Փաստ ինֆո

Հակակոռուպցիոն դատարանում՝ դատավոր Կարապետ Բադալյանի նախագահությամբ, այսօր կայացել է ԱԱԾ նախկին պաշտոնյա Սերոբ Հարությունյանի՝ ենթադրաբար ապօրինի ծագում ունեցող գույքի բռնագանձման պահանջով հայցադիմումի քննությունը։

«Փաստինֆո»-ի թղթակցի հաղորդմամբ՝դատախազությունն ուսումնասիրել է Հարությունյանի եկամուտներն ու ծախսերը 1999թ., սկսած, երբ վերջինս նշանակվել է պաշտոնի, սակայն խնդրահարույց գույքի ժամանակահատվածը համարվում է՝ սկսած 2002թ. մարտի 20-ից։ Դատախազությունը դատարանից պահանջում է Հարությունյանից, նրա կնոջից ու որդուց բռնագանձել 485 միլիոն դրամ արժողությամբ գույք, այդ թվում` Հյուսիսային պողոտայում գտնվող բնակարանը, երկու ավտոկայանատեղիներ և մի քանի այլ սեփականություն:

Հյուսիսային պողոտայում գտնվող բնակարանը, որը պատասխանող կողմի պնդմամբ նվիրատվություն է, դատախազի դիտարկմամբ՝ համարվում է ապօրինի, քանի որ իրական շահառուն եղել է Սերոբ Հարությունյանը, նրա եղբայրն ավանդ է ներդրել, որի համար բավարար միջոցներ չի ունեցել, Սերոբ Հարությունյանը ևս ավանդ է ներդրել 100.000 ԱՄՆ դոլարի չափով, որի համար ֆինանսական միջոցներ չի ունեցել։

«Մինչ Հյուսիսային պողոտայի բնակարանը՝ Սերոբ Հարությունյանի եղբոր կողմից գնվելը, նշված երկու ավանդները մեկ օր առաջ մարվել են, բնակարանը գնվել է եւ դրանից մի քանի տարի անց անհատույց նվիրատվությամբ փոխանցվել է Հարությունյանին։ Մինչ անհատույց փոխանցվելը՝ Սերոբ Հարությունյանը, նրա դուստրը հաշվառվել են նշված բնակարանում։ Հարությունյանն այդ նույն բնակարանի շենքում գնել է ավտոկայանատեղ»,- նշեց դատախազը։

Հարցուպատասխանի ընթացքում պատասխանողի ներկայացուցիչը խնդրեց դատախազից ներկայացնել Հարությունյանի՝ տարեկան եկամուտները՝ օրական կտրվածքով, ինչին արձագանքելով դատախազը նշեց, որ նպատակահարմար չի գտնում հարցին պատասխանել, քանի որ դա փաստի վերաբերյալ հարց չէ։ Պատասխանողի ներկայացուցիչ Վարազդատ Ասատրյանն էլ արձագանքեց՝ «Ցավում եմ նման պատասխանի համար», նախագահող դատավորն էլ փաստաբանին զգուշացրեց՝ անթույլատրելի համարելով նման արձագանքները։

«Դե եթե կողմն ասում է՝ չեմ պատասխանում, ես էլ՝ ցավում եմ»,- ասաց փաստաբանը, ինչից հետո նախագահողը կարգադրեց փաստաբանին չշարունակել։ Փաստաբանն էլ ի պատասխան դատավորին հորդորեց տոնայնությունը փոխել։

«Երբ դատարանն ասում է՝ նման արձագանք չի կարելի, պետք է ենթարկվել կարգադրությանը։ Մի՛ շարունակեք խոսել դատարանին զուգահեռ։ Հարց ունեք, տվեք։ Չեք շարունակում այդ թեման»,-ասաց դատավորը, ինչին արձագանքելով էլ փաստաբանը նշեց, որ ինքը փաստաբան է խնդրում է իր անձի և դատավորի մասնագիտության հանդեպ դրսևորել պատշաճ, բարեկիրթ վերաբերմունք, իր հետ խոսելիս տոնայնությունը չբարձրացնել։

«Ձեր էմոցիոնալ դրսևորումները պահեք դատարանից դուրս։ Դատարանը թույլ չի տալիս Ձեզ շարունակել Ձեր հարցերը՝ դատարանի նկատմամբ անհարգալից վերաբերմունք դրսևորելու համար, երբ Դուք որոշում եք, որ կարող եք դատարանի կարգադրությանը չենթարկվել և ցուցումներ եք տալիս»,- ասաց դատավորը՝ նախազգուշացնելով, որ նման վարքագիծը շարունակելու դեպքում փաստաբանի նկատմամբ սանկցիա կկիրառվի։

Դատական նիստին մասնակցում էր նաեւ Սերոբ Հարությունյանը, որը հայտարարեց, որ ինքն ապօրինի գույք չունի։ Ավելին, Հարությունյանը նաև հիշեցրեց, որ մինչ սույն վարույթը՝ իր նկատմամբ նաև քրեական հետապնդում էր իրականացվել, իր գնահատմամբ՝ «ապօրինի» մեղադրանք առաջադրվել, ինչը հետագայում դադարեցվել է՝ հանցադեպի բացակայությամբ։ Ավելին՝ օրինական ուժի մեջ մտած դատական ակտով՝ հաստատվել է իր իրավունքների և ազատությունների խախտումը, որոնք, սակայն, մինչ այս պահը չի վերականգնվել։

«Հանցագործության դեպքի բացակայության պայմաններում ինձ ապօրինի մեղադրանք են առաջադրել»,- նշեց Հարությունյանը՝ արձանագրելով, որ կարող է կարծիք ձևավորել, որ անձանց շրջանակների անօրինական համատեղ համագործակցությամբ իրեն հետապնդման են ենթարկում. «Այսինքն՝ քրեական գործով ոչինչ չկարողացան անել, հիմա քաղաքացիական դատավարությամբ են վարույթ հարուցել»։

Նշենք, որ Սերոբ Հարությունյանը մեղադրվում էր ՊՆ նախարար Սուրեն Պապիկյանի՝ նախկինում դատվածության մասին տեղեկության արտահոսքի վերաբերյալ քրեական գործով։ Նրան մեղադրում էին իբրև պաշտոնեական դիրքի չարաշահում իրականացնելու մեջ, հետապնդումը դադարեցվել է՝ արդարացնող հիմքով։

Հեղինակ՝ Իզաբել Սահակյան

Աղբյուր` Փաստինֆո