաստանի Դաշնության և Իրանի Իսլամական Հանարպետության նման երկրների ղեկավարների հետ։ Երբ Փաշինյանի դեմքին ուղիղ ասում են՝ դու ստում ես, որովհետև մեզ հետ մի բան ես պայմանավորվում, քո երկիր վերադառնալով՝ այլ բան ես անում, մեզանից ի՞նչ ես ակնկալում, սա այլևս որևէ ասելիք չի ունենում, փոխարենն՝ ավելի մեծ եռանդով է տրվում երկիրը քանդելու և վաճառելու գործին։ Երբ դու ՀՀ ԶՈՒ Գլխավոր շտաբի պետի մակարդակո ստորացնում ես ռուսին, ստորաբար դանակ ես խրում քո երկրի սահմանը պաշտպանող զորամիավորման թիկունքին, ի՞նչ ես սպասում նրանից, դու ռուսին ի՞նչի տեղ ես դրել»,- ամփոփելով զրույցն, ասում է «Ազգային անվտանգություն» կուսակցության ղեկավար Գառնիկ Իսագուլյանը։

Աղբյուր` Փաստինֆո