Փաստ ինֆո

Տպավորություն է, որ Հայաստանում շատերը մոռացել են, թե Լաչինի միջանցքն ընդհանրապես ինչ է, և ինչպես է գոյացել: Իր ֆեյսբուքյան էջում այս մասին գրել է Հրանտ Տեր-Աբրահամյանը։

«Հիշեցնենք, որ Լաչինի միջանցք երևույթը բնության պարգև չէ, երկնային շնորհ չէ: Այն նաև միջազգային իրավունքի կամ պայմանագրի հետևանք չէ: Դա չի բացել ու տրվել ոչ Հռոմի Պապի, ոչ Ռուսաց թագավորի կողմից, ոչ էլ ԱՄՆ նախագահի իրավարար վճռով կամ Ֆրանսիայի հայասիրական ջանքերով:
Դա բացվել է շատ կոնկրետ ռազմական գործողության արդյունքում, շատ կոնկրետ ժամանակում, շատ կոնկրետ մարդկանց կողմից` 1992 թվակաի մայիսին:

Ի սարսափ այսօրվա հայկական "իմաստության" բացվել է ուժով, բացվել է կռվով, բացվել է փաստորեն ի հեճուկս միջազգային իրավունքի` բիրտ, մաքուր, զուտ ուժի իրավունքով:

Հետո նույն բիրտ ուժով պաշտպանվել է. Հետո լայնացվել է:
Ու պատկերացրեք, ով զարմանք, քսանվեց տարի անխափան, հանգիստ գործել է, այնպես, որ մարդիկ նույնիսկ մոռացել են, որ դա բնության շնորհ չէ, երկնքի պարգև չէ, Հոռմի պապի կոնդակով նվեր չէ, ռուսաց թագավորի ու Ամերկացոց նախագահի ընծա չէ.....
Հիմա նույն ուժով այն փակվում է:

Փակվում է ի հեճուկս միջազգային դատարանի, ամերիկացոց, ֆրանգաց և մյուս հորդորների.....Ինչպես բացվել է ուժով, այդպես էլ փակվում է:

Սրանք փաստերն են, իրականությունն են:
Թե ինչպես ենք մենք առերեսվում, ընկալում, ընդունում կամ չընդունում այդ իրականությունը` մեծ հաշվով մեր խնդիրն է, ճաշակի, տրամադրության, բնավորության հարց է:

Բայց մինչև իրավիճակից ելքեր գտնելու մասին խոսելը, թիվ մեկ նախապայմանն է` վերադառնալ իրականություն և ընդունել դա այնպես ինչպես այն կա, այլ ոչ թե այնպես, ինչպես կուզեինք, որ լինի»,-գրել է Տեր-Աբրահամյանը։

Աղբյուր` Փաստինֆո