Փաստ ինֆո

Հայ-ռուսական համալսարանի՝ այս տարվա ավարտական դիպլոմների օրինականությունը կասկածի տակ դնող մեկնաբանությունները որեւէ ընդհանրություն չունեն տրամաբանության հետ։ Ավելին, անգրագիտություն է։ «Փաստինֆո»-ի հետ զրույցում արձանագրել է համալսարանի իրավունքի տեսության և սահմանադրական իրավունքի ամբիոնի. վարիչ, ի.գ.դ., պրոֆեսոր Արթուր Ղամբարյանը։

Նշենք, որ վերջին օրերին նոր դրսեւորումներ է ստանում հայ-ռուսական համալսարանի շուրջ աղմուկը։ Այսօր մամուլում տեղեկություններ էին սկսել շրջանառվել առ այն, թե համալսարանի ուսանողներին անհանգստացնում է՝ այս տարի տրվելիք ավարտական դիպլոմների օրինականության հարցը։ Խնդիրն այն է, որ ՀՌՀ ռեկտոր Արմեն Դարբինյանի պաշտոնավարման ժամկետն ավարտվում է, ինչով պայմանավորված, մամուլում տարածվող մեկնաբանություններով, համալսարանում չի կարող լինել օրինական ճանապարհով նշանակված ռեկտորի պաշտոնակատար, քանի որ սահմանված չէ Հիմնադիր փաստաթղթերով, թե ով է պարտավոր ստորագրել ավարտական բոլոր փաստաթղթերը։

Շրջանառվող լուրերը, իրավական գիտությունների դոկտրոր, պրոֆեսոր Արթուր Ղամբարյանի գնահատմամբ՝ իրավական տեսանկյունից անգրագիտություն են։ Ըստ Ղամբարյանի՝ նշված հրապարակումները՝ Համալսարանի բարի համբավի դեմ ուղղված գործողություն է։

«Իմ խորին համոզմամբ՝ տրամաբանորեն կամ տրամաբանական տեսանկյունից հիմարություն է, իրավաբանական տեսանկյունից՝ անգրագիտություն, որովհետև դիպլոմ տալիս է իրավաբանական անձը, բուհը՝ որպես կազմակերպություն, ոչ թե՝ ռեկտորը, ուստի, որևէ նշանակություն չունի՝ ով կստորագրի՝ ռեկտորը, թե պաշտոնակատարը, որովհետև սուբյեկտը համարվում է իրավաբանական անձ այս պարագայում»,- «Փաստինֆո»-ի հետ զրույցում նշեց Արթուր Ղամբարյանը։

Ինչ վերաբերում է ռեկտորի պաշտոնակատար կարող է լինել, թե ոչ, Ղամբարյանը նշեց, որ կանոնադրական փաստաթղթերին ծանոթ չէ, սակայն ցանկացած կազմակերպություն՝ իրավաբանական անձ, պետական մարմին, անկախ նրանից, դա գրված է, թե՝ ոչ, վարչաիրավական տրամաբանության ուժող պաշտոնակատար ունենում է՝ տվյալ կազմակերպությունը ներկայացնող ղեկավար։

«Չի կարող պաշտոնակատար չունենալ։ Տեսականորեն՝ մահացավ ռեկտորը կամ հիմնարկի ղեկավարը, հիմնարկը չի՞ աշխատելու, կազմակերպությունը չի՞ գործելու։ Լուրջ չեմ մոտենում այդ փաստարկներին՝ վավերականության և այլն, վստահաբար կարող եմ ասել, որ պաշտոնակատարը կարող է ստորագրել և դա որևէ կերպ դիպլոմների վավերականության վրա ազդել չի կարող»,- նշեց Ղամբարյանը։

Հեղինակ՝ Իզաբել Սահակյան

Աղբյուր` Փաստինֆո